مەملەكەت باسشىسى قاسىم-جومارت توقاەۆ قايىرىمدىلىق, ۆولونتەرلىك ۇيىمداردىڭ جانە بيزنەس-سەكتوردىڭ وكىلدەرىمەن ونلاين فورماتتا كەزدەسۋ وتكىزدى. پرەزيدەنت ءوز سوزىندە قايىرىمدىلىق پەن ۆولونتەرلىكتىڭ پاندەميا كەزىندە جالپىۇلتتىق سيپات العانىن اتاپ ءوتىپ, ونىڭ الەۋمەتتىك نورماعا اينالعانىن جانە حالىقتىڭ دۇرىس قابىلداعانىن ايتتى. قاسىم-جومارت توقاەۆ وسىنداي قيىن-قىستاۋ كەزدە سىرت قالماي, وتانداستارىنا كومەك قولىن سوزعان, مەيىرىمدىلىك, ىزگىلىك تانىتقان ءار ازاماتقا ريزاشىلىق ءبىلدىردى.
«اسار دەگەن اتا ءداستۇرىمىزدى ساقتاپ كەلە جاتقانىمىز قۋانتادى. پاندەميا كەزىندە دە ەرىكتىلەر ايانباي ەڭبەك ەتىپ, ەرەن ەرلىكتىڭ ۇلگىسىن كورسەتتى. ولار كۇندىز-ءتۇنى دارىگەرلەرمەن جانە ءتارتىپ ساقشىلارىمەن بىرلەسىپ, ىندەتپەن كۇرەستى. قايىرىمدى جاندار ورتاق ىسكە جان-جاقتى قولداۋ ءبىلدىردى. ەلباسىنىڭ باستاماسىمەن قۇرىلعان «ءبىز بىرگەمىز» قورىنىڭ جۇمىسىن ەرەكشە اتاپ وتكىم كەلەدى. بۇل يگى باستاماعا مىڭنان استام ازامات قارجىلاي ۇلەس قوستى. ءبىز وسىنداي ۇيىمشىلدىقتىڭ جانە جاۋاپكەرشىلىكتىڭ ارقاسىندا احۋالدى تۇراقتاندىرا الدىق. مۇنىڭ ءبارى – ەلدىكتىڭ جانە بەرەكە-بىرلىكتىڭ جارقىن كورىنىسى» دەدى پرەزيدەنت.
قاسىم-جومارت توقاەۆ ۆولونتەرلىك قىزمەتتى دامىتۋ, قايىرىمدىلىق پەن مەتسەناتتىققا قولداۋ كورسەتۋ مەملەكەتىمىزدىڭ ۇزاق مەرزىمدى باسىمدىعى دەپ سانايدى. ۆولونتەرلىك ىسپەن اينالىسۋ – ءپاتريوتيزمنىڭ جارقىن كورىنىستەرىنىڭ ءبىرى. مەملەكەت باسشىسى جاريالاعان ۆولونتەر جىلى ازاماتتارىمىزدىڭ كوپشىلىگىن قايىرىمدى ءىس توڭىرەگىنە توپتاستىردى. قازاقستاندىقتاردىڭ ۇسىنىسى بويىنشا جاسالعان كوپتەگەن قايىرىمدىلىق جانە ۆولونتەرلىك جوبالار – سونىڭ دالەلى.
پرەزيدەنتتىڭ تاپسىرماسى بويىنشا تۇسىنىكتى ءارى ءتيىمدى قۇقىقتىق مەحانيزمدەردى قامتيتىن قايىرىمدىلىق تۋرالى زاڭ ازىرلەنۋدە. بۇگىندە قايىرىمدىلىق جوبالارعا باعىتتالعان ءىرى بيزنەس تابىسىن 3 پايىز, شاعىن جانە ورتا بيزنەس تابىسىن 4 پايىز كولەمدە سالىقتان بوساتۋ زاڭنامالىق تۇرعىدا قاراستىرىلعان. بىراق شاعىن جانە ورتا بيزنەس بۇل جەڭىلدىكتەردى پايدالانباي وتىر. قاسىم-جومارت توقاەۆ اتالعان جاعدايعا تالداۋ جاساپ, وسى باعىتتا ءتيىستى جۇمىس جۇرگىزۋگە تاپسىرما بەردى.
