تۇڭعىش پرەزيدەنت – ەلباسى نۇرسۇلتان نازارباەۆ شىمكەنتتەگى مەديتسينالىق قۇرال-جابدىقتار, مەديتسينالىق جيھازدار مەن مەديتسينالىق كولىكتەر شىعاراتىن كاسىپورىندا بولدى.
2013 جىلدان باستاپ قازىرگى ۋاقىتقا دەيىن «كازمەدپريبور» جشس-ءى 15 مىڭنان استام مەديتسينالىق قۇرال-جابدىق, 120 مىڭنان استام مەديتسينالىق جيھاز بەن 742 جەدەل جاردەم كولىگىن جاساپ شىعاردى. كاسىپورىن 2005 جىلى قۇرىلعان.
شىمكەنت قالاسىنىڭ اكىمى م.ايتەنوۆ ەلباسىعا جەكە ينۆەستوردىڭ قاراجاتىنا سالىناتىن 1000 ورىندىق كوپسالالى ۋنيۆەرسيتەتتىك اۋرۋحانا قۇرىلىسى تۋرالى اقپارات بەردى. سونداي-اق «سامۇرىق-قازىنا» اكتسيونەرلىك قوعامىنىڭ باسقارما توراعاسى ا.ەسىموۆ پاندەميا كەزىندە ۇلتتىق ءال-اۋقات قورى تاراپىنان دەنساۋلىق ساقتاۋ جۇيەسى مەن وتاندىق وندىرۋشىلەردى قولداۋ ءۇشىن قابىلدانعان شارالار تۋرالى ايتتى. سونىمەن قاتار نۇرسۇلتان نازارباەۆقا ەلوردا مەن الماتىدا مەديتسينالىق ورتالىقتار سالۋ جونىندەگى تاپسىرمانىڭ ورىندالۋ بارىسى باياندالدى.
ەلباسى قازاقستاننىڭ كونە تاريحي ورىندارىنىڭ ءبىرى بولىپ تابىلاتىن «شىمكەنت ەسكى قالاشىعى» تاريحي-مادەني مۇرا ەسكەرتكىشىنە باردى. كونە قالاشىقتى ارالاۋ بارىسىندا ەلباسى ارحەولوگيالىق جۇمىستاردىڭ ناتيجەلەرىمەن جانە مادەني كەشەندى ودان ءارى دامىتۋ جوسپارلارىمەن تانىستى. ۇسىنىلعان اقپاراتقا سايكەس, 2021 جىلى كەشەن اۋماعىندا ءۇش دەڭگەيلى ورتاعاسىرلىق مۇراجاي مەن 500 ورىندىق امفيتەاتردىڭ قۇرىلىسى باستالادى.
