ەرتەڭ 1 ماۋسىم – حالىقارالىق بالالاردى قورعاۋ كۇنى. مەرەكەگە وراي ەلوردالىق جەتكىنشەكتەردىڭ تىنىس-تىرشىلىگىن ءبىلۋ ماقساتىندا قالالىق ءبىلىم باسقارماسى باسشىسىنىڭ ورىنباسارى قاسىمحان سەنعازىەۆپەن تىلدەسكەن ەدىك.
– قاسىمحان سەنعازىۇلى, استانالىق بۇلدىرشىندەردىڭ الداعى مەرەكەسىن قالاي اتاپ وتەسىزدەر؟
– بيىلعى حالىقارالىق بالالاردى قورعاۋ كۇنىن «ءبىز – قازاقستان بالالارىمىز! ءبىز جاڭا الەمدە ءومىر سۇرەمىز!» ۇرانىمەن ۇيىمداستىرۋدى ءجون كوردىك. وسىعان وراي 1 ماۋسىم كۇنى قالانىڭ ەكى الاڭىندا ءىس-شارالار وتەدى. ايتالىق, قارجى مينيسترلىگى عيماراتىنىڭ الدىنداعى الاڭدا م.وتەمىسۇلى اتىنداعى وقۋشىلار سارايىنىڭ باستاماسىمەن, ەلوردالىق مەكتەپتەر, گيمنازيالار, ليتسەيلەر شىعارماشىلىق ۇيىمدارىنىڭ قاتىسۋىمەن «الەم بالالار كوزىمەن» اتتى مەرەكەلىك شارا بولماق. وندا قاتىسۋشىلار «استانا شۋاقتارى» اتتى مەكتەپكە دەيىنگى توپتاردىڭ فەستيۆالىن, «تاڭعاجايىپ ارمان!» اتتى اسفالتقا سۋرەت سالۋ بايقاۋىن, «Star time» فلەشموبىن تاماشالاپ, قۇممەن سۋرەت سالۋ, كوپىرشىكتى شار ۇرلەۋ تاسىلدەرىن ۇيرەنە الادى. بۇعان بەس مىڭداي بالا قاتىسادى دەپ جوسپارلانۋدا.
ال, استانا قالاسى وقۋشىلار سارايىنىڭ الاڭىندا ەكى مىڭ ءبۇلدىرشىننىڭ قاتىسۋىمەن «بالالىقتىڭ بويتۇمارى» اتتى مەرەكەلىك كونتسەرت وتەدى.
بالالار ءتول مەرەكەلەرىندە ءتاتتى سىيلىقتاردان دا قۇر الاقان قالمايدى. ولارعا دەمەۋشىلەردىڭ كومەگىمەن جينالعان 1 ملن 700 مىڭ تەڭگەنىڭ بالمۇزداق, شىرىن, شوكولادتارى ۇلەستىرىلمەك. تاعى ايتا كەتەرلىگى, اتاۋلى كۇندى مەرەكەلەۋگە جەرگىلىكتى بيۋدجەتتە 1 ملن 400 مىڭ تەڭگە قارالدى. سونىمەن قاتار, از قامتىلعان وتباسىلارداعى 108 وقۋشىعا «تسەسنابانك» اق-نىڭ, «مەلومان» ساۋدا ورتالىعىنىڭ سىيلىق سەرتيفيكاتتارى بەرىلەدى.
– دەنى ساۋ ۇرپاق – ەل ەرتەڭى. جاسوسپىرىمدەر اراسىندا سپورتتىق سايىستار وتەتىن شىعار؟
– ارينە. №32 مەكتەپ-گيمنازيانىڭ الاڭىندا 7-8-سىنىپ وقۋشىلارى اراسىندا ستريتبولدان «سپورتتىق بالالار – ەلوردانىڭ ماقتانىشى!» سايىسى بولادى. كامەلەتكە تولماعانداردى بەيىمدەۋ ورتالىعىنىڭ بالالارى ءۇشىن دە بىرقاتار شارالار وتەدى. ءاربىر بالاباقشانىڭ ىشىندەگى كوڭىلدى باسقوسۋلار بار. ءبىلىم باسقارماسى «باقىتتى بالا» اكتسياسى اياسىندا «دار», «KZ» قوعامدىق قورلارىمەن بىرلەسىپ, «قازترانسگاز» اق قولداۋىمەن از قامتىلعان وتباسىلارداعى 130 بالاعا 2 209 مىڭ تەڭگەنىڭ سپورتتىق كيىمدەرىن سىيلايدى.
– جازعى دەمالىس كەزىندە بالالار مەن جاسوسپىرىمدەردىڭ دەمالىسى, ساۋىقتىرىلۋى جانە ەڭبەكپەن قامتىلۋى – ەڭ ماڭىزدى الەۋمەتتىك ماسەلەلەردىڭ ءبىرى. وسى باعىتتاعى شارۋالار جونىندە ايتا كەتسەڭىز…
– بالدىرعانداردىڭ بوس ۋاقىتىن ءتيىمدى ۇيىمداستىرۋ – باستى نازاردا. ءبىلىم باسقارماسىنىڭ اعىمداعى جىلعى 14 ساۋىردەگى بۇيرىعىنا سايكەس, جازعى كانيكۋلدا بالالاردى ساۋىقتىرۋ دەمالىسىن, بوس ۋاقىتىن جانە جۇمىسپەن قامتىلۋىن ۇيىمداستىرۋ جونىندە كوميسسيا قۇرىلدى. ەندى بالالاردىڭ بوس ۋاقىتىن ءتيىمدى وتكىزۋلەرىن ۇيىمداستىرۋ ماقساتىندا ەڭ ۇزدىك باعدارلاما بايقاۋى وتەدى. لاگەرلەردە مەكتەپ مۇعالىمدەرى مەن گۋمانيتارلىق كوللەدجدىڭ ستۋدەنتتەرى جۇمىس ىستەيدى.
ەلوردالىق 68 مەكتەپتىڭ جانىنان 1-4-سىنىپتار ءۇشىن لاگەرلەر اشىلادى. بۇعان ءۇش اۋىسىممەن 30 000 باستاۋىش سىنىپ وقۋشىسىن قامتۋ جوسپارلانۋدا. ال, ورتا بۋىن وقۋشىلارى ءۇشىن مەكتەپ جانىنداعى «ديدارلى جاز» جوباسى جۇزەگە اسىرىلۋدا, ياعني, ءبىلىم بەرۋ ۇيىمدارى جانىنان جازعى سپورتتىق ويىن الاڭدارى جۇمىس ىستەيدى. 2 ماۋسىم مەن 11 شىلدە ارالىعىندا 4000 وقۋشى الۋان سپورت تۇرلەرىمەن اينالىسادى. 8-10 سىنىپ وقۋشىلارى ءۇشىن بىلتىر «ايبىندى ماۋسىم» اسكەري-سپورتتىق الاڭ جوباسى ەنگىزىلگەن. بۇعان قوسا «باتىر» تۋريستىك شاتىرلى لاگەرى جەتىم, اتا-انا قامقورلىعىنسىز قالعان بالالار, تۇرمىسى ناشار جانە كوپ بالالى وتباسى جەتكىنشەكتەرىنىڭ دەمالىسىن ۇيىمداستىرادى. قالا سىرتىنداعى جىل بويى جۇمىس ىستەيتىن «ارمان» سپورتتىق-ساۋىقتىرۋ لاگەرى بەس اۋىسىممەن جۇمىس ىستەيدى.
وقۋشىلار سارايى مەن م.وتەمىسۇلى اتىنداعى وقۋشىلار سارايى دا 8-12 جاس ارالىعىنداعى بالالارعا كۇندىزگى اقىلى دەمالىس لاگەرىن ۇيىمداستىرادى.
«بالداۋرەن» رەسپۋبليكالىق وقۋ-ساۋىقتىرۋ ورتالىعىندا ءبىلىم جانە عىلىم مينيسترلىگىنىڭ كۆوتاسى نەگىزىندە جازعى ماۋسىمدا ەلوردالىق 70 وقۋشى تىنىعادى.
اسحات رايقۇل
