ۇلتتىق مۋزەيدە «بولاشاققا باعدار: رۋحاني جاڭعىرۋ» ستراتەگيالىق باعدارلاماسى جانە قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا تۋىنداعان قازاقستان تاريحىن وقىپ-تۇسىنۋگە سەپتىگىن تيگىزەتىن «Qazaq eli» اتتى زياتكەرلىك ويىن جوباسىنىڭ تانىستىرىلىمى ءوتتى.
«ۇلى دالانىڭ جەتى قىرى» ماقالاسىندا «ءبىزدىڭ تاريحىمىزدا قاسىرەتتى ساتتەر مەن قايعىلى وقيعالار, سۇراپىل سوعىستار مەن قاقتىعىستار, الەۋمەتتىك تۇرعىدان قاۋىپتى سىناقتار مەن ساياسي قۋعىن-سۇرگىندەر از بولمادى. مۇنى ۇمىتۋعا حاقىمىز جوق» دەگەن ەلباسىمىز نۇرسۇلتان نازارباەۆتىڭ
ءسوزى وتان تاريحىن زەرتتەۋ ءىسىن جاڭعىرتۋعا ۇلكەن سەرپىلىس بەردى. جاس ۇرپاقتىڭ ەل تاريحىن وقىپ ۇيرەنۋگە قىزىعۋشىلىعىن ارتتىرۋ, پاتريوتتىق سەزىمىن وياتۋ جولدارىن قاراستىرۋ بارىسىندا تۋىنداعان «Qazaq eli» زياتكەرلىك ويىنىنىڭ جاڭاشىلدىعى – ءبىلىم بەرۋدە الەمدىك ستاندارتقا ساي اقپاراتتىق تەحنولوگيا جەتىستىكتەرى مەن يننوۆاتسيالىق ءادىس-تاسىلدەردى كەڭىنەن قولدانۋ.
اتالعان ويىن اۆتورى – نۇر-سۇلتان قالاسىنداعى نازارباەۆ زياتكەرلىك مەكتەبىنىڭ مۇعالىمى دارحان قوجامسەيىت.
ويىن ماقساتى – جاسوسپىرىمدەر مەن ەرەسەكتەردىڭ, تاريحي بىلىمدەرىن شىعارماشىلىقپەن قولدانۋ ارقىلى, ەرۋديتسياسىن دامىتۋ جانە ەلىمىزدىڭ تاريحىنا قىزىعۋشىلىعىن ارتتىرۋ. «Qazaq eli» زياتكەرلىك ويىنىن كەز كەلگەن ورتادا, ءتۇرلى جاعدايلاردا ۇيىمداستىرۋعا بولادى. مۇعالىمدەر ساباق ۇردىسىندە, ساباقتان تىس ءىس-شارالاردا, وتباسى ورتاسىندا, دوستار اراسىندا, قوسىمشا ءبىلىم بەرۋ ورتالىقتارىندا قولدانۋعا بولادى. اسىرەسە, مەكتەپ تۇلەكتەرىنىڭ ەمتيحان ماتەريالدارىن قايتالاپ, ءبىلىمىن بەكىتۋگە جانە ەستە ساقتاۋ قابىلەتىن ارتتىرۋعا قاجەتتى قۇرال.
ءىس-شاراعا №88 مەكتەپ-ليتسەيىنىڭ وقۋشىلارى, مەنەدجمەنت, بيزنەس جانە ءبىلىم كوللەدجىنىڭ ستۋدەنتتەرى, نۇر-سۇلتان قالاسىنىڭ تاريحشى مۇعالىمدەرى قاتىستى.
بايان اسىلبەكوۆا
