نۇر-سۇلتان قالاسىنىڭ اكىمى التاي كولگىنوۆتىڭ باستاماسىمەن ەلوردا ءماسليحاتى جانە ونەر قايراتكەرلەرى تۇركىستان قالاسىنداعى «اقجايىق» مۋزىكا مەكتەبىنە ارنايى بارىپ, تاۋەلسىزدىكتىڭ 30 جىلدىعى شەڭبەرىندە مەكتەپ وقۋشىلارىنا مۋزىكالىق اسپاپتاردى تارتۋ ەتتى.
– تۇركىستان تەك وبلىس ورتالىعى عانا ەمەس, بۇكىل تۇركى الەمىنىڭ استاناسىنا اينالىپ وتىر. وسىنداي ءبىر كەرەمەت زاماناۋي ۇلگىدە سالىنعان مادەنيەت وشاقتارىنىڭ ىشىنەن تالاي ەلىمىزدىڭ ونەر سالاسىنىڭ مايتالماندارى تاربيەلەنىپ شىعادى دەپ ويلايمىن. مىنە, بۇگىن ونەر كورسەتكەن 138 بالانىڭ ارقايسىسى ءار باعىتتا تاڭداعان ونەرلەرى بار ەكەنىنە كوزىمىزدى جەتكىزدىك. سول بالالارعا تولىق ءبىلىم الىپ, وزدەرىنىڭ مادەني جانە رۋحاني تالپىنىستارىن ارتتىرۋ ءۇشىن وسى مۋزىكالىق اسپاپتاردى سىيلاپ وتىرمىز, – دەدى نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ.
زاماناۋي ۇلگىدە سالىنعان مەكتەپتە وقۋشىلار ونەردىڭ وننان اسا تۇرىنەن ءدارىس الادى. اتاپ ايتقاندا, دومبىرا, قوبىز, جەتىگەن, فورتەپيانو, سكريپكا, ۆوكال, ۇرمالى اسپاپتار, ءان-تەرمە, بايان جانە ساكسوفون. ۇيىرمەلەرگە كونسەرۆاتوريا تۇلەكتەرى ۇستازدىق ەتىپ, وقۋشىلار رەسپۋبليكالىق بايقاۋلاردا جۇلدەلى ورىندارعا يە بولۋدا.
– كەز كەلگەن مەملەكەتتىڭ ەرتەڭى وسكەلەڭ ۇرپاق ەكەنى زاڭدىلىق. اسىرەسە, ەلدىڭ, ۇلتتىڭ بولاشاعى, ارينە, دارىندى, ونەرلى, ءبىلىمدى, ينتەللەكتۋالدى جانە زەردەلى ۇرپاقتىڭ قولىندا. سوندىقتان بۇگىن ءبىز ەلوردادان تۇركىستان قالاسىنا ارنايى ات باسىن بۇرىپ, بۇكىل تۇركى دۇنيەسىنىڭ التىن بەسىگى ىسپەتتەس تۇركىستانداعى «اقجايىق» مۋزىكا مەكتەبىنە ەلوردا اكىمدىگى مەن ءماسليحاتىنىڭ, نۇر-سۇلتان قالاسىنداعى ونەر قايراتكەرلەرىنىڭ اتىنان ارنايى تاپسىرىس بەرىپ جاسالعان, ساپاسى وتە مىقتى دومبىرا, قىلقوبىز, جەتىگەن, بايان, سكريپكا, پريما-قوبىز سەكىلدى اسپاپتاردى الىپ كەلدىك. بۇل اسپاپتار ارقىلى بولاشاقتا تۇركىستانداعى «اقجايىق» مۋزىكا مەكتەبىندە ءبىلىم الىپ جاتقان جاس دارىندار وزدەرىنىڭ تالانتتارىن, شىعارماشىلىق الەۋەتىن كورسەتىپ, رەسپۋبليكالىق, حالىقارالىق ونەر سايىستارىندا توپ جارىپ شىعاتىنىنا سەنەمىن, – دەدى مۋزىكالىق جاس كورەرمەن تەاترىنىڭ ديرەكتورى اسحات ماەميروۆ.
قوس قاباتتان تۇراتىن ساۋلەتتى عيمارات مۋزىكالىق اسپاپتا ساباقتار وتۋگە بارىنشا لايىقتالعان. اتالعان مەكەمە ماماندارىنىڭ ايتۋىنشا, كەلەشەكتە ۇلگەرىمى جاقسى شاكىرتتەردەن جوعارى دەڭگەيلى وركەستر قۇرىپ, كوپتەگەن حالىقارالىق, تۇركى الەمى ەلدەرىنە بارىپ, قازاقتىڭ ۇلتتىق اسپاپتارى مەن ونەرىن ناسيحاتتايتىن بولادى.
ادىلعازى باقىتۇلى
