ونەرسۇيەر قاۋىمعا رۋحاني بايلىق سىيلاپ, مۋزىكا الەمىنىڭ تەرەڭ سىرىنان سۋسىنداتار تاعىلىمى مول ونەر ورداسى – «قازاقكونتسەرت» مەملەكەتتىك كونتسەرتتىك ۇيىمى قازاق مۋزىكا ونەرىنىڭ ناعىز قارا شاڭىراعىنا اينالدى. تاريحى باي, تامىرى تەرەڭ «قازاقكونتسەرت» ءاردايىم ۇلتتىڭ رۋحاني مۇددەسىن ۇلىقتاپ, ەلىمىزدەگى مۋزىكالىق ونەردىڭ دامۋىنا زور ۇلەس قوسىپ كەلەدى. بيىل الپىستىڭ اسۋىن باعىندىرعان «قازاقكونتسەرت» ءداستۇر مەن جاڭاشىلدىقتى قاتار ۇشتاستىرا الدى ما, قازىرگى ۋاقىتتىڭ كۇردەلى احۋالىنا بەيىمدەلە الدى ما؟ وسى جانە ونەر توڭىرەگىندەگى وزگە دە وزەكتى ماسەلەلەر تۋرالى «قازاقكونتسەرت» مكۇ ديرەكتورى, قازاقستاننىڭ ەڭبەك سىڭىرگەن قايراتكەرى جەڭىس سەيدۋللاۇلى اڭگىمەلەپ بەردى.
الپىس جىلدىق اسۋ
– جەڭىس سەيدۋللاۇلى, «قازاقكونتسەرتتىڭ» الداعى الپىسىنشى مەرەيتويلىق ماۋسىمى نەسىمەن قىزىق بولماق؟
– جاڭا كونتسەرتتىك ماۋسىم – ءبىز ءۇشىن ايرىقشا بەلەس. كورەرمەندەرمەن قاۋىشۋعا اسىققان «قازاقكونتسەرت» ۇجىمىنىڭ جاڭا ماۋسىمدا جۇرتشىلىققا ۇسىنار جاڭالىعى از ەمەس. مەرەيتويلىق جىلدىڭ اياسىندا ارتىستەرىمىز كورەرمەندەردى ونلاين جانە ءداستۇرلى فورماتتاعى جاڭا كونتسەرتتىك باعدارلامالارمەن, كەرەمەت پرەمەرالار جانە تىڭ جوبالارمەن قۋانتپاق.
– ادەتتە ءارتۇرلى شىعارماشىلىق ۇجىمدار مەرەيتويلارىندا كىتاپ, كۇيتاباق شىعارۋ سياقتى ىستەردى قولعا الىپ جاتادى. سىزدەر كورەرمەندەرگە نە دايىنداپ وتىرسىزدار؟
– جۋىردا «قازاقكونتسەرتتىڭ» اڭىز تۇلعالارى ورىنداعان اتاقتى اندەر مەن قازىرگى تالانتتارى ۇسىنىپ جۇرگەن تانىمال تۋىندىلار ەنگەن ونلاين مەدياتەكا جارىق كورەدى. تاعى ءبىر ۇلكەن ەڭبەگىمىز – ۇيىمنىڭ 60 جىلدىعىنا ارنالعان مەرەيتويلىق كىتاپ. بۇل ەكى تۋىندىمىز ەلەكتروندى فورماتتا جاريالانىپ, قولدانىستا ىڭعايلى ءارى قولجەتىمدى بولماق. مۋزىكالىق مادەنيەت تاريحىندا قالاتىن تاعى ءبىر قۇندى دۇنيە – «قازاقكونتسەرت» تاريحى مەن بۇگىنگى جەتىستىكتەرىنە ارنالعان دەرەكتى فيلم. مەرەيتويلىق كونتسەرتتىك ماۋسىمنىڭ شىمىلدىعى ۇلكەن ونلاين كونتسەرتپەن اشىلماق. بۇنىڭ بارلىعى ونەرسۇيەر قاۋىمعا تارتۋ ەتەتىن كەرەمەت توسىن سىيلارىمىزدىڭ باستاماسى عانا.
– ال ەلۋ توعىزىنشى كونتسەرتتىك ماۋسىم قالاي ءوتتى؟ قورىتىندىلارىن ءوز اۋزىڭىزدان ەستىسەك…
– وتكەن كونتسەرتتىك ماۋسىم جاڭا كونتسەرتتەر مەن قويىلىمدارعا, ايتۋلى جەتىستىكتەرگە جانە كۇتپەگەن جاڭالىقتارعا تولى بولدى. «قازاقكونتسەرتتىڭ» شىعارماشىلىق ۇجىمدارى ونەرسۇيەر قاۋىمعا ءتۇرلى جانرلىق باعىتتاعى ەرەكشە 43 كونتسەرتتىك ءىس-شارانى ۇسىندى.
59-شى كونتسەرتتىك جىل تالعامپاز تىڭدارماننىڭ جاندى داۋىستاعى مۋزىكاعا, جوعارى ساپالى كونتسەرتتىك باعدارلامالارعا دەگەن ىقىلاسىن ارتتىرا ءتۇستى. وسى ورايدا «قازاقكونتسەرتتىڭ» قۇرامىنداعى قازاق مەملەكەتتىك سيمفونيالىق وركەسترى, «فورتە تريو» مەملەكەتتىك تريوسى, «استانا سازى» قازاق مەملەكەتتىك فولكلورلىق ءانسامبلى, «استانا ميۋزيكل» تەاترى, «حالىق قازىناسى» مەملەكەتتىك فولكلورلىق ونەر ءبولىمى, «ەسترادا ءبولىمى», «Saz&soul» ۆوكالدىق-اسپاپتىق ءانسامبلىنىڭ ارتىستەرى مەن سوليستەردىڭ شىعارماشىلىق ەڭبەگى زور.
باسقاشا ايتقاندا, مۋزىكالىق, تانىمدىق جانە ەستەتيكالىق تالعامدارى ءارتۇرلى ونەرسۇيەر قاۋىم ءوزىنىڭ ءسۇيىپ تىڭدايتىن رۋحاني دۇنيەلەرىن ءبىر «قازاقكونتسەرتتىڭ» وزىنەن تابا ءبىلدى.
بۇعان قوسا, پرەمەرالار مەن جوعارى ساپالى ونەر تۋىندىلارىنان رەسپۋبليكا ايماقتارى دا, شەتەلدىك كورەرمەندەر دە قۇر قالعان جوق. وتكەن كونتسەرتتىك ماۋسىمدا ەل ايماقتارىندا – 25, شەتەلدەردە 15 گاسترولدىك ساپار ءساتتى جۇزەگە استى.
كارانتين جاڭا مۇمكىندىكتەر كەزەڭى بولدى
– كارانتين ەنگىزىلگەن شاقتا «قازاقكونتسەرت» ءۇشىن جاڭا باعىتقا بەتبۇرىس جاساۋ قانشالىقتى قيىن بولدى؟
– ءيا, كارانتين كەزىندە كورەرمەندەرىمىز ءۇشىن الدىن الا دايىندالعان كوپتەگەن ءىس-شارالار وتكىزىلمەي, شىعارماشىلىق جوسپارعا ەداۋىر وزگەرىستەر ەنگىزۋگە تۋرا كەلدى. الايدا مول تاجىريبەسى بار «قازاقكونتسەرت» ءۇشىن كارانتين جاڭا مۇمكىندىكتەر كەزەڭىنە اينالدى.
بۇل كەزەڭدە كورەرمەنگە پايدالى, تانىمدىق ءارى ءپوزيتيۆتى ونلاين جوبالاردى ۇسىندىق. سولاردىڭ ىشىندە ەڭ اۋقىمدى جوبا – مادەنيەت جانە سپورت مينيسترلىگىنىڭ باستاماسىمەن جانە «قازاقتەلەكوممەن» بىرلەسىپ جۇزەگە اسقان «كارانتيندەگى جۇلدىز» ونلاين جوباسى. بۇل جوباداعى ونلاين كونتسەرتتەر بىردەن كورەرمەن جۇرەگىنە جول تابا ءبىلدى. 50 ونلاين كونتسەرت ۇسىنىلىپ, 140 قازاقستاندىق ءارتىس قاتىسقان جانە 20 ميلليون كورەرمەن تاماشالاعان بۇل جوبا كارانتيندەگى ۇزدىك باستامالاردىڭ بىرىنە اينالدى. بۇعان ونەر سۇيەر قاۋىمنىڭ كوپتەگەن جىلى لەبىزدەرى مەن العىسى دالەل.
كەلبەتىن تاپقان كاسىبي ۇجىم
– تامىرىن تەرەڭگە جايعان «قازاقكونتسەرت» 60 جىلدىڭ ىشىندە وزىندىك كەلبەتىن تاپتى ما؟
– «قازاقكونتسەرتتىڭ» كەلبەتىن قالىپتاستىراتىن ەكى فاكتور بار دەپ بىلەمىن. سونىڭ ءبىرى – ۇيىمنىڭ قۇرامىنداعى ونەر ۇجىمدارى مەن سوليستەر. «قازاقكونتسەرت» تىڭدارمان مەن ونەر اراسىنداعى التىن كوپىر بولسا, كونتسەرتتىك ۇيىمنىڭ تىرشىلىگىنە جان بەرىپ, رۋحاني مۇرامىز بەن تىڭدارمان اراسىن جالعاۋشى – ونەر ۇجىمدارىمىز بەن سوليستەرىمىز.
ارىدان بەرى قاراي تارتساق, «قازاقكونتسەرت» تاريحىندا شارا جيەنقۇلوۆا, جامال وماروۆا, جۇسىپبەك ەلەبەكوۆ, رابيعا ەسىمجانوۆا, جاپپاس قالامباەۆ, عاريفوللا قۇرمانعاليەۆ, ماعاۋيا حامزين, ەركەعالي راحماديەۆ, روزا باعلانوۆا, تاعى باسقا قازاق مۋزىكا مادەنيەتىنىڭ قازىعىن قاققان كوپتەگەن ءىرى تۇلعالاردىڭ ايقىن ءىزى قالدى.
ولاردىڭ جارقىن ءىزىن التىنبەك قورازباەۆ, سارا تىنىشتىعۇلوۆا, ايمان مۇساقوجاەۆا, روزا رىمباەۆا, ماقپال ءجۇنىسوۆا, ايجان نۇرماعامبەتوۆا, ديماش قۇدايبەرگەن, ەرلان رىسقالي, ازامات جىلتىركوزوۆ, ءمولدىر اۋەلبەكوۆا سىندى بەلگىلى, بەلدى تالانتتى ونەرپازدار لايىقتى جالعادى.
قازاقكونتسەرت بولمىسىن قالىپتاستىراتىن ەكىنشى ماڭىزدى فاكتور – ءبىز ۇسىناتىن كونتسەرتتىك ءىس-شارالار. كورەرمەندەردى بىردەن باۋرايتىن ەرەكشەلىك – ساپالى ءارى تەك جاندى داۋىستاعى اۋەندەردىڭ, جوعارى مۋزىكالىق-ەستەتيكالىق تالعامنىڭ, رۋحاني ءتالىم-تاربيە بەرەر جانە تانىم كوكجيەگىن كەڭەيتەر تىڭ شىعارماشىلىق دۇنيەلەردىڭ شەبەر ۇيلەسىم تابۋى.
بىرنەشە مۋزىكالىق جانردى توعىستىرعان «قازاقكونتسەرت» بۇل ەرەكشەلىگىن كورسەتىپ كەلە جاتىر. ونىڭ جارقىن ۇلگىلەرى – «كوشپەندىلەر رۋحى» كونتسەرتى, «تۇران» ەتنو-فولكلورلىق ءانسامبلىنىڭ ۇلكەن كونتسەرتى, «ەلىن سۇيگەن, ەلى سۇيگەن ەلباسى», «جاڭا جىلدىق كەزدەسۋ», «ۇلىستىڭ ۇلى كۇنى» تاعى باسقا كونتسەرتتەر. كونتسەرتتەر مەن قويىلىمدارىمىز ءاردايىم حالىققا قولجەتىمدى جانە ءارتۇرلى جاس شاماسىنداعى ۇلكەندى-كىشىلى كورەرمەندەرگە ارنالعان.
«قازاقكونتسەرتتىڭ» الپىس جىلداعى جەتىستىكتەرىن ءبىر اۋىز سوزبەن ايتىپ تاۋىسۋ مۇمكىن ەمەس. «ءبىز وسىندايمىز» دەپ ماقتانعاننان گورى, ەندى قاي بيىكتەن اسامىز دەگەن ۇلكەن ماقسات بار الدىمىزدا.
– اڭگىمەڭىزگە راقمەت! ونەر ۇجىمى الداعى ماقساتتارىنا جەتە بەرسىن!
