ماسكەۋدە وقىپ جۇرگەن قازاقستاندىق جاستار ۇيىمى 1965 جىلعى جازعى دەمالىسىن تىڭ ولكەسىنىڭ تسەلينوگراد, قوستاناي وبلىستارىنا ارنادى.
شىلدە ايىنىڭ باسىندا تسەلينوگرادتا كونتسەرت قويعان «جاس تۇلپاردىڭ» ماقساتىن كونتسەرت الدىندا تىڭداۋشىلارىنا وسى ۇيىمنىڭ جەتەكشىسى مۇرات مۇحتارۇلى اۋەزوۆ: «جاس تۇلپار» اۋىلعا مادەنيەتىمىزدىڭ جاڭالىعىن جەتكىزۋدى ماقسات ەتەدى. ول حالىق ونەرىنىڭ جاڭارتا, قۇلپىرتا جاڭعىرتقان بەينەسىن اپارىپ تانىستىرادى» دەپ ءتۇسىندىردى.
«جاس تۇلپاردىڭ» لەكتورلارى ستۋدەنتتەر ماقاش ءتاتىموۆ, مۇرات اۋەزوۆ, قاسىمبەك المەنوۆ, بولاتحان تايجانوۆ ءار ءتۇرلى تاقىرىپتا لەكتسيا وقىدى.
كونتسەرتتە مارات بالتاباەۆتىڭ وڭدەۋىندە «قاماجاي» ءانى, قازاق اندەرى تاقىرىبىنا جازعان ءپوپۋرريى ءوزى باسقاراتىن كۆينتەتتىڭ ورىنداۋىندا وتە تارتىمدى شىقتى.
ساحنادا «قايىقتا» ءانىن تامىلجىتا ورىنداعان ەڭ جاس ءانشى الما قوجاحمەتوۆا ون جىلدىقتى ەندى عانا بىتىرگەن پاۆلودارلىق جاس تالاپ ەكەن. «جاس تۇلپاردىڭ» ءبىر جاقسى ءداستۇرى ەل ارالاپ جۇرگەندە كەزدەسكەن تالانتتى جاستاردى بايقاي ءجۇرىپ, كەيىننەن ماسكەۋ كونسەرۆاتورياسىنا, باسقا دا ونەر ينستيتۋتتارىنا قابىلداتادى ەكەن.
بۇدان سوڭ ماسكەۋلىك جاس تۇلەكتەر كونتسەرتىن تسەلينوگراد وبلىسىنىڭ قورعالجىن, دەرجاۆين, قوستاناي وبلىسىنىڭ وڭتۇستىكتەگى اۋداندارىنىڭ شالعايداعى اۋىل تۇرعىندارى تاماشالادى.
عازيزا يساحان
