تۇنگى ەكىدەن اسقان كەز. بىزدەر مىنگەن ۇشاق نۇرسۇلتان نازارباەۆ حالىقارالىق اۋەجايىنا كەلىپ قوندى. الدىمەن استانامىزدىڭ سۋىق جەلى قارسى الدى. سوندا دا ارامىزداعى تومپاق بالا ەلدى قاتتى ساعىنعان ەكەن, بورتتىڭ ەسىگى اشىلىسىمەن: «و, قازاقستان!» دەدى دە, ىزىنشە «التىن كۇن اسپانى» دەپ انگە دە قوسىپ جىبەردى.
جولسوقتى بولعان جولاۋشىلار بالانىڭ كوڭىلىنە ريزا بولىپ, جادىراي كۇلىپ, شەكارالىق باقىلاۋدان كەزەگىمەن ءوتىپ جاتتى. ودان كەيىنگى ەسىكتىڭ كوزىندە «پتر»-دەن وتكەنىمىزدى دالەلدەيتىن قۇجاتتى كورسەتۋ كەرەك ەكەن. سىناپتى وتكەن تاۋلىكتە قوناقۇيدە تاپسىرىپ, تەرىس ناتيجەسىن الىپ كوڭىلىمىزدى دەمەگەن بولاتىنبىز. ونى ۇشاردا دا تەكسەرگەن بولاتىن. مادەنيەتتى تۇردە, اعىلعان جولاۋشىلاردىڭ ءبىر-بىرىنە كەدەرگىسىن كەلتىرمەيتىندەي جايما-شۋاق جاعدايدا وتكەنى ەسىمدە قالعان. ءىلتيپاتتى, شالت قيمىلى تۇگىل ارتىق ءسوزى جوق, ىزەتتى كورىنگەن ول جاقتىڭ بارشا قىزمەتكەرلەرى.
ءبىزدىڭ ەلدەگى بۇل مىندەتتى اتقارعان ەتجەڭدى, ايەل-قىزمەتكەردىڭ وكتەم داۋىسى قۇلاققا ەرسى ەستىلدى. توپىرلاعان جولاۋشىلارعا جەكىپ سويلەپ, دەگبىرىڭدى الدى. كۇندە كورىپ كوز ۇيرەنبەگەن قىزمەت فورماسىنا نازارىمىز ءتۇستى. القىمىن بايلاعان شۇبەرەكتى بۋعان قىزىل بەسجۇلدىز دا وتكەن زاماننىڭ وشكەن قۇرىلىمىن ەسكە ءتۇسىردى. وسىلايشا, از كۇن شەتەلدىڭ مادەنيەتىنە قانىپ, قىزمەت كورسەتۋ ادەبىن بايقاپ, ريزا كوڭىلمەن كەلگەن كوڭىلدى مىنا ايەلدىڭ امىرشىدەي اكىرەڭدەگەن مانەرى ءبىر ساتتە جوق قىلدى. جالعىز مەن ەمەس, جولاۋشىلاردىڭ اراسىندا قازاقستانعا العاش كەلگەندەر دە بار. ولاردىڭ قانداي اسەردە قالعانىن بىلمەيمىن. بار بولعانى, ارقانىڭ بورانىنداي بۇرقىراعان شەكارا قىزمەتكەرىنىڭ الدىندا قىلمىستى بولعانداي كىشىرەيىپ, «پتر» كورسەتىپ, ءوتىپ جاتتى. ءبىر قاراسام, «التىن كۇن اسپانىم» دەپ اسقاقتاعان بالانىڭ دا كوڭىلى ءپاس بولىپ, باسىلىپ قالىپتى. راس, ىندەت بار. الدىمەن شەكارادان كەلەدى دەپ «وميكروندى» دا كۇتىپ وتىرعان بولار. بىراق, مۇنىڭ ءبارى ادام مادەنيەتىنىڭ قىزمەت ساپاسىنا سىن كەلتىرمەۋى كەرەك ەمەس پە؟!
