استاناداعى «جاستار» تەاترىندا كەزەكتى پرەمەرا ءوتتى. بولات بەكجانوۆتىڭ «ءومىر» اتتى دراماسىن اتالمىش تەاتردىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى نۇرقانات جاقىپباي ساحنالادى.
قازىر ءبىر پەرزەنتكە زار بولىپ جۇرگەن قانشاما وتباسى بار. بۇل جاعدايدان قانشاما شاڭىراق شايقالىپ, ورتاسىنا ءتۇستى. سپەكتاكلگە بۇگىنگى كۇندەرى وزەكتى بولىپ وتىرعان وسى تاقىرىپ ارقاۋ بولدى. مۇنىڭ ارتى ۇلت دەموگرافياسى پروبلەماسىنا اپارادى. الايدا قويىلىمدا بۇل جاعى اشىلماعان. ەرلى-زايىپتىلاردىڭ باسىنداعى تراگەديا, ادالدىق, ادامگەرشىلىك سياقتى اسىل سەزىمدەر قامتىلسا دا, سپەكتاكل سولعىن شىقتى. دراما ءالسىز بولعان سوڭ, قويىلىم دا شيكىلەۋ شىققان سەكىلدى. باس كەيىپكەرلەردىڭ – ءومىر (باقىت حادجىباەۆ) جانە اينا (اينۇر راحيپوۆا) ويىنى دا ءبىزدى سەندىرە المادى.
ءومىر – مۋزىكانت, جانى نازىك شىعارماشىلىق ادامى. اينا – اۋقاتتى وتباسىنان شىققان ارۋ. ولار ءاۋ باستان-اق اداسىپ قوسىلعان سياقتى. جىگىتتىڭ اناسى سىرقاتتانىپ, قىزدىڭ اعاسى كومەكتەسكەن سوڭ العاشقىسى ەكىنشىسىنىڭ جولىنا ءوز ءومىرىن قۇربان ەتكەن ءتارىزدى. العاشقى ماحابباتى, كەيىن دارىگەر بولىپ جولىعاتىن سانامەن (التىناي نۇربەك) سانالى تۇردە كەتىسكەن.
جاستارى ۇلعايعان كەيىپكەرلەرگە قاراعاندا بوزبالا ءومىردى سومداعان شىڭعىس جاقىپباي جانە بويجەتكەن سانانى ويناعان قالامقاس مەلىسوۆا رولدەرىن جاقسى الىپ شىقتى. سپەكتاكلدە ەكەۋى العاش كەزدەسكەن شاقتاعى كورىنىستەردەن عانا اسەر الدىق. بىراق ونىڭ دا كەيبىر تۇستارى ءبيى كوپ ءۇندى فيلمدەرىنە, نۇرقانات جاقىپباي قويعان تاعى ءبىر سپەكتاكل «سۇلۋ مەن سۋرەتشى» قويىلىمىنا ۇقساپ كەتتى.
ادام اتا مەن حاۋا انا تۋرالى اڭىزدا الما جەمىسى سيمۆولدىق مانگە يە. رەجيسسەر ەكى قويىلىمىندا دا وسىنى قولداندى. «ومىردە» ەگەر باس كەيىپكەر سانانى تاڭداعاندا كىندىگىنەن ۇرپاق ءورىپ, وسىنشاما تراگەدياعا ۇشىراماس ەدى دەگەن تۇسپالدى اڭعاردىق.
قورىتا ايتقاندا, سپەكتاكل قوزعايتىن تاقىرىبى جاعىنان ۇتىپ تۇر. ال باس كەيىپكەرلەردى سومدايتىن اكتەرلەردىڭ ويىنى كوڭىلدەن شىعا قويمايدى. وقيعانىڭ ءوربۋىن دە شيراتىپ, درامانى تولىقتىرۋ كەرەك. بالكىم, دايىندىققا از ۋاقىت ءبولىنىپ, اكتەرلەر رولدەرىنە كىرە الماعان بولار. وسىنداي پسيحولوگيالىق تۇرعىدان اۋىر قويىلىم ۇلكەن دايىندىقتى قاجەت ەتەدى. ءبىزدىڭ تۇسىنگەنىمىز, سپەكتاكلدىڭ قايتا قارايتىن تۇستارى بارشىلىق سەكىلدى.
