تاياۋدا ەلوردادا «قيىرداعى قانداستار» اتتى دەرەكتى ءفيلمنىڭ تانىستىرىلىمى بولدى.
بۇل ايتۋلى جوبا ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا قولعا الىنعان. بۇگىنگە دەيىن وسى ماقساتتا ءبىراز ءىس اتقارىلدى. جوبانى قولعا العان توپ 30 مىڭ شاقىرىم جول ءجۇرىپ, رەسەيدىڭ استراحان, موڭعوليانىڭ ۇلان-باتىر قالاسى, وزبەكستانداعى كەنيمەح اۋدانى جانە تاجىكستاننىڭ حۋدجاند شاھارى سەكىلدى ەلدى مەكەندەردە بولىپ, تاريحي ورىنداردى كورىپ, سول جەردە عۇمىر كەشىپ جاتقان قازاقتاردىڭ ءومىرى مەن تۇرمىسىن تۇسىرگەن.
وسى جولعى ءفيلمنىڭ كورسەتىلىمى موڭعوليا قازاقتارىنا ارنالدى. دالىرەك ايتقاندا, ۇلان-باتىر قالاسى مەن وعان جاقىن ورنالاسقان نالاي حان اۋىلىنداعى اعايىنداردىڭ تىرشىلىگى باياندالعان. بۇگىندە نالاي حان اۋىلىندا 800-دەن استام قازاق وتباسى تۇرادى. ولاردىڭ ءبارى دە ۇلتىمىزدىڭ بايىرعى ءداستۇرىن سول قالپىندا ساقتاعان. ءتىلدىڭ دە, ءدىلدىڭ دە, ءدىننىڭ دە قايماعى بۇزىلماعان. بۇل جەردە كومىر شىعاراتىن شاحتا بار. ول وتكەن عاسىردىڭ وتىزىنشى جىلدارى قازاقتاردىڭ كۇشىمەن اشىلعان. سودان بەرى كەنىشتە جەمىستى ەڭبەك ەتكەن ون قازاق ازاماتى ەڭبەك ەرى اتاعىن العان.
سونداي-اق, دەرەكتى تۋىندىدان ۇلان-باتىر قالاسىندا عىلىم مەن ونەردىڭ بيىگىنە شىعىپ, جالپاق جۇرتقا ۇلتىمىزدىڭ ابىرويىن اسىرعان تۇلعالاردىڭ ءومىر جولدارى, الەمنىڭ ماڭدايالدى وقۋ ورىندارىندا ءبىلىم الىپ, عىلىمنىڭ دامۋىنا قوماقتى ۇلەس قوسقان جاس عالىمدارى تۋرالى جانە ءوز بيزنەسىمەن شارۋاسىن دوڭگەلەتىپ وتىرعان ازاماتتار جايىندا كەڭىرەك ماعلۇمات الۋعا بولادى. الداعى تاڭدا قالعان سەريالار رەت-رەتىمەن جۇرتشىلىق نازارىنا ۇسىنىلماق.
ءفيلمنىڭ تانىستىرىلىمىنا قر پارلامەنت دەپۋتاتتارى مەن زيالى قاۋىم وكىلدەرى قاتىسىپ, كورەرمەنگە جول تارتقان تۋىندى تۋرالى ساليقالى ءسوز قوزعاپ, ريزاشىلىقتارىن ءبىلدىردى.
ازامات ەسەنجول
