تاياۋدا بايلانىس جانە اقپارات كۇنى قارساڭىندا «نۇر وتان» پارتياسىنىڭ داستۇرگە اينالعان «نۇر سۇڭقار» بايقاۋىندا «ەگەمەن قازاقستان» گازەتىنىڭ ءبولىم مەڭگەرۋشىسى, بەلگىلى جۋرناليست تالعات باتىرحان «ءسوز شەبەرى» اتالىمىندا توپ جارىپ, جەڭىمپاز اتاندى. ارىپتەس اعامىزدى ءبىز دە جۇلدەسىمەن قۇتتىقتاي وتىرىپ, ول جايىندا ءبىر ۇزىك ىزگى لەبىزىمىزدى بىلدىرگىمىز كەلدى.
اقمولا استاناعا اينالعاننان كەيىن قالالىق گازەت ءبىر كۇندە رەسپۋبليكالىق باسىلىمعا اينالىپ شىعا كەلدى. جان-جاقتان قالامى جۇردەك جۋرناليستەر جينالدى. ءبارى دە سوقتالداي ازاماتتار. سول كەزدە تالدىقورعاننان كەلگەن تالعات باتىرحان اعامەن تانىستىم. جاڭادان جاساقتالعان رەداكتسياداعى باس رەداكتوردىڭ ورىنباسارى. باستىق دەپ ويلامايسىز. اۋىلدا جۇرگەندە اۋداندىق گازەت رەداكتورى ورىنباسارىنىڭ ەسىگىن قاعىپ كىرەتىنبىز. تالعات اعانىڭ بويىنان ونداي مەنمەندىك بايقالمايدى. ەركىن. مارقۇم سەيداحمەت بەردىقۇلوۆ اعامىز سەكىلدى كيىنەدى. تورعايدىڭ تاريحىنا جەتىك. ءبىزدىڭ ەلدەن شىققان قالامگەرلەردى جاتقا بىلەدى. قۇددى سول جەردە وسكەن ادام سەكىلدى. ءبىر كەزدە: «اقان نۇرمانوۆ ءبىزدىڭ اقسۋدا تۋعان عوي» دەدى. راس ايتسام, مەن ونى بىلمەۋشى ەدىم. ءۇنسىز قالدىم. سالماقتى, سابىرلى. اجەم ايتاتىن ماڭدايى كەلىستى ازامات. ادامدى باۋىرىنا تارتىپ سويلەيدى. جاستارعا ەرەكشە قامقور. قازىر قاراسام, تالعات اعا سول شاقتا بۇگىنگى مەنىڭ جاسىمدا ەكەن. ماعان تاۋداي كورىندى. باسىلىمعا دا كوردى-باردى تىزبەلەپ, توپەلەي بەرمەيدى. وندىققا ءدال تيگىزەتىن مەرگەندەي دامدەپ, ادەمىلەپ جازادى.
ءار ءسوز شەبەرىنىڭ ءوز جولى بار. تالعات باتىرحان دا كوركەمدىك الەمى قالىپتاسقان جۋرناليست. ول كىسى ەلوردالىق باسىلىمدا 13 جىل تابان اۋدارماي ەڭبەك ەتتى, سارا جولىن قالدىردى. ءبىز وسى ماقالانى جازاردا ونىڭ «كوڭىل كوكجيەگى» دەگەن پۋبليتسيستيكالىق كىتابىن تاعى ءبىر ءسۇزىپ شىقتىق. سول كەزدە بايقاعانىمىز, جۋرناليست جۇرەگى قالاعان تاقىرىپقا كەلگەندە قامشى سالدىرمايدى. اسىرەسە, شەتتە جۇرگەن ايگىلى قانداستارىمىز جايىندا توگىلدىرىپ جازادى. كەزىندە اعامىزدىڭ «پوليار اكادەمياسىنىڭ رەكتورى» دەگەن ەسسەسى وقىرماندى ءدۇر سىلكىندىرگەن ەدى. كەشە عانا باس باسىلىمدا جارىق كورگەن «رەسەي
باتىرى» اتاعىن العان قايسار قازاق سەرىك سۇلتانعابيەۆپەن سىر-سۇحباتى دا كوپتىڭ كوڭىلىنەن شىقتى. بەلگىلى عالىم باۋىرجان ومارۇلى دوسى تۋرالى جازعان «11-ءشى قالامۇش»
ەسسەسىندە تالعات اعامىزدى قيىرداعى قازاقتاردىڭ قامقورشىسى دەپ ايتىپتى.كورنەكتى قالامگەر قاليحان ىسقاقتىڭ «مەنىڭ اعالارىم» دەگەن تاماشا پوۆەسى بار ەدى. مەنىڭ اعالارىم!.. قانداي جىپ-جىلى ءسوز. جۇرەكتى تەبىرەنتىپ جىبەرەدى. انادان بىرگە تۋماساڭىز دا, رۋحاني جاعىنان رۋحتاس, ۇندەس, الدىندا اعاڭ بولعانعا نە جەتسىن! تالعات باتىرحان – مەنىڭ سونداي اعام!
ازامات ەسەنجول
