23 اقپان كۇنى ءبىرىنشى شاقىرىلىمداعى استانا قالاسى قوعامدىق كەڭەسىنىڭ وكىلەتتىگى اياقتالادى. قازىرگى تاڭدا «قوعامدىق كەڭەستەر تۋرالى» ەلىمىزدىڭ زاڭىنا سايكەس قالالىق ءماسليحاتتىڭ جۇمىس توبى كەڭەستىڭ جاڭا قۇرامىن جاساقتاۋ جۇمىستارىن جۇرگىزىپ جاتىر. ۇمىتكەرلەردەن قۇجاتتاردى قابىلداۋ 19 اقپانعا دەيىن جالعاسادى. قوعامدىق كەڭەس مۇشەلەرىنىڭ باسىم كوپشىلىگى ازاماتتىق قوعام جانە قالا تۇرعىندارى اراسىنان تاڭدالۋى كەرەك. جەرگىلىكتى بيلىك وكىلدەرى 30 پايىزدان اسپاۋى ءتيىس.
25 ادامنان جاساقتالعان ءبىرىنشى شاقىرىلىمداعى قالالىق قوعامدىق كەڭەس ءوز قىزمەتىن اتقارۋ مەرزىمى كەزىندە 58 وتىرىس, 4 رەت قوعامدىق تىڭداۋ وتكىزدى. كەڭەس قۇرامىندا الەۋمەتتىك جانە ەكونوميكالىق ماسەلەلەردى قاراعان ەكى كوميسسيا جۇمىس ىستەدى. بۇل تۋرالى بايانداعان كەڭەس توراعاسى سانسىزباي ەسىلوۆ ۇيىمنىڭ ءۇش جىلدىق جۇمىسىنىڭ قورىتىندىلارىنا توقتالدى.
«كەڭەس وتىرىستارىندا جالپى العاندا ءنورماتيۆتى-قۇقىقتىق اكتىلەردىڭ 292 جوباسى قارالدى. وسى قۇجاتتار قالا تۇرعىندارىنا, ولاردىڭ تىنىس-تىرشىلىگىنە قاتىستى بولدى. سونىڭ ىشىندە دەنساۋلىق ساقتاۋ, ءبىلىم, ەنەرگەتيكا, قۇرىلىس, ساۋلەت, اۋىل شارۋاشىلىعى سالالارىنداعى 200-گە تارتا جوبانى ماقۇلدادىق. وتكەن جىلى قالادا قوعامدىق كولىكتەگى جولاقى جۇيەسى ەلەكتروندى ۇلگىگە كوشىرىلدى. ونىڭ ءساتتى جۇزەگە اسىرىلۋىنا قوعامدىق كەڭەس ءوز ۇلەسىن قوستى. كەڭەس مۇشەلەرى اۆتوبۋستارعا ءمىنىپ, ادامدارمەن سويلەستى, جاڭا جۇيە تۋرالى ولاردىڭ پىكىرلەرىن ءبىلدى. سول ارقىلى جولاۋشىلاردىڭ پىكىرىن اكىمدىك قۇرىلىمدارىنا جەتكىزدى» دەدى س.ەسىلوۆ.
ونىڭ ايتۋىنشا, اقىلى تۇراقتار جۇيەسىن ەنگىزۋ كەزىندە دە كەڭەستىڭ وتىرىستارىندا ايتىلعان ەسكەرتۋلەر مەن ۇسىنىستاردان كەيىن ءتيىستى قۇجاتقا كوپتەگەن وزگەرىستەر مەن تۇزەتۋلەر ەنگىزىلدى. جەڭىلدىكپەن بەرىلەتىن ءدارى-دارمەكتىڭ تۇيتكىلى تۋىنداعاندا دا ماسەلەنىڭ وڭ شەشىلۋىنە كەڭەس ىقپالىن تيگىزدى. سول سياقتى باسقا دا ماڭىزدى ماسەلەلەردىڭ تياناقتالۋىنا كەڭەس ارالاستى.
بۇعان قوسا, ۇيىم تۇرعىنداردىڭ وتىنىشتەرىن قابىلداپ, جۇرتشىلىقپەن كەزدەستى. س.ەسىلوۆ كەڭەس مۇشەلەرىنە اتقارعان جۇمىسىنا, بىرقاتار بۇقارالىق اقپارات قۇرالدارىنا مەكەمە جۇمىسى تۋرالى اقپاراتتى حالىققا جۇيەلى تۇردە جەتكىزىپ وتىرعانىنا العىسىن ايتىپ, كەڭەستىڭ جاڭا قۇرامىنا ساتتىلىك تىلەدى. جۋرناليستەردىڭ سۇراقتارىنا جاۋاپ بەردى.
