ەلوردادا «نۇر-سۇلتان قالاسىنىڭ قوعامدىق كەڭەسى: ازاماتتىق قوعاممەن بايلانىس قۇرالدارىن ورىستەتۋ» تاقىرىبىندا دوڭگەلەك ۇستەل ءماجىلىسى ءوتتى.
قوعامدىق كەڭەس مۇشەلەرى, قالالىق ءماسليحات دەپۋتاتتارى جانە قالا اكىمدىگىنىڭ وكىلدەرى قاتىسقان وتىرىستا 2019 جىلدىڭ ناۋرىزىنان 2020 جىلدىڭ قىركۇيەگىنە دەيىنگى قوعامدىق كەڭەس قىزمەتى تالقىلاندى.
قوعامدىق كەڭەس مۇشەسى التىناي نۇركەەۆانىڭ ايتۋىنشا, زەرتتەۋ كەزىندە كەڭەستىڭ رەسمي رەسۋرستارىنداعى كونتەنت-تالداۋى, وتىرىستاردىڭ حاتتامالارى, ۇسىنىستارى, ساراپشىلار ساۋالناماسى پايدالانىلعان.
– ءبىز قىزمەتتىڭ اسەرلىلىگىنىڭ باعاسىن تەكسەردىك. ول تەك قوعامدىق كەڭەس مۇشەلەرى ءۇشىن عانا ەمەس, ءبىزدىڭ قايدا باعىت العانىمىزدى كورۋ ءۇشىن, ولقىلىقتاردىڭ ورنىن تولتىرۋ ءۇشىن الدىمەن قوعامعا قاجەت. اقپاراتتى جيناۋ جۇمىسى جۇرگىزىلدى. وندا ماتەريالدار, قۇجاتتار, وتىرىستارداعى حاتتامالار, ۇسىنىستار قولدانىلدى. وسىنىڭ ارقاسىندا بىزگە جۇمىستى جۇيەلەندىرۋگە, حاتتامالار مۇراعاتىن جاساۋعا, ولاردى تسيفرلاندىرۋعا مۇمكىندىك تۋدى. بۇگىندە سونىڭ ءبارىن كوپشىلىككە قولجەتىمدى ەتۋدى جوسپارلاپ وتىرمىز, – دەدى ا.نۇركەەۆا.
نۇر-سۇلتان قالاسىنىڭ قوعامدىق كەڭەسى 2016 جىلدان بەرى جۇمىس ىستەپ كەلەدى. بۇگىندە كەڭەس قۇرامىندا 21 ادام بار. سونىمەن قاتار زەرتتەۋ كەزىندە كەڭەستىڭ دەموگرافيالىق-گەندەرلىك قۇرامى ماسەلەسىنە دە تالداۋ جاسالدى.
– وكىنىشكە قاراي, قوعامدىق كەڭەستە 20-دان 30-عا دەيىنگى جاستار جوق دەگەن سىن ايتىلادى. ءبىزدىڭ قاتارىمىزدىڭ كوبى – ەلۋ جاستان اسقان ادامدار. نەگىزگى سانات – 36-40 جاس. ەگەر گەندەرلىك ماسەلەنى ايتار بولساق, قوعامدىق كەڭەس مۇشەلەرىنىڭ 19 پايىزىن ايەلدەر قۇرايدى, – دەدى ا.نۇركەەۆا.
قوعامدىق كەڭەس 2019 جىلدىڭ ناۋرىز ايىنان باستاپ 2020 جىلدىڭ قىركۇيەگىنە دەيىن 25 وتىرىس وتكىزىپ, 102 ماسەلەنى قاراعان.
وتىرىس بارىسىندا قوعامدىق كەڭەس قىزمەتىنىڭ تيىمدىلىگى قارالىپ, كەڭەس جۇمىسىنىڭ الداعى دامۋى جايلى ۇسىنىستار ايتىلدى.
