نۇر-سۇلتان قالاسىنداعى «جانۇيا» وتباسى ينستيتۋتىن قولداۋ ورتالىعىندا ەرەكشە قاجەتتىلىكتەرى بار بالالاردى تاربيەلەپ وتىرعان انالارعا ارنالعان «بيۋدجەتتىك ادۆوكاتسيا» تاقىرىبىندا پراكتيكالىق ترەنينگ ءوتتى.
«رۋحاني جاڭعىرۋ» باعدارلاماسى جانە سپيد-پەن كۇرەس كۇنى اياسىندا وتكىزىلگەن ءىس-شارانى «باقىتتى شاڭىراق» قوعامدىق قورى ۇيىمداستىردى. بۇل ۇيىم ەرەكشە قاجەتتىلىگى بار نەمەسە مۇمكىندىگى شەكتەۋلى بالالاردى تاربيەلەپ وتىرعان وتباسىلارعا قولداۋ كورسەتۋمەن اينالىسادى.
«Integrity Astana» كوممەرتسيالىق ەمەس ۇيىمىنىڭ باسشىسى, ەلوردانىڭ قوعامدىق كەڭەسىنىڭ مۇشەسى جانات نۇرعاليەۆ ەرەكشە بالالاردى تاربيەلەپ وتىرعان انالارمەن ادۆوكاتسيالىق قىزمەت سالاسىنداعى ءوز بىلىمدەرىمەن ءبولىستى.
– ءبىز ءۇشىن «بيۋدجەتتىك ادۆوكاتسيا» تاقىرىبى وتە ماڭىزدى. سەبەبى كەيبىر ادۆوكاتتاردىڭ, الەۋمەتتىك جانە دەنساۋلىق ساقتاۋ سالالارىندا كەتكەن قاتەلىكتەرىن كوردىك. بيۋدجەتتەردىڭ قالايشا جانە قاشان دۇرىس پايدالانىلماعانىن بىلەمىز. بيۋدجەتتىك ادۆوكاتسيا – بۇل ناقتى ادۆوكاتسيا سالاسى ەمەس, قارجىلاندىرۋ جانە قارجىنى باقىلاۋ سالاسى. سوندىقتان ءبىز سپيكەر رەتىندە جانات نۇرعاليەۆتى تاڭدادىق. ول – ەكونوميست, وسى تاقىرىپتاعى كوپتەگەن جاريالانىمداردىڭ اۆتورى. بۇگىنگى تىڭداۋشىلار – وسى جولدان وتكەن مۇگەدەك بالالاردى تاربيەلەپ وتىرعان انالار, – دەپ ءتۇسىندىردى «باقىتتى شاڭىراق» قورىنىڭ ەرىكتىسى سالتانات ەراليەۆا.
«بيۋدجەتتىك ادۆوكاتسيا» — بۇل ماقساتتى اۋديتوريا ءۇشىن وتكىزىلگەن ترەنينگتەر سەرياسىنداعى سەگىزىنشى جانە سوڭعى سەمينار.
بۇعان دەيىن قور «رەسۋرستاردىڭ جاي-كۇيى», «ايەلدەر قۇقىعى», «ەموتسيونالدى ينتەللەكت», «وتباسىلىق قاتىناستار», «ۆولونتەرلىك» جانە «ازاماتتىق قاتىسۋ» تاقىرىپتارىندا سەمينارلار وتكىزگەن بولاتىن.
