قالادا قازىر اۆتوكولىك جۇرگىزۋشىلەرى كوپ رەتتە ايالداما الاڭىنا توقتاي سالادى نەمەسە كولىكتەرىن قالدىرىپ كەتەدى. وسىلايشا قوعامدىق كولىكتىڭ قوزعالىسىنا كەدەرگى كەلتىرەدى. بۇل ءوز كەزەگىندە ءار اۆتوبۋستىڭ ايالدامالارعا ۋاقىتىنان كەش كەلۋىنە, قوعامدىق كولىكتەردىڭ كەستەگە ساي قوزعالىسىنىڭ بۇزىلۋىنا سەبەپ بولادى.
كولىكتىك باقىلاۋ دەپارتامەنتىنىڭ قىزمەتكەرلەرى كۇن سايىن ايالداما الاڭدارىنا كولىك قۇرالدارىنىڭ توقتاۋى مەن تۇراقتاۋى بويىنشا قۇقىق بۇزۋشىلىقتاردى انىقتاۋ, اۆتوبۋستاردىڭ قاۋىپسىز كىرۋى مەن شىعۋىنا كەدەرگىنى بولدىرماۋ ءۇشىن جۇمىس جۇرگىزەدى. وسى قۇقىق بۇزۋشىلىق ءۇشىن قر اقبتك-ءنىڭ 597-بابىنىڭ 3-بولىگىنە سايكەس اكىمشىلىك جاۋاپكەرشىلىك جانە 10 اەك مولشەرىندە ايىپپۇل قاراستىرىلعان.
– جىل باسىنان بەرى كولىكتەگى باقىلاۋ دەپارتامەنتىنىڭ قىزمەتكەرلەرى جيناعان ماتەريالدارعا سايكەس جالپى سوماسى 15 ملن تەڭگەدەن اساتىن 983 زاڭ بۇزۋشىلىق بويىنشا اكىمشىلىك جاۋاپكەرشىلىك شارالارى قابىلداندى. اۆتوكولىك جۇرگىزۋشىلەرىن جول ءجۇرۋ ەرەجەلەرىن ساقتاۋعا جانە جول قوزعالىسىنىڭ باسقا قاتىسۋشىلارىن قۇرمەتتەۋگە شاقىرامىز, – دەيدى CTS كومپانياسىنىڭ قوعاممەن بايلانىس دەپارتامەنتىنىڭ ديرەكتورى نۇرسۇلتان يبراەۆ.
دەپارتامەنت ديرەكتورىنىڭ ايتۋىنشا, بۇگىنگى تاڭدا قالادا 1400 ايالداما بار. سونىڭ ىشىندە اسىرەسە, «Asia Park», «MEGA Silk Way» ساۋدا ورتالىقتارى مەن «كوركەم», «ارمان قالا», «تۇرسىن استانا» تۇرعىن ءۇي كەشەندەرى, №4 ەمحانا جانە «استانالىق», «ايماق-تاۋ» بازارلارى ماڭايىنداعى ايالدامالاردا وسىنداي زاڭ بۇزۋشىلىقتار ءجيى ورىن الادى.
