اتا-انالار مەن ۇستازدار استاناداعى عالي ورمانوۆ اتىنداعى №7 مەكتەپ-گيمنازياسى ماڭايىن جارىقتاندىرۋدى, ال №8 ورتا مەكتەپتىڭ ماڭىنا قاۋىپسىزدىك ماقساتىندا باعدارشام ورناتۋدى سۇراپ وتىر. كەشە بۇل ماسەلەلەر قالالىق ءماسليحاتتىڭ زاڭدىلىق, قۇقىقتىق ءتارتىپ جانە قوعاممەن جۇمىس ماسەلەلەرى جونىندەگى تۇراقتى كوميسسيانىڭ وتىرىسىندا كوتەرىلدى.
جيىندا استانا قالاسى ءىىد جەرگىلىكتى پوليتسيا قىزمەتىنىڭ باسشىسى باقىتجان مالىباەۆ ەلوردادا قىلمىس جانە سىبايلاس جەمقورلىققا قارسى قۇقىق قورعاۋ ورگاندارى قابىلداعان شارالار جونىندە باياندادى. مەكتەپتەر جونىندەگى ماسەلەگە قاتىستى ول: «تاڭەرتەڭ №8 ورتا مەكتەپتىڭ جانىندا پوليتسيانىڭ جول رەتتەۋشى قىزمەتكەرىنىڭ تۇراتىنىن كۇندە كورەمىن. باعدارشام قويۋ جايىنان دا حاباردارمىز. بۇل جاعى قارجىلاندىرۋعا تىرەلىپ وتىر. ال №7 مەكتەپ-گيمنازياسى ماسەلەسىن اۋدان اكىمدىگىمەن بىرلەسىپ قارايمىز. قورىتىندىسى تۋرالى بىلەتىن بولاسىزدار» دەپ جاۋاپ بەردى.
سونداي-اق, بايانداماشى كادر تاپشىلىعى ماسەلەسىن قوزعادى. ونىڭ ايتۋىنشا, جەرگىلىكتى پوليتسيا قىزمەتىندە كادر تۇراقتامايدى. جالاقىنىڭ ازدىعىنان, باسپانانىڭ جوقتىعىنان قىزمەتكەرلەردىڭ كوبى باسقا جۇمىسقا اۋىسىپ جاتىر. بۇل قىزمەتكە ادامدار كوبىنەسە باسقا ايماقتاردان كەلىپ ورنالاسادى ەكەن. «قىزمەتكەرلەرىمىزدىڭ 15 پايىزى عانا استانانىڭ نەمەسە ونىمەن كورشىلەس ورنالاسقان اقمولا وبلىسىنىڭ تۋمالارى. پوليتسياعا قىزمەتكە نەگىزىنەن ەلورداعا الىس وڭىرلەردەن كەلەتىندەر ورنالاسۋدا. ارينە, باسپانا ماسەلەسى تۋىندايدى. قىزمەتكەرلەرىمىزگە 10 پاتەر بەرىلگەن بولاتىن. الايدا ول ازدىق ەتىپ تۇر. 60-70 مىڭ تەڭگە جالاقىعا پاتەر جالداۋ قيىن» دەگەن ول اتالعان ماسەلەلەردى شەشىپ بەرۋىن سۇرادى.
سونداي-اق, وتىرىستا استانا قالاسىنىڭ اۋماعىندا قۇرىلىس سالۋ ماسەلەلەرىندەگى تۇيتكىلدى قالالىق پروكۋراتۋرا وكىلى جەتكىزدى. كوتەرىلگەن ماسەلەلەردىڭ قاتارىندا مەملەكەت مۇقتاجى ءۇشىن جەر تەلىمدەرىن نەمەسە وزگە مۇلىكتەردى ساتىپ الۋ شارتتاردىڭ جوبالارىن كەلىسۋ بولدى. بۇعان قاتىستى جاعدايمەن استانا قالاسىنىڭ تۇرعىن ءۇي باسقارماسىنىڭ باسشىسى رۋسلان احمەتوۆ پەن قالالىق اۆتوموبيل جولدارى باسقارماسىنىڭ باسشىسى اسحات قاراعويشين تانىستىردى.
امانعالي قالجانوۆ
