قوسىمشا قارجى ءبولىندى
كەشە استانا قالالىق ءماسليحاتىنىڭ كەزەكتەن تىس سەسسياسىندا ەلوردانىڭ 2018-2020 جىلدارعا ارنالعان بيۋدجەتى ناقتىلاندى. سونداي-اق, ءماسليحات دەپۋتاتتارى 2016-2020 جىلداردى قامتىعان قالانى دامىتۋ جوسپارىنا ەنگىزىلگەن وزگەرىستەردى ماقۇلدادى. كۇن تارتىبىندە باسقا دا بىرقاتار ماسەلە قارالدى. سەسسياعا استانا اكىمىنىڭ ورىنباسارى ەرمەك امانشاەۆ قاتىستى.
نەگىزگى باياندامانى جاساعان قالالىق ستراتەگيالىق جانە بيۋدجەتتىك جوسپارلاۋ باسقارماسىنىڭ باسشىسى راسۋل ورازعۇلوۆ باسقارمالارعا ءبولىنگەن قوسىمشا قارجى كولەمىن, بۇل قارجى باعىتتالاتىن جۇمىستاردى اتاپ ءوتتى.
ونىڭ ايتۋىنشا, قالانىڭ كىرىس بولىگى 2 ملرد 659 ملن تەڭگەگە ۇلعايدى. بۇعان قوسا, بيۋدجەتتى تولىق ءارى ناتيجەلى يگەرۋ ماقساتىندا بەلگىلى ءبىر بيۋدجەتتىك باعدارلامالارعا بولىنگەن قارجى قايتا قارالىپ, 10,1 ملرد تەڭگە قالا دامۋىنداعى ماڭىزدى باعىتتارعا جۇمسالادى.
ءبىلىم باسقارماسىنا 1 ملرد 370,9 ملن تەڭگە كولەمىندە قوسىمشا قارجى بولىنەدى. بۇل قارجىنىڭ ەڭ قوماقتى بولىگى مۇعالىمدەردىڭ جالاقىسىن وسىرۋگە باعىتتالادى. سونداي-اق, 1-4-سىنىپ وقۋشىلارىن تاماقتاندىرۋعا قوسىمشا قارجى قاراستىرىلعان. ءبولىنىپ وتىرعان قارجى بالالار ءۇيى عيماراتىن جوندەۋگە, تەحنيكا الۋعا, مەكتەپالدى دايارلىققا جۇمسالماق.
قوعامدىق دەنساۋلىق ساقتاۋ باسقارماسىنا بالالاردىڭ جۇقپالى اۋرۋحاناسىنىڭ اۆتونومدى جىلىتۋ جۇيەسىنە, مۇمكىندىگى شەكتەۋلى بالالارعا ارنالعان كولىكتەردى الۋعا 97,6 ملن تەڭگە ءبولىنىپ وتىر.
قالادا مۇگەدەكتەر سانى 220 ادامعا كوبەيدى. ولاردى شيپاجايلارعا جىبەرۋ, باسپاناعا ءزارۋ جاندارعا تۇرعىن ءۇي سەرتيفيكاتىن تاپسىرۋ, كومەككە مۇقتاج ادامدارعا جاردەم بەرۋ, ت.ب. وسى سياقتى جۇمىستاردى اتقارۋعا جۇمىسپەن قامتۋ جانە الەۋمەتتىك قورعاۋ باسقارماسىنا 369,7 ملن ءبولۋ قاراستىرىلدى.
وزگە باسقارمالارعا, اۋدان اكىمدىكتەرىنە نە ءۇشىن قوسىمشا قارجى بولىنگەنىن بايانداعان ر.ورازعۇلوۆ ەلىمىزدىڭ 2025 جىلعا دەيىنگى ستراتەگيالىق دامۋ جوسپارىن ىسكە اسىرۋعا باعىتتالعان ستراتەگيالىق كارتا ازىرلەنگەنىن, سوعان سايكەس 2016-2020 جىلدارعا ارنالعان استانانى دامىتۋ جوسپارىنا وزگەرىستەردى ەنگىزۋ قاجەتتىلىگى تۋىنداعانىن ايتتى. جالپى العاندا, ەلوردانى دامىتۋ جوسپارىنداعى 125 ينديكاتوردىڭ 34-ىنە وزگەرىس ەنگىزىلگەنىن, 4 ينديكاتور وڭتايلاندىرۋ اياسىندا جويىلعانىن جەتكىزدى.
جاقىندا مۇعالىمدەرگە, ءدارىگەرلەرگە, پوليتسيا قىزمەتكەرلەرىنە باسپانا الۋ ءۇشىن 1 ملن تەڭگە كولەمىندە الەۋمەتتىك كومەك بەرۋ ۇيعارىلدى. قۇرىلىس جانە تۇرعىن ءۇي ساياساتى باسقارماسىنىڭ باسشىسى رۋسلان احمەتوۆ ءتيىستى ەرەجەنى بەكىتۋدى سۇرادى. سونداي-اق, ول م.جۇماباەۆ داڭعىلىن ا.بايتۇرسىنوۆ كوشەسىنەن باستاپ №44 كوشەگە دەيىن سالۋعا ءجانە وڭتۇستىك-باتىس اينالما جولىنىڭ قۇرىلىسىن جۇرگىزۋگە جالپى 0,0590 گا قۇرايتىن ەكى جەر تەلىمىن مەملەكەت مۇقتاجدىعى ءۇشىن ساتىپ الۋعا 134 ملن تەڭگە قاراستىرىلعانىن ايتتى. دەپۋتاتتار بۇل شەشىمدەردى ءبىراۋىزدان ماقۇلدادى.
ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى باقتىباي تايتاليەۆ پاركينگتەردىڭ سالىقتىق بازالىق ستاۆكالارى تۋرالى باياندادى.