10 جەلتوقساندا قر پارلامەنتى ءماجىلىسىنىڭ جانە جەرگىلىكتى ءماسليحاتتاردىڭ دەپۋتاتتىعىنا كانديداتتاردىڭ پارتيالىق ءتىزىم ۇسىنعان پارتيالاردىڭ ۇگىت جۇمىستارى باستالدى. وسىعان وراي كەشە Nur Otan پارتياسى «قتج» ۇك» اق بويىنشا باستاۋىش پارتيا ۇيىمىنىڭ مۇشەلەرى نۇر-سۇلتان قالالىق ءماسليحاتىنىڭ دەپۋتاتتىعىنا ۇمىتكەرلەرىمەن كەزدەستى.
سول ۇمىتكەرلەر قاتارىنداعى ۇلتتىق كومپانيانىڭ باس ينجەنەرى باتىر كوتىرەۆ تىلەۋلەستەرىمەن كەزدەسۋدە پارتيانىڭ نۇر-سۇلتان قالاسى بويىنشا سايلاۋالدى باعدارلاماسىمەن جانە سول باعدارلاماعا اتالعان باستاۋىش ۇيىمى اتىنان ۇسىنىلىپ, قابىلدانعان تارماقتار تۋرالى ءسوز ەتتى. جيىنعا پارتيانىڭ ەسىل اۋدانى بويىنشا فيليالىنىڭ وكىلى مارحات قاسىموۆ تا قاتىستى. ونىڭ ايتۋىنشا, باس پارتيا اتىنان ەسىل اۋدانى بويىنشا الداعى سايلاۋعا 61 ۇمىتكەر قاتىسۋدا. ول باتىر كوتىرەۆكە پارتيا مۇشەلەرى اتىنان قالالىق پارتيا شتابىنىڭ مۇشەلىگىنە وتكەندىگى تۋرالى كۋالىگىن تابىس ەتتى.
– سىزدەردىڭ قولداۋلارىڭىزدىڭ ارقاسىندا مەن پرايمەريز ناۋقانى كەزىندە سايلاۋدىڭ ءبىرىنشى كەزەڭىنەن ءوتتىم. ءالى الدا بىرنەشە كەزەڭ تۇر. الدىمەن داۋىس بەرۋ كەزەڭىنەن, سوسىن سايلاۋ كۇنى تاڭداۋدان ءوتۋ كەرەك. ارنايى كەستە بويىنشا بارلىعى 5 كەزدەسۋ وتكىزەمىز. ال قاڭتارداعى سايلاۋعا ءبارىمىز قاتىسۋىمىز كەرەك. پارتيانىڭ ەلوردا بويىنشا سايلاۋالدى باعدارلاماسىمەن ءبارى تانىس دەپ ويلايمىن. ونىڭ ىشىندە قولجەتىمدى باسپانا, ۇلەسكەرلىك قۇرىلىس, الەۋمەتتىك ماسەلەلەر, ءبىلىم مەن دەنساۋلىق سالاسىن دامىتۋ, شەتكى ايماقتار جايى, كەڭىستىكتى ۇيىمداستىرۋ, گازداندىرۋ, قوعامدىق كولىك جانە جول, كارىز جانە تازارتۋ جابدىقتارى, قوعامدىق قاۋىپسىزدىك پەن شاعىن جانە ورتا بيزنەس ماسەلەلەرى بار. باعدارلامادا قامتىلعان وسى 10 سىن-قاتەردىڭ ارقايسىسىنا ەرەكشە ءمان بەرىلگەن, – دەدى باتىر كوتىرەۆ. ول سونىمەن قاتار پارتيا اتىنان بۇگىنگە دەيىن قول جەتكىزگەن قازاقستاننىڭ باستى 7 جەتىستىگى مەن ۇيىمنىڭ ماقساتتارى جانە جوسپارلارى تۋرالى باياندادى. پارتيا وكىلى ەلوردا تۇرعىندارىن كەز كەلگەن ماسەلە بويىنشا تاۋەلسىزدىك كوشەسى, 3 مەكەنجايداعى ۇيىمنىڭ فيليالىندا 11 جەلتوقسان مەن كەلەسى جىلدىڭ 8 قاڭتارىنا دەيىن وسى ۇمىتكەرلەردىڭ ازاماتتاردى قابىلداۋى جۇرگىزىلەتىنىن جەتكىزدى. كىزدى.
