بيىل قازاقستاننىڭ وزبەكستانداعى جىلى ەكەنى بەلگىلى. ەلورداداعى «جاستار» تەاترىندا ەكى ەلدىڭ دوستىعىن ارقاۋ ەتكەن «قۇدالار» كومەدياسىنىڭ پرەمەراسى ءوتتى. تۋىندى اۆتورى – اقىن, دراماتۋرگ, اۋدارماشى ە.ۋاحيتوۆ, قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى ن.جاقىپباي.
بۇدان بۇرىن بۇل سپەكتاكلدى م.اۋەزوۆ اتىنداعى قازاق مەملەكەتتىك اكادەميالىق دراما تەاترى ساحنالاعان ەدى. ەلوردالىق ونەر ۇجىمىنىڭ باسقا ەمەس, ناقتى وسى شىعارمانى تاڭداۋىنىڭ سەبەبىن رەجيسسەردىڭ وزىنەن سۇرادىق.
«قۇدالار» – وتكەن عاسىردىڭ سەكسەنىنشى جىلدارى جاقسى سۇرانىسقا يە بولعان سپەكتاكل. سول كەزدەن باستاپ بۇل شىعارماعا قىزىققان ەدىم. كوپتەن ويلاپ جۇرگەن ويىم بيىل جۇزەگە استى. كورەرمەن باسىن قاتىرماسىن, ەل ءبىر دەمالسىنشى دەگەن ماقساتىم بولدى. الايدا بۇگىنگى كۇننىڭ كوزقاراسى تۇرعىسىنان كەلدىم. باس كەيىپكەردىڭ ءبىرىن – قازاق, ەكىنشىسىن وزبەك ەتىپ ادەيى الدىم. سول كەزدە دوستىق, باۋىرمالدىق سياقتى ادامزاتتىق قۇندىلىقتار ويىمدا تۇردى» دەيدى ن.جاقىپباي.
سپەكتاكلدىڭ شىعارماشىلىق توبىنا وزبەكستان ازاماتتارى دا تارتىلدى. اتاپ ايتقاندا, سۋناتيللو كاريموۆ انار جۇسىپوۆامەن بىرگە بيلەردى قويدى.
قويىلىمعا «كورشىلەر» دەگەن ەكىنشى اتاۋدى دا قويۋعا بولادى. سەبەبى وقيعا سولاردىڭ اراسىندا ءوربيدى. كورىنىستەرگە قاتىسۋشىلار قازاق قاريا ءابدىسالام (ازامات ەسقۇلوۆ) جانە وزبەك شال مومىن (جانداۋلەت باتاي) قىرىق جىل كورشى بولىپ, اقىرى كىشكەنتايىنان بىرگە وسكەن ۇل-قىزدارى ءنادىر (مەيىرعات امانگەلدين) مەن ءدىلناز (ناۋرىز ساباعاتوۆا) ءبىرىن-ءبىرى ۇناتىپ, ەكى جاق قۇداندالاسادى. الايدا ءۇي اراسىن ءبولىپ تۇرعان قابىرعانى بۇزىپ تاستاپ, كۇتپەگەن ولجاعا كەنەلەدى. سوندا تابىلعان ات باسىنداي التىن ەكەۋىن سەرتتەرىنەن بەزدىرىپ, سەرگەلدەڭ كۇيگە تۇسىرەدى. وقيعالار شيەلەنىسى كوپشىلىككە كۇلكى سىيلاپ قانا قويماي, شىعارمانىڭ استارلى اقيقاتى, شىمشىما شىندىعى ارقىلى كورەرمەندى پاراسات بيىگىنە جەتەلەيدى.
وزگە رولدەردى ءادىل احمەتوۆ, داۋرەن سەرعازين, بالجان زياقۇلوۆا, اينۇر راحيپوۆا, شەحنازا قىزىحانوۆا, باقىت حادجىباەۆ سىندى ارتىستەر سومدايدى. جالپى ادەتتەگىدەي سپەكتاكل كەيىپكەرلەرى ەكى اكتەرلىك قۇرامنان جاساقتالعان.
پرەمەراعا وزبەكستاننىڭ قازاقستانداعى ەلشىلىگىنىڭ وكىلدەرى كەلىپ, سپەكتاكلدى ۇناتتى. «جاستار» تەاترىنا وسى قويىلىمدى تاشكەنت قالاسىندا كورسەتۋدى ۇسىندى.
