ءدال بۇگىن قالا مەكتەپتەرىنەن 4978 تۇلەك تۇلەپ ۇشادى. استانالىق تۇلەكتەرمەن ەرەكشە ماقتانۋعا بولادى. سوڭعى ءۇش جىلدا وتكىزىلگەن ءتۇرلى عىلىمي جوبالاردىڭ, حالىقارالىق وليمپيادالار مەن كونكۋرستاردىڭ 49 جەڭىمپازى – بۇگىننىڭ وزىندە وقۋ گرانتتارىنىڭ يەگەرلەرى. ولار – الداعى اۋقىمدى سىناقتان بوساتىلعاندار. مەكتەپ بىتىرۋشىلەردىڭ 4526-سى الداعى ۇبت-عا قاتىسىپ باقتارىن سىنايدى. «التىن بەلگىدەن» ۇمىتكەر 233 تۇلەك تە ءوز بىلىمدەرىن كورسەتۋگە كۇش سالادى. ۇستازدارى 11 جىل بويى ءبىلىم نارىمەن سۋسىنداتقان اياۋلى شاكىرتتەرىمەن قوشتاساتىن ءسات تە – وسى.
اسىلىندە, اكادەميك قانىش ساتباەۆ بۇل كۇندى ءومىردىڭ ۇلكەن جولىنا باستاپ, اسقار شىڭىنا جەتەلەيتىن, قايتالانبايتىن كۇن ەكەنىن بەكەر ايتقان جوق. ويتكەنى بۇل كۇنى قيالدارىن قاناتتارىنا بايلاپ, ارماندارىن ارقالاعان سان مىڭداعان بالا التىن ۇيالارىمەن قوشتاسادى. ولار ءۇشىن سىڭعىرلاعان جەز قوڭىراۋدىڭ ءۇنى سوڭعى رەت سوعىلادى.
بۇل كۇن – ەرەكشە تەبىرەنىس پەن تولعانىسقا تولى كۇن. مەكتەپ اتتى كەمەنىڭ ەسكەگىن ەسىپ كورگەن كەز كەلگەن پەندەنى بەيجاي قالدىرمايتىن ۇلى مەرەكە. بۇل كۇن – قيماستىق پەن قۋانىشى قاتار ورىلگەن جاس تۇلەكتەر ءۇشىن ەڭ ءبىر قىمبات, ەڭ ءبىر ۇمىتىلماس كۇن. ءار شاكىرتىن ايالاپ ءوسىرىپ, ومىرگە توپشىسىن قاتايتىپ ۇشىراتىن ۇستازداردىڭ كۇنى بۇل. ءبىلىم بەرۋگە ۇمتىلعان ۇستازدارىنان جاقسى ءبىلىم الىپ, بولاشاققا وسىلاي جولداما الاتىن شاكىرتتەردىڭ دە كۇنى. بۇل كۇن – ءتۇپسىز ءبىلىم تۇڭعيىعىنا بويلاۋعا اسىققانداردىڭ كۇنى.
بۇگىن – سوڭعى قوڭىراۋ!
گۇلجان راحمان
