«GLB» ءۇي قۇرىلىسى كومبيناتىنىڭ قۋاتى جىلىنا 450 مىڭ م2 تۇرعىن ۇيگە دەيىن ۇلعايدى. بۇل ءۇي قۇرىلىسى كومبيناتىنىڭ ارتىقشىلىعى – ساپاسىنا زيان كەلمەستەن, قۇرىلىس ۋاقىتىن قىسقارتۋعا, شارشى مەتردىڭ وزىندىك قۇنىن ازايتۋعا مۇمكىندىك بەرەدى.
اتالمىش كومبينات قۇرىلىسى ۇزاققا سوزىلعان ۇيلەردىڭ («باعىستان», «التىن شار») پروبلەماسىن شەشۋگە, سول سياقتى الەۋمەتتىك تۇرعىن ءۇي سالۋعا جۇمىلدىرىلعان. زاۋىت قۋاتىن ارتتىرۋ ارقىلى الەۋمەتتىك نىساندار قۇرىلىسىنىڭ قارقىنى كۇشەيىپ, قوسىمشا تۇراقتى جۇمىس ورىندارى قۇرىلادى.
– وسىعان دەيىن ءۇي قۇرىلىسى كومبيناتى نەسيە بەرۋشىلەر مەن كاسىپورىن قىزمەتكەرلەرىنە 600 ملن تەڭگەگە جۋىق قارىز بولعان. مەملەكەت قولداۋىنىڭ ارقاسىندا بۇل قارىز وتەلىپ, كومبينات جۇمىسى قايتا جانداندى. بۇدان بولەك, 2020 جىلدىڭ سوڭىندا ModeX ءۇي قۇرىلىسى كومبيناتىنىڭ جۇمىسى ىسكە قوسىلدى. مەملەكەت باسشىسىنىڭ تاپسىرماسىنا سايكەس, تۇرعىن ءۇي باعىتتارى بويىنشا جۇيەلى جۇمىس ءجۇرىپ جاتىر: جەڭىلدەتىلگەن قولجەتىمدى تۇرعىن ءۇي قۇرىلىسىنىڭ كولەمىن ۇلعايتتىق, «Elorda Jastary» ارنايى تۇرعىن ءۇي باعدارلاماسىن ىسكە قوستىق, تۇرعىن ءۇي باعدارلامالارىنا قاتىسۋشىلار ساناتىن كەڭەيتتىك, تۇرعىن ءۇي سەرتيفيكاتتارىنىڭ سوماسىن 1 ملن تەڭگەدەن 1,5 ملن تەڭگەگە دەيىن ۇلعايتتىق, – دەدى ەلوردا اكىمى التاي كولگىنوۆ.
