ستانسانىڭ تەمىرجول جاعالاي ورنالاسقان ەكى عيماراتى بار. ءبىرى – اكىمشىلىك, ەكىنشىسى – ناعىز ءوندىرىس ماماندارى وتىراتىن ەتس-قوسىنى. وسى قوسىننىڭ ءۇشىنشى قاباتىندا «قوزعالىستىڭ قوجايىنى» – ستانسا كەزەكشىلەرى وتىرادى. ولاردى وزدەرى ستانسانىڭ «مي جۇيەسىنىڭ ورتالىعى» دەپ تە اتايدى. ءومىرىنىڭ 39 جىلىن وسىندا وتكىزىپ, تاپجىلماي ەڭبەك ەتىپ كەلە جاتقان جاقىپبەك نازاروۆتى سول جەردە پۋلت تابلو الدىندا تاپتىق. قاپتاعان قارا تەلەفونداردىڭ بىرىنەن سوڭ بىرىنە جاۋاپ بەرىپ, كەلگەن پويىزدار قوزعالىسىن رەتتەپ, قاۋىرت جۇمىس ۇستىندە وتىر ەكەن.
تاۋلىك بويىنا جالعاساتىن توقتاۋسىز تاسىمال, اراسى ۇزىلمەيتىن پويىزدار قوزعالىسىن رەتتەۋدە, ولاردى ستانسا جولدارىنا ۋاقىتىنا, ساناتىنا, جۇك تۇرىنە قاراي ءبولىپ ورنالاستىرۋدا ستانسا كەزەكشىسىنىڭ بىلگىرلىگى مەن تاجىريبەسى اسا قاجەت. بىلىكتى مامان بولماسا, ءۇستى-ۇستىنە كەلىپ جاتقان پويىز ۆاگوندارى كەپتەتىلىپ, نە ءارى, نە بەرى شىعا الماي, جەتەر جەرىنە جەتە الماي قالۋى مۇمكىن. وسىنداي ءىستى اتقارۋداعى شەبەرلىگى سان جىلدىق تاجىريبەمەن كەلگەن جاقىپبەك جانالىۇلى ەندى ەكى جىلدان سوڭ زەينەتكە دە شىعادى. ونىڭ تاعى ءبىر ەرەكشەلىگى – ءوزى ناعىز وسى جەردىڭ تۋماسى بولۋى. قىرقىنشىدا تۋىپ, سوندا 50 جىل ءومىر ءسۇرىپ, اتالعان مەكەمەدە تابان اۋدارماي جۇمىس ىستەپ كەلەدى. 11 جىلدان بەرى استانانىڭ وزىندە تۇرادى. تەمىرجولشىلار وتباسىنان شىققان ونىڭ اۋلەتىنىڭ سالاداعى ەڭبەك ءوتىلى ءجۇز جىلدان اسادى. تۋعان ەكى قىزى دا – تەمىرجولشى.
– اكەم وسى ستانسادا 1960 جىلدارى كەزەكشى, انام تەحنيكالىق كەڭسە قىزمەتكەرى بولىپ ءومىر بويى ەڭبەك ەتكەن. ناعاشى اتام سوعىس كەزىندە پاروۆوز ءماشينيسى بولعان. كوزىمدى اشقالى كورگەنىم تەمىرجول بولدى. اتا-انامنىڭ جۇمىسقا بارا جاتقانى, كەلە جاتقانى, كيگەن جۇمىس كيىمدەرى, جۇمىس ورنىنا بارعانداعى العان اسەرىم مەنىڭ بولاشاقتا كىم بولاتىنىمدى ناقتى انىقتاۋىما اسەر ەتتى. اقىرى ەڭبەك جولىمدى 1984 جىلى وسى جەردە پارك كەزەكشىسى بولىپ باستادىم. ول كەزدە ستانسادا تەك 9 جول بار ەدى. ودان بەرى كوپ نارسە وزگەردى. قىرقىنشى دامىپ, وركەندەدى. ەڭ باستىسى, جۇمىس جەڭىلدەدى. كومپيۋتەر ارقىلى «گيد ۋرال» اقپاراتتىق جۇيەسىمەن جۇمىس ىستەي باستاعاننان كەيىن بارلىق باعىتتان كەلە جاتقان پويىزداردى ءوزىمىز كورە الاتىن بولدىق. بۇرىن ولاردىڭ كەلە جاتقانىن ورتالىق ديسپەتچەردىڭ حابارلاۋى ارقىلى ءبىلىپ وتىراتىنبىز. مۇندا پاۆلوداردان كەلە جاتقان پويىزداردى قاراعاندىعا بۇرامىز. ول پويىز استاناعا بارمايدى. ەلوردانىڭ قىرقىنشىسىز دامۋى مۇمكىن ەمەس. قالاداعى كاسىپكەرلىكتىڭ, قۇرىلىستىڭ, باسقا دا كوپتەگەن سالانىڭ دامۋى ءۇشىن قاجەتتى جۇكتەر تەك قانا قىرقىنشىدان تۇسىرىلەدى. جالپى بۇل قازاقستان بويىنشا 5 باعىتتا جۇمىس ىستەيتىن جالعىز ستانسا, – دەيدى كەيىپكەرىمىز.
ونىڭ مىندەتىنە – ستانساعا تاۋلىگىنە كەلەتىن 30 جۇپ جۇك, 20 جۇپ جولاۋشىلار پويىزىنىڭ قوزعالىسىن ۇيلەستىرۋ كىرەدى. سالاعا سىڭىرگەن ەڭبەگى باعالانىپ, تالاي رەت ماراپاتتارعا يە بولعان. اتاپ ايتقاندا, تەمىرجولدىڭ «ۇزدىك مامان» جانە «ادال ەڭبەگى ءۇشىن» توسبەلگىلەرىمەن ماراپاتتالعان.
