باس قالانىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىعى الدا تۇرعان جىلۋ ماۋسىمىنا تولىق دايىندىعىن جاريا ەتتى.
استانا قالاسى ەنەرگەتيكا باسقارماسىنىڭ مالىمەتىنشە, «استانا-ەنەرگيا» اق نەگىزگى جانە قوسىمشا جابدىقتارىن جوندەۋ جۇمىستارى بەكىتىلگەن كەستەگە سايكەس اتقارىلدى. جالپى ەنەرگيا كوزدەرىنىڭ دايىندىعى 93,2 پايىزدى قۇرايدى, ونىڭ ىشىندە جەو-1 – 91 پايىز, جەو-2 – 88,6 پايىز, اۋداندىق قازاندىق بويىنشا 100 پايىز كۇيىندە قىسقا دايىن وتىر. قىستا جاعىلاتىن كومىردىڭ قورى دا جەتكىلىكتى, ونىڭ كولەمى 335187 توننانى قۇرايدى. اتاپ ايتقاندا, جەو-1 – 36992 توننا جانە جەو-2 – 298195 توننا. مازۋتتىڭ قورى 5903 توننانى قۇرايدى, ونىڭ ىشىندە جەو-1 – 3203 توننا جانە جەو-2 – 2700 توننا كومىر ءتۇسىردى.
«استانا-تەپلوترانزيت» اكتسيونەرلىك قوعامى دا جىلىتۋ ماۋسىمىنا جالپى دايىندىعى ويداعىداي ەكەنىن جاريا ەتتى. بۇگىنگى كۇندە شارۋانىڭ 80,8 پايىزى دايىن بولدى. ال «استانا-رەك» ەلەكترمەن جابدىقتاۋ جەلىسىنىڭ جۇمىسى 91,6 پايىزعا, «استانا سۋ ارناسى» مكك جەلىسى 93 پايىزعا ءبىتىپ تۇر.
ۇستىمىزدەگى جىلدىڭ 3 قىركۇيەگىندەگى مالىمەت بويىنشا ەلوردانىڭ تۇرعىن ءۇي قورىنىڭ ماۋسىمعا دايىندىعى 97 پايىزدى قۇراپ, بۇگىنگە دەيىن 2414 ءۇيدىڭ 2359-ى ماۋسىمعا دايىن. جىلىتۋ ماۋسىمىنا 36 دەنساۋلىق ساقتاۋ نىسانىنىڭ 34-ءى, 168 ءبىلىم بەرۋ مەكەمەسىنىڭ 167-ءسى جانە قالاداعى بارلىق مادەني نىساندار دايىندىعى تەكسەرىلدى. ەندى جىلۋ ورتا تاۋلىكپەن سىرتقى اۋا رايى تەمپەراتۋراسى +10°س جانە بەس تاۋلىك ىشىندە ودان دا تومەندەگەن كەزدە ەش كەدەرگىسىز بەرىلەتىن بولادى.
