«پاراسات» بيزنەس ورتالىعى «اتامەكەن» كاسىپكەرلەر پالاتاسى عيماراتىندا قازاقستان رەسپۋبليكاسىنىڭ پرەزيدەنتى ق.توقاەۆتىڭ بۇيرىعىمەن رەتتەۋشى ورگانداردىڭ بۇكىل رەسپۋبليكا بويىنشا بيزنەس-قاۋىمداستىققا ەسەپ بەرۋ كۇنى ءوتتى. العاش رەت وتكىزىلىپ وتىرعان شاراعا نۇر-سۇلتان قالاسى اكىمىنىڭ ورىنباسارى ماليكا بەكتۇروۆا, نۇر-سۇلتان قالاسى كاسىپكەرلەر پالاتاسىنىڭ ديرەكتورى المات دجۋنۋسوۆ, ىسكەر ايەلدەر كەڭەسى ءتورايىمى, ايماقتىق كەڭەس مۇشەسى باعيلا بيسەمباەۆا, كەڭەس توراعاسى يراك ەلەكەەۆ, ت.ب. ازاماتتار جانە اۋماقتىق مەملەكەتتىك باقىلاۋ جانە قاداعالاۋ ورگاندارىنىڭ وكىلدەرى كەلىپ قاتىستى. 
«قازاقستان رەسپۋبليكاسىنىڭ پرەزيدەنتى ق.توقاەۆتىڭ بۇيرىعىمەن رەسپۋبليكا بويىنشا رەتتەۋشى ورگانداردىڭ بيزنەس قاۋىمداستىققا ەسەپ بەرۋ كۇن بولىپ بەلگىلەنۋىنە وراي وسىنداي فورماتتا شارا ۇيىمداستىرىپ وتىرمىز. شاراعا 19 رەتتەۋشى جانە بيزنەستى تەكسەرەتىن ورگاندار قاتىسىپ, ءوز تاراپتارىنان رەتتەۋ, تەكسەرۋ جۇمىستارى بويىنشا بايانداپ بەرەدى, بۇل ماسەلە بويىنشا كوبىنە قانداي سۇراقتار تۋىندايتىنىنا توقتالماق. بيزنەس تاراپىنىڭ پىكىرلەرىن دە تىڭداپ, قوياتىن سۇراقتارىنا جاۋاپ بەرەمىز» دەگەن نۇر-سۇلتان قالاسى اكىمىنىڭ ورىنباسارى ماليكا بەكتۇروۆا كەلەشەكتە دە جالعاسىن تاباتىن وسىنداي ەسەپ بەرۋ جيىنىنىڭ ماڭىزى زور ەكەنىن ايتىپ ءوتتى.
باس پروكۋراتۋرا, ىشكى ىستەر مينيسترلىگى, قارجى, ادىلەت, اۋىلشارۋاشىلىعى, دەنساۋلىق ساقتاۋ, ەڭبەك جانە الەۋمەتتىك قورعاۋ, اقپارات جانە الەۋمەتتىك دامۋ, ەنەرگەتيكا, ۇلتتىق ەكونوميكا, ساۋدا جانە ينتەگراتسيا, ەكولوگيا, گەولوگيا جانە تابيعي رەسۋرستار, ونەركاسىپ جانە ينفراقۇرىلىمدى دامىتۋ, ت.ب. سالا وكىلدەرى ەسەپ بەرۋ كەزىندە تەكسەرۋلەر كەزىندە ءجيى انىقتالعان قۇقىق بۇزۋشىلىقتار تۋرالى, ولاردى تەڭەستىرۋ بويىنشا ۇسىنىستارمەن بىرگە, سونداي اق, مەملەكەتتىك باقىلاۋ مەن قاداعالاۋدىڭ ءتيىستى سالاسىنداعى زاڭناماعا ەنگىزىلگەن مىندەتتى تالاپتار, يننوۆاتسيالار مەن وزگەرىستەر تۋرالى ايتتى.
جادىرا شامۇراتوۆا
