«تازا قازاقستان». استانا – تازالىق پەن ءتارتىپتىڭ ۇلگىسى» ەكولوگيالىق اكتسياسىنىڭ اياسىندا شاعىن فۋتبولدان ۇلتتىق قۇرامانىڭ باس باپكەرى ريكاردو كاكا مەن مەتسەنات تالعات قوجاحمەتوۆ قازاقستان فۋتبول فەدەراتسياسى اۋماعىندا كوشەت وتىرعىزۋ ءىس-شاراسىنا قاتىستى, دەپ حابارلايدى astana-akshamy.kz
ولار وتاندىق سپورتتى دامىتۋعا زور ۇلەس قوسىپ كەلەدى. 2018 جىلى ۇلتتىق قۇرامانىڭ باس باپكەرى رەتىندە تاعايىندالعان ريكاردو كاكا 2021 جىلى ليتۆادا وتكەن الەم چەمپيوناتىندا قازاقستاندى العاش رەت جارتىلاي فينالعا جەتكىزگەن بولاتىن. تەك پەنالتي سەرياسىندا پورتۋگاليادان جەڭىلگەنى بولماسا, ءتىپتى فينالعا شىعۋعا ءسال عانا جەتپەگەن.
«پرەزيدەنتىمىزدىڭ باستاماسىمەن قولعا الىنعان «تازا قازاقستان» اكتسياسى يدەياسىنىڭ ءمانى زور. سەبەبى ءوز ءۇيىنىڭ تازالىعى وزگەگە ەمەس, بىرىنشىدەن, وزىمىزگە كەرەك. تانىمال كىسىلەردىڭ وسىنداي اكتسيالارعا قاتىسۋى سوڭىمىزدان ەرگەن جاس ۇرپاققا دا اسەر ەتەدى دەپ ويلايمىن. قازىرگى ساتتە 26 مامىر كۇنى سامارقاندتا وتەتىن الەم چەمپيوناتىنىڭ جەرەبەسىنە بارۋعا دايىندالىپ جاتىرمىز. ىڭعايلى, قولايسىز قارسىلاس دەپ ەشكىمدى ءبولىپ-جارعىم كەلمەيدى. توبىمىزعا كىم تۇسسە دە, بارىمىزدى سالامىز. الەۋەتىمىزدى بىلە تۇرىپ, تەك توپتان شىعۋ نەمەسە 1/8-دە ويناۋ دەگەن سەكىلدى مىندەتتەردى قويمايمىز. ماقساتىمىز ايقىن. 2021 جىلعى جوعارى جەتىستىگىمىزدەن دە اسىپ تۇسكىمىز كەلەدى. جەڭىستە بىرگە بولاتىن جانكۇيەرلەر, ەلىمىزدىڭ تازالىعىنا دا بىرگە اتسالىسايىق», – دەدى ريكاردو كاكا.
ايتا كەتسەك, 6 جىل ىشىندە باس باپكەرىمىزدىڭ تۇسىندا قۇرامامىز 33 ويىن (26 جەڭىس, 3 تەڭ, 4 جەڭىلىس) وتكىزگەن.
ال «سايران» جشس قۇرىلىس كومپانياسىنىڭ باس ديرەكتورى تالعات قوجاحمەتوۆ شاعىن فۋتبولدى تانىتۋ ماقساتىندا بىرنەشە الاڭدى سالىپ بەرگەن.
«مەنىڭ بىلۋىمشە, ەلىمىزدەگى ورماننىڭ ۇلەسى 4-5 پايىزدى عانا قۇرايدى. بۇل نەنى بىلدىرەدى؟ ياعني, اعاشتى ءبىر ساتتىك اكتسيادا عانا ەمەس, تۇراقتى تۇردە وتىرعىزۋ كەرەكتىگىمىزدى ايقىندايدى. بۇعان دەيىن دە تۇڭعىش پرەزيدەنت استانا قالاسىنىڭ اينالاسىندا كوشەت وتىرعىزىپ, بۇگىندە «جاسىل بەلدەۋدىڭ» قىزىعىن تۇرعىندار كورىپ جاتىر. قازاقستان فۋتبول فەدەراتسياسىنىڭ جانىندا شاعىن فۋتبولىمىزدى الەمگە تانىتقان كاكامەن بىرگە كوشەت وتىرعىزۋ دا – ۇلكەن مارتەبە. كەيىنگى جاس ۇرپاق وسى اعاشتى تانىمال باپكەر وتىرعىزدى دەپ ەسكە الىپ جۇرەدى», – دەدى مەتسەنات تالعات قوجاحمەتوۆ.
ەستەرىڭىزگە سالساق, 8 ساۋىردە باستاۋ العان رەسپۋبليكالىق اكتسيا ءالى دە جالعاسىن تابۋدا.
