ونەر جولىن تاشكەنت فيلارمونياسىنىڭ ءان-بي انسامبلىندە ءانشى بولىپ باستاعان. ودان كەيىن مايدان دالاسىندا ءان ايتىپ, 1945 جىلى 9 مامىردا بەرليندەگى جەڭىس كونتسەرتىنە قاتىسقان قازاقستاننىڭ جانە بۇرىنعى كسرو-نىڭ حالىق ءارتىسى, كەيىننەن حالىق قاھارمانى اتاعىنا يە بولعان روزا باعلانوۆا تىڭ ولكەسى تسەلينوگرادقا گاسترولدىك ساپارمەن بىرنەشە رەت كەلگەن.
ءار كەلگەن سايىن ول ونەر ۇجىمدارىمەن كەزدەسىپ, ونەر ادامدارىمەن ەمەن-جارقىن اڭگىمە-دۇكەن قۇرادى ەكەن. اسىرەسە, ءانشى قازاقتىڭ حالىق اندەرىن ناقىشىنا كەلتىرە ورىنداعاندا كورەرمەندەر ورىندارىنان تۇرىپ قول سوعىپ, ۇزاق قوشەمەت كورسەتەتىن بولعان.
«روزا تاجىبايقىزى – الەم حالىقتارىنىڭ اندەرىن شەبەر ورىندايتىن سيرەك تالانت ەدى. ول قاي ەلگە بارماسىن اۋەلى سول ەلدىڭ حالىق اندەرىن جاتتاپ, ونى ناقىشىنا كەلتىرە ورىنداۋدى ادەتكە اينالدىرعان. ءار كونتسەرتىندە ونىڭ تامىلجىعان داۋسىنا سۇيسىنگەن ونەرسۇيەر قاۋىم ساحنادان تۇسكەن بويدا قاۋمالاي قورشاپ, قولتاڭبا الىپ جاتاتىن» دەپ ەسكە الادى زامانداستارى.
مىنە, سول «اح, سامارا – گورودوك» انىمەن تەك كەڭەس وداعىنا عانا ەمەس, بۇكىل الەمگە تانىلعان ايرىقشا داۋىس يەسى 1970 جىلى ماسكەۋدەن كەلە جاتىپ تسەلينوگرادقا ات باسىن بۇرىپتى. سول كۇنى ول الەكسەەۆ, ۆيشنەۆكا اۋداندارىنىڭ ەڭبەك ادامدارىنا كونتسەرت بەرىپ, كەلەسى كۇنى شورتاندى جيھاز فابريكاسىندا, «تسەلينوگرادسەلماش» زاۋىتىندا بولىپ, ءۇشىنشى كۇنى تىڭ يگەرۋشىلەر سارايىندا دومبىراشى, قازاق سسر-ءىنىڭ حالىق ءارتىسى ءازيدوللا ەسقاليەۆپەن بىرگە تىڭ ەڭبەككەرلەرىنە قورىتىندى كونتسەرتىن بەرەدى.
سۋرەتتە اۋەجايدان روزا باعلانوۆانى بوريس ماەۆسكي باستاعان وبلىستىق مادەنيەت باسقارماسى قىزمەتكەرلەرىنىڭ كۇتىپ الۋ ءساتى.
عازيزا يساحان
