بەكەن قايراتۇلى:
كوپ جاعدايدا شىعىس مۇسىلمان حالىقتارىنىڭ ۇستانىمىنا اينالعان ءال-فارابي اتامىزدىڭ ۇلاعاتتى ءسوزى بار. ول كىسى: «تاربيەسىز بەرىلگەن ءبىلىم – زيان» دەپتى. ياعني, وسى ءسوزدى قازاقشا تاپسىرلەسەك: ۇرپاقتىڭ تاربيەسىن, ءتالىمىن, كوزقاراسىن سونىڭ ىشىندە ءوزىنىڭ تەك-تۇقىمى, تاريحى, اتا-بابالارىنىڭ قۇندى قاسيەتتەرىن بويىنا سىڭىرمەي بەرگەن بىلىمنەن بەس تيىن پايدا جوق. ەكىنشىدەن, ءۇندى حالقىندا «قويدى ارىستان باستاسا قويلار ارىستانعا اينالادى, ارىستاندى قوي باسقارسا ارىستان قويعا اينالادى» دەيتىن ماتەل بار. ۇستازدىق دەگەنىمىز – قويدى ارىستانعا اينالدىرۋ. ارقالى اقىن ماعجان جۇماباەۆ: «يگى جاقسى باس قوسقاندا – ءتور ۇستازدىكى» دەگەندى بەكەر ايتتى دەيسىز بە؟ سول ۇستازىڭ قازىر بوساعا سىعالاپ قالدى ەمەس پە؟ تورگە بايشىكەشتەر وتىرىپ الدى.
ءبىرجان ساندىبەك:
ماقالادا اۆتور وتە وزەكتى ماسەلەنى قوزعاعان. شىندىعىندا, ءبىز قازىر بىلىمگە باسا نازار اۋدارىپ كەتتىك تە, تاربيەنى ەكىنشى ورىنعا ىسىرىپ قويدىق. سونىڭ كەسىرىنەن قازىر قوعامدا نەشە ءتۇرلى كەلەڭسىز وقيعالار بەلەڭ الدى. ەلىمىزدەگى جەمقورلىقتىڭ اسقىنىپ بارا جاتقانى دا وسى تاربيەگە كەلىپ تىرەلەدى. يمانى مەن تاربيەسى بار ادام ونداي قادامعا بارمايدى دەپ ويلايمىن. سوندىقتان اتا-انا ءوز بالاسىنا ۇلتتىق تاربيەنى سىڭىرە بىلسە, جاقسى ازامات بولىپ قالىپتاسارى حاق.
