استانا قالاسىندا دزيۋدو كۇرەسىنەن ايەلدەر جانە ەرلەر اراسىنداعى ەل چەمپيوناتى, سونىمەن قاتار ەرلەر مەن ايەلدەر ارالاس قۇرامدارى اراسىندا كوماندالىق جارىس ءوتتى. «داۋلەت» سپورت كەشەنىندە وتكەن جارىستا 437 بالۋان بەلدەستى.
بيىلعى بىرىنشىلىك ەكى فورماتتا ۇيىمداستىرىلىپ, جەكەلەي جانە كوماندالىق جارىستىڭ جەڭىمپازدارى انىقتالدى. جەكەلەي سىندا ءتورت التىن مەدال يەلەنگەن الماتى وبلىسىنىڭ دزيۋدوشىلارى باسقالاردان كوش ىلگەرى بولدى. ءۇش التىنعا ەن سالعان ماڭعىستاۋ بالۋاندارى مەن ەكى چەمپيون شىققان قىزىلوردا دزيۋدوشىلارى دا الدىڭعى ساپتان ورىن الدى. ال ءۇش قىز, ءۇش جىگىتتەن ايماقتىق ارالاس قۇرامالار سايىسىندا اتىراۋ كومانداسى ەشكىمگە دەس بەرمەي, باس كۋبوكتى جەڭىپ الدى.
جەڭىس تۇعىرىنا كوتەرىلگەن جەڭىمپازدار اراسىنان استانا قالاسىنىڭ سپورتشىسى ايگەرىم ابىلقادىروۆا, ماڭعىستاۋلىق اقنيەت تۇردان, الماتىلىق زارينا رايفوۆا, قىزىلوردالىق سەرىك اقىلبەك, جامبىلدىق ءازيز قالقامانۇلى جانە الماتىلىق ۆيكتور دەميانەنكو جانكۇيەر قاۋىمنىڭ ريزاشىلىعىنا بولەندى.
وسى جارىستىڭ قورىتىندىسى بويىنشا قازاقستان ۇلتتىق قۇراماسىنا قابىلدانعان دزيۋدوشىلار انىقتالدى.
