قازاقستاندا 6 مىڭعا جۋىق قازاقستاندىق ايەل «اڭساعان ءسابي» باعدارلاماسى بويىنشا ەكۇ راسىمىنەن ءوتتى. ەسەپكە 2 مىڭعا جۋىق جۇكتى ايەل تۇردى, 40 بالا دۇنيەگە كەلدى. جالپى ەكۇ ءراسىمى 6 مىڭ ايەلگە وتكىزىلدى.
قر دەنساۋلىق ساقتاۋ مينيسترلىگى انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆانىڭ ايتۋىنشا, «سالاۋاتتى ۇلت» اتتى «ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسى اياسىندا ەكۇ-عا جىل سايىن 2025 جىلعا دەيىن 7000 كۆوتا بولىنەتىن بولادى. «مىندەتتى مەديتسينالىق ساقتاندىرۋ جۇيەسى شەڭبەرىندە ەكۇ-عا دايىندالعان پاتسيەنتتەردى جىل سايىن بارىنشا كوبىرەك قامتۋ مۇمكىندىگى بولادى» دەدى م.ەمبەرگەنوۆا. قازاقستاندا 1995 جىلدان باستاپ 85000-عا جۋىق ەرلى-زايىپتى قوسالقى رەپرودۋكتيۆتىك تەحنولوگيالار ادىستەرىمەن ەمدەلدى. قازىرگى ۋاقىتتا «پروبيركادان» 25 مىڭنان استام بالا دۇنيەگە كەلدى, ەلدە 27 ەكستراكورپورالدى ۇرىقتاندىرۋ ورتالىعى جۇمىس ىستەيدى. بۇگىندە 14 مىڭ ايەل جانە 117 ەر ادام بەدەۋلىكپەن ەسەپتە تۇر.
