ونكۇندىك وتەدى
دۇنيەجۇزىلىك سپيد-كە قارسى كۇرەس كۇنىنە وراي نۇر-سۇلتان قالاسىندا بيىل 15-25 قاراشا ارالىعىندا «سپيد: ءاربىرىن ءتۇسىنۋ» تاقىرىبىمەن ونكۇندىك وتكىزىلەدى.
قالالىق سپيد-كە قارسى كۇرەس ورتالىعىنىڭ ديرەكتورى ءسابيت ابدرايموۆتىڭ ايتۋىنشا, ادامداردىڭ قاۋىپسىزدىگى, جەكە باسىنا قاتىستى ستيگما مەن كەمسىتۋشىلىكتى جويۋ, بارلىق مۇقتاج جانداردى قاجەتتى ءدارى-دارمەكتەرمەن جانە قىزمەتتەرمەن قامتاماسىز ەتۋ – ورتالىقتىڭ باستى مىندەتى. «بۇل اۋرۋ پايدا بولعانىنا 40 جىل وتسە دە, ءالى دە جاھانعا قاۋىپ ءتوندىرىپ تۇر. وتكەن 10 ايدىڭ كورسەتكىشى بويىنشا قالامىزدا 277 ادامنان سپيد انىقتالعان. ونىڭ 197-ءسى – ەرلەر, قالعانى – ايەلدەر. جالپى نۇر-سۇلتان قالاسى بويىنشا العاش تىركەلگەن كۇننەن بۇگىنگە دەيىن 2272 ادام تىركەۋدە تۇرادى» دەيدى ول.
ونكۇندىك اياسىندا ونلاين فورماتتا قازاق ۇلتتىق ونەر ۋنيۆەرسيتەتىنىڭ كلاسسيكالىق كامەرالىق مۋزىكاسىنىڭ كونتسەرتى ۇيىمداستىرىلادى. سونداي-اق الەۋمەتتىك جەلىلەردە ۇكىمەتتىك ەمەس ۇيىمدار مەن مەديتسينا قىزمەتكەرلەرىنىڭ قاتىسۋىمەن قالا تۇرعىندارىنا ارنالعان #ۋسلىشات كاجدوگو#اربىرىنتۇسىنۋ#toHearEveryone اتتى چەللەندجى وتكىزىلەدى. ناۋقان بارىسىندا گازەتتەردە, ەلەكتروندى باق-تاعى ۇزدىك جاريالانىم جانە ۇزدىك تەلە/راديو ماتەريالى ءۇشىن جۋرناليستەر اراسىنداعى بايقاۋدىڭ قورىتىندىسى جاريالانادى. مەكتەپ جانە كوللەدج ستۋدەنتتەرى اراسىندا دەرتتىڭ الدىن الۋ بويىنشا ۆيكتورينالىق ويىندار, جاستارعا ارنالعان فورۋم ۇيىمداستىرىلادى. استانا مەديتسينا ۋنيۆەرسيتەتىنىڭ ستۋدەنتتەرى اراسىندا دەبات, ءىرى جوو-دا سپيد بويىنشا جەدەل تەستىلەۋ وتكىزىلەدى. دوستىق كابينەتىندە, №15 قالالىق ەمحانادا سپيد بويىنشا ەكسپرەسس-تەستىلەۋدەن اشىق ەسىك كۇندەرى بولادى. الەۋمەتتىك جەلىلەردە #بارلىعى سپيد تۋرالى شاراسى ۇيىمداستىرىلادى. ورتالىقتا ەسەپتە تۇرعان ادامدار اراسىنداعى از قامتىلعان وتباسىلارعا ازىق-تۇلىك تاراتىلادى. ونكۇندىك قورىتىندىسى 25 قاراشادا ءباسپاسوز ءماسليحاتىندا شىعارىلادى.