سەنبى كۇنى استانانىڭ 20 جىلدىعىنا ارنالعان «سامعاۋ» VI حالىقارالىق تەاتر فەستيۆالىنىڭ شىمىلدىعى جابىلدى. «جاستار» تەاترىندا وتكەن ماراپاتتاۋ سالتاناتىنا استانا اكىمىنىڭ ورىنباسارى ەرمەك امانشاەۆ قاتىستى.
ءبىر اپتا بويى ەلىمىزدىڭ جانە شەتەلدىڭ ونەر ۇجىمدارى, قازىلار القاسىنىڭ ىرىكتەۋىنەن وتكەن 12 تەاتر وزدەرىنىڭ رەپەرتۋارىنداعى ۇزدىك قويىلىمدارىن ۇسىندى. بيىلعى فەستيۆالدىڭ ساراپشىلارى مەيلىنشە ءادىل شەشىم شىعاردى. بۇعان جەڭىمپازدار ەسىمدەرى مەن توپ جارعان سپەكتاكلدەر اتالعاندا كورەرمەندەردىڭ قوشەمەتى ارقىلى كوز جەتكىزدىك. مۇنى ءوز سوزىندە ە.امانشاەۆ تا اتاپ ءوتتى.
– مارەسىنە جەتكەن «سامعاۋ» فەستيۆالى جاڭا ەسىمدەردى اشىپ, جاڭا سپەكتاكلدەردى تانىستىردى. بارلىق جەڭىمپازداردى شىن جۇرەكتەن قۇتتىقتايمىن! فەستيۆالگە قاتىسقان تەاتر ۇجىمدارىنا اكىمدىك اتىنان العىس ايتامىن, – دەدى قالا اكىمىنىڭ ورىنباسارى.
استانا تەاتر قالاسىنا اينالدى. مۇنى وسى فەستيۆالدە ەلوردا تەاترلارىنىڭ قورجىنىنا تۇسكەن جۇلدەلەر سانىنان-اق باعامداۋعا بولادى. «ۇزدىك سپەكتاكل» اتالىمىندا توپ جارىپ, باس جۇلدەنى «ەۆگەني ونەگين» سپەكتاكلىمەن فەستيۆالگە قاتىسقان م.گوركي اتىنداعى مەملەكەتتىك اكادەميالىق ورىس دراما تەاترى يەلەندى. ال وسى تەاتردىڭ باس رەجيسسەرى بەكبولات پارمانوۆ شىڭعىس ايتماتوۆ اتىنداعى حالىقارالىق سىيلىقتىڭ يەگەرى اتاندى. سىيلىقتى وعان فەستيۆالدىڭ قۇرمەتتى قوناعى, قىرعىزستاننىڭ بەلگىلى دراماتۋرگى سۇلتان راەۆ تاپسىردى. ق.قۋانىشباەۆ اتىنداعى مەمل ەكەتتىك اكادەميالىق قازاق مۋزىكالىق دراما تەاترى «قىمباتتى پامەللا» كومەدياسىمەن قاتىستى. پامەللانىڭ بەينەسىن سومداعان قازاقستاننىڭ حالىق ءارتىسى گۇلجان اسپەتوۆا «ۇزدىك اكتريسا» اتالىمىندا توپ جاردى. «جاستار» تەاترىنىڭ «رەۆيزور» تراگيفارسىندا جارقىراعان داۋرەن سەرعازينگە «ۇزدىك اكتەر» اتالىمىندا ەشكىم تەڭ كەلمەدى.
س.مۇقانوۆ اتىنداعى سولتۇستىك قازاقستان وبلىستىق قازاق مۋزىكالىق دراما تەاترى «قاراگوز» دراماسىن ۇسىندى. ونى ساحنالاعان فارحات مولداعاليەۆ «ۇزدىك رەجيسسەر» اتالىمىندا جەڭىسكە جەتتى. قازىلار القاسىنىڭ توراعاسى, قازاقستاننىڭ حالىق ءارتىسى تالعات تەمەنوۆ «الدىندا جۇرگەن اعانىڭ ەتەگىن باسپا, جولىن قۋ, ارتىندا جۇرگەن ءىنىنىڭ بەتىنەن قاقپا, بەلىن بۋ» دەگەن اتالى ءسوزدى ايتىپ, جاس رەجيسسەرگە جۇلدەنى تاپسىردى.
حالىق قاھارمانى, كسرو حالىق ءارتىسى, كسرو جانە قازاق كسر مەملەكەتتىك سىيلىقتارىنىڭ لاۋرەاتى ءازىربايجان مامبەتوۆ اتىنداعى ارنايى سىيلىقتى ساحنا ساڭلاعىنىڭ زايىبى, قازاق كسر حالىق ءارتىسى قورلان قاليلامبەكوۆا سامارقاند مۋزىكالىق-دراما تەاترىنا (وزبەكستان) تاپسىردى. قازىلار القاسىنىڭ ارنايى سىيلىعىن ت.ءابدىمومىنوۆ اتىنداعى قىرعىز ۇلتتىق اكادەميالىق دراما تەاترى يەلەندى. «ەكىنشى پلانداعى ۇزدىك ەر ادام بەينەسى» جانە «ەكىنشى پلانداعى ۇزدىك ايەلدەر ءرولى» اتالىمدارى جۇلدەسىن قىرعىزستاننىڭ م.رىسقۇلوۆ اتىنداعى نارىن وبلىستىق اكادەميالىق مۋزىكالىق-دراما تەاترىنان تەمىرلان سمانبەكوۆ جانە المەتەۆ قالاسىنداعى تاتار مەملەكەتتىك دراما تەاترىنىڭ اكتريساسى ءمادينا گاينۋللينا الدى. جەڭىمپازدارعا تاپسىرىلعان مۇسىنشىلەر قازاقستاننىڭ ەڭبەك سىڭىرگەن ونەر قايراتكەرى, مەملەكەتتىك سىيلىق يەگەرى ەربولات تولەپبايدىڭ ەسكيزدەرى بويىنشا جاسالدى. بۇعان قوسا, قوماقتى قارجىلاي سىيلىقتار مەن ىنتالاندىرۋ سىيلىقتارى, بارشا قاتىسۋشى تەاترلارعا ارنايى ديپلومدار تاپسىرىلدى.
امانعالي قالجانوۆ
