قر ۇلتتىق مۋزەيىندە «ەرتىس – باياناۋىل ءوڭىرىنىڭ تاريحى مەن مادەنيەتى» اتتى پاۆلودار وبلىسى مۇراجايلارىنىڭ كورمەسى اشىلدى. اتالمىش كورمە استانا اكىمى اسەت يسەكەشەۆتىڭ باستاماسىمەن ەلوردانىڭ 20 جىلدىعىنا ارنالعان «رۋحاني جاڭعىرۋ» باعدارلاماسى اياسىندا جۇزەگە اسىرىلىپ وتىرعان «وتكەندى ەسكە الۋ – بولاشاققا جول» اتتى ەلورداداعى وڭىرلەر مۇراجايلارىنىڭ كوشپەلى كورمەلەرى جوباسى اياسىندا ءوتىپ وتىر.
جوبا وڭىرلەردىڭ تاريحىن جانە مادەنيەتىن زەرتتەۋ, قازاقستاننىڭ تاريحي تۇلعالارىنىڭ ءومىرى مەن شىعارماشىلىعىمەن تانىسۋ, قازاقستان قوعامىن رۋحاني دامىتۋ ماقساتىندا ۇيىمداستىرىلدى.
پاۆلودار وبلىستىق كوركەمسۋرەت مۋزەيى بۇقار جىراۋ اتىنداعى, گ.پوتانين اتىنداعى مۇراجايلارمەن بىرگە اكادەميك ق.ساتباەۆتىڭ باياناۋىل مەموريالدىق مۋزەيى ەكسپوزيتسيالارىن ۇسىندى. وندا مۇراجاي قورلارىنداعى ابىلاي حاننىڭ اقىلشىسى بۇقار جىراۋدىڭ 350 جىلدىعىنا, اقىن, ەتنوگراف, فولكلورشى ءماشھۇر ءجۇسىپ كوپەيۇلىنىڭ 160 جىلدىعىنا, حالىق كومپوزيتورى ەستاي بەركىمبايۇلىنىڭ 150 جىلدىعىنا, اقىن, اعارتۋشى سۇلتانماحمۇت تورايعىروۆتىڭ 125 جىلدىعىنا جانە ت.ب. اسا كورنەكتى تۇلعالاردىڭ مەرەيتويلارىنا ارنالعان ماتەريالدار تانىستىرىلدى.
جالپى, «وتكەندى ەسكە الۋ – بولاشاققا جول» جوباسىنا سولتۇستىك قازاقستان, اقمولا, قاراعاندى, پاۆلودار, الماتى, شىعىس قازاقستان وبلىستارىنىڭ 30-دان استام مۇراجايلارى قاتىسۋدا. پاۆلودار وبلىسىنان كەيىن كورمەنى الماتى جانە شىعىس قازاقستان وبلىستارىنىڭ مۋزەيلەرى جالعاستىرادى.
امانعالي قالجانوۆ
