«Astana music hall» كەشەنىندە «ءسان مەن ساحنا» حالىقارالىق ساحنا كيىمدەرى فەستيۆالى ءوتتى. «توي كويلەكتەرى» دەپ اتالعان اۆتورلىق بايقاۋعا تالانتتى جاس ديزاينەرلەر قاتىستى.
شارادا بۇعان دەيىن فەستيۆالدىڭ ايماقتىق كەزەڭىندە جەڭىسكە جەتكەن اقتاۋ, قىزىلوردا, شىمكەنت جانە الماتى قالالارىنان كەلگەن ديزاينەرلەردىڭ توپتامالارى كورسەتىلدى. اقتاۋلىق ءمادينا ماساقوۆانىڭ توپتاماسى بارىنشا اشىق, نازىك ءتۇستى كويلەكتەردەن تۇرادى. شىمكەنتتىك ينديرا بەلىسبەكوۆانىڭ «گەيشانىڭ ەستەلىكتەرى» توپتاماسىندا ەركىن وي, تاۋەلسىز كوزقاراس سەزىلەتىندەي. ال, سالتانات وماروۆا توي كويلەكتەرىنە ەتنيكالىق جانە زاماناۋي رەڭك بەرۋگە تىرىسقان ەكەن. قازىلار القاسى قاتىسۋشىلاردىڭ ەڭبەگىن باعالاعاندا ولاردىڭ وزىندىك قولتاڭباسىنا ايرىقشا ءمان بەردى.
بايقاۋ قورىتىندىسىندا ءبىرىنشى ورىندى ءمادينا ماساقوۆا جەڭىپ الدى. ەكىنشى ورىن سالتانات وماروۆاعا, ال, ءۇشىنشى ورىن «سىلقىم» ءسان ۇيىنە («تۇيمەداق» توپتاماسى ءۇشىن) بۇيىردى.
بيىل التىنشى رەت ۇيىمداستىرىلعان فەستيۆال ۇلتتىق كيىم ۇلگىلەرىن زاماناۋي ءسان الەمىندە دارىپتەۋدى جانە وتاندىق سانگەرلەردىڭ شىعارماشىلىعىن ناسيحاتتاۋدى كوزدەيدى. بۇل شارا قازىر قازاقستاندىق جانە شەتەلدىك ديزاينەرلەردىڭ تاجىريبە الماسۋ الاڭىنا اينالىپ, ەتنومادەني ديالوگتىڭ دامۋىنا ىقپال ەتىپ وتىر.
روزا ارەن
