جاڭا عيماراتتاعى ماۋسىم
استانا جاستار تەاترىنىڭ جاڭا ماۋسىمى جاڭا عيماراتتا اشىلدى. بۇل ماۋسىمنىڭ شىمىلدىعى شەكسپيردىڭ «اساۋعا تۇساۋ» كومەدياسىمەن ءتۇرىلدى.
قويىلىم الدىندا وتكىزىلگەن ءباسپاسوز ءماسليحاتىندا تەاتردىڭ كوركەمدىك جەتەكشىسى, قر ەڭبەك سىڭىرگەن قايراتكەرى نۇرقانات جاقىپباي «بيىلعى ماۋسىم عيماراتتىڭ جوندەۋ جۇمىستارىنا بايلانىستى كەشتەۋ اشىلىپ وتىر. نەگىزى, كورەرمەنمەن قاراشا ايىندا قاۋىشامىز دەپ جوسپارلاعان ەدىك. ك.بايسەيىتوۆا اتىنداعى وپەرا جانە بالەت تەاترىنىڭ بۇرىنعى عيماراتى بىزگە ناۋرىز ايىندا بەرىلدى. بۇل – ءبىزدىڭ 9 جىلدان بەرى ارمانداپ كەلگەن جەكە وتاۋىمىز. عيمارات ءبىزدىڭ قازىرگە دەيىن تالماي ەتكەن ەڭبەگىمىز ءۇشىن بەرىلدى دەپ ويلايمىن. وسى ورايدا, استانا قالاسى اكىمدىگىنە زور العىسىمدى بىلدىرگىم كەلەدى» دەدى.
تەاتر ماۋسىمىنىڭ «اساۋعا تۇساۋمەن» اشىلۋىندا وزىندىك ءمان بار ەكەن. ۇجىم وسى قويىلىممەن كوپتەگەن بايقاۋلارعا قاتىسىپ, جۇلدەلى ورىندارعا يە بولعان. ماسەلەن, بۇل كومەديا قىزىلوردا قالاسىندا وتكەن ءسابيرا مايقانوۆانىڭ 100 جىلدىعىنا ارنالعان رەسپۋبليكالىق دراما تەاترلار فەستيۆالىندە «ەڭ ۇزدىك سپەكتاكل» اتاندى. سونداي-اق, تاتارستاندا وتكەن ونەر دوداسىندا «اساۋعا تۇساۋ» رەسەيلىك سىنشىلاردىڭ جوعارى باعاسىنا يە بولعان.
جاستار تەاترىنىڭ رەپەرتۋارىنداعى «تىراۋ-تىراۋ, تىرنالار…» (ساكەن ءجۇنىسوۆ) دراماسى تاياۋدا وسكەمەندە ۇيىمداستىرىلعان قازاقستان دراما تەاترلارىنىڭ ءXXIIى رەسپۋبليكالىق فەستيۆالىندە «جوعارى دەڭگەيلى شىعارماشىلىق ۇيلەسىم» اتالىمىندا جەڭىمپاز اتاندى. جالپى, ونەر ۇجىمى قۇرىلعالى بەرى بىرنەشە حالىقارالىق جانە رەسپۋبليكالىق فەستيۆالدەردە جەتى مارتە باس جۇلدەگە يە بولعان ەكەن. العاشىندا تەك
12 ارتىستەن قۇرالعان تەاترداعى قىزمەتكەرلەر سانى قازىر 43-كە جەتكەن.
الداعى ۋاقىتتا جاس ارتىستەر كورەرمەنگە ءىلياس ەسەنبەرليننىڭ «عاشىقتار» جانە تالاپتان احمەتجاننىڭ «سۇلۋ مەن سۋرەتشى» شىعارمالارىنىڭ جەلىسىمەن جاڭا قويىلىمدار ۇسىنباقشى. ال, 15 جەلتوقساندا «ىزدەپ تاپتىم سەنى» (تۋفان ميڭنۋللين) سپەكتاكلىن قويادى. سونداي-اق, قازىر ۇجىمنىڭ «قىز جىبەك» وپەراسىنداعى ە. برۋسيلوۆسكيدىڭ كومپوزيتسياسىن قولدانا وتىرىپ, جاڭا ميۋزيكل دايىنداپ جاتقانى بەلگىلى بولدى. ول شىعارما كەيىپكەرلەرى كورەرمەنمەن كەلەر جىلى قاۋىشادى.
روزا ارەن