جۋىردا «استانا بالەت» تەاترىندا «سۇلتان بەيبارىس» قويىلىمىنىڭ پرەمەراسى ءوتىپ, ونى كورەرمەندەر قىزىعا تاماشالادى.
قويىلىمدا قازاق جەرىندە تۋىپ, جاۋگەرشىلىك زامانىندا تۇتقىنعا الىنىپ, جات ەلدە ەرەن ەرلىگىمەن, اسقان تالانتىمەن قۇلدىقتان قايراتكەرلىك جولعا دەيىن كوتەرىلىپ, مىسىر مەن سيريانىڭ ماملۇك سۇلتانى بولعان بەيبارىس بابامىزدىڭ تاعدىرى بەينەلەنگەن.
جاڭا شىعارمانى جۇرتشىلىققا جەتكىزۋگە ەلىمىزدىڭ تالانتتى ونەر قايراتكەرلەرى ۇلەس قوستى. سونىڭ ىشىندە اقىن, قازاقستاننىڭ ەڭبەك سىڭىرگەن قايراتكەرى باقىت قايىربەكوۆ ليبرەتتوسىن جازسا, حاميت شانعاليەۆ پەن الىبەك الپيەۆ مۋزىكامەن ارلەدى. سونداي-اق قويىلىمعا حالىقارالىق جوبالارىمەن تانىمال, شەتەلدىك بىلىكتى ماماندار ستسەنوگراف جانە قويۋشى-سۋرەتشى لەونيد باسين مەن كوستيۋمدەر ارلەۋشىسى اسيا سولوۆەۆا اتسالىستى.
تۇعىرلى تۋىندىنى ساحنالاعان قازاقستاننىڭ ەڭبەك سىڭىرگەن قايراتكەرى, قويۋشى-حورەوگراف مۋكارام اۆاحري كوپشىلىككە تانىس وقيعانى جاڭا فورمادا بەدەرلەپ, كورەرمەنگە تاپ-تۇيناقتاي جەتكىزە ءبىلدى. اسىرەسە بالەت ارتىستەرىنىڭ شەبەرلىگى ءتانتى قىلدى.
نەگىزى, اتالمىش بالەتتىڭ دايىندىعى ءبىر جىل بۇرىن باستالعان, بىراق قازىرگى جۇقپالى ىندەتكە بايلانىستى پرەمەرانى بىرنەشە رەت كەيىنگە شەگەرۋگە تۋرا كەلدى. دەگەنمەن, جاڭا قويىلىم ءساتتى ءوتتى.
ايتا كەتەيىك, «بالەت پەن ۇلتتىق ءبيدى دامىتۋ جانە قولداۋ» قورىنىڭ تاريحي بالەت قويۋ تۋرالى يدەياسى «سامۇرىق-قازىنا» اق قولداۋىمەن جۇزەگە استى.
