ەلوردالىق مەيىرىم نۇرسۇلتانوۆ كاسىپقوي بوكستاعى 13 جەكپە-جەكتە جەڭىسكە جەتتى.
اۋەسقوي بوكستا جاستار اراسىنداعى ازيا چەمپيونى, ەرەسەكتەر اراسىنداعى قازاقستان چەمپيونى, «استانا ارلاندارى» ساپىندا WSB ءتۋرنيرىنىڭ چەمپيونى مەيىرىم نۇرسۇلتانوۆ 2016 جىلى كاسىپقوي بوكسقا اۋىسقان ەدى. اقش-تىڭ كاليفورنيا قالاسىندا روبەرتو گارسيا باپكەردىڭ قول استىندا جاتتىعا باستادى. سودان بەرى 13 جەكپە-جەك وتكىزىپ, بارىندە جەڭىسكە جەتتى. ونىڭ ىشىندە 8 قارسىلاسىن نوكاۋتپەن ۇتتى.
مەيىرىم سوڭعى جەكپە-جەگىن وتكەن سەنبىدە ەكاتەرينبۋرگ قالاسىندا وتكىزدى. شارشى الاڭ يەسى يليا بالاندين مەن مەيىرىم نۇرسۇلتانوۆ اراسىنداعى ايقاستى ماماندار «ولىسپەي-بەرىسپەيتىن» جەكپە-جەك بولادى دەپ توپشىلاعان بولاتىن. الايدا قازاق بوكسشىسى تاكتيكالىق تۇرعىدان دا, تەحنيكالىق جاعىنان دا شەبەرلىگىن مويىنداتىپ, قارسىلاسىن قاپىدا قالدىرىپ كەتتى. تورەشىلەر 8 راۋندتا دا مەيىرىم نۇرسۇلتانوۆتىڭ باسىمدىق تانىتقانىن ءبىراۋىزدان شەشتى. وسى جەڭىستەن كەيىن قازاقستاندىق بوكسشىنىڭ رەيتينگى بىرنەشە ساتىعا كوتەرىلدى.
وسىلايشا, «مەن اعام سەكىلدى الەم چەمپيونى بولامىن» دەگەن مەيىرىم اۋەسقوي بوكستان الەم جانە ازيا چەمپيونى اتانعان تۋعان اعاسى مەرەي اقشالوۆتىڭ جەڭىستى جولىن كاسىپقوي بوكس الەمىندە جالعاستىرۋدى ماقسات ەتەدى.
