شەرۋدە شەپ قۇراتىن اسكەردىڭ ەرتە قامدانىپ, باس قالادا باس قۇراعاندارىنا ەكى ايداي ۋاقىت بولدى. شاھار شەتىندە جايعاسقان جاۋىنگەرلەر اۋىلىنىڭ شىپىرلاعان شاتىرلارى الىستان كوزگە ۇرادى. ال قالىڭ قولدىڭ قادامدارىنىڭ ءدۇبىرى قارا كورىنىم جەردەن قۇلاققا انىق ەستىلەدى.قالام-قاعازىمىز بەن فوتواپپاراتىمىزدى سايلاپ, ەلەڭ-الاڭنان ەرتە كەلگەن ءبىز اسكەري شەرۋشىلەردىڭ شەكاراسىنا ەنگەننەن سوڭ, بىردەن پارمەندى داۋىس ەستىلگەن ايماققا قاراي بەت الدىق.
دايىندىق الاڭىنداعى شەپتىڭ الدىڭعى قاتارىن س.نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنىڭ ۇلاندارىنان جاساقتالعان بارابانشىلار باستاپ ءجۇردى. «استانا» وڭىرلىك قولباسشىلىعى اسكەرلەرىنىڭ قولباسشىسى قايدار قاراقۇلوۆتىڭ ايتۋىنشا, بيىل پارادقا جاسۇلاندىقتارمەن قاتار, باسقا دا اسكەري وقۋ ورىندارىنىڭ, اسكەري-پاتريوتتىق كلۋبتاردىڭ تاربيەلەنۋشىلەرى جانە اسكەري-تەحنيكالىق مەكتەپتەردىڭ وقۋشىلارى قاتىسادى.
جالپى ەلىمىزدىڭ قارۋلى كۇشتەرىنىڭ قۋاتىن كورسەتەتىن پارادتا 5 مىڭنان اسا سارباز ساپ تۇزەيدى. ولاردىڭ قاتارىندا وفيتسەرلەر, كەلىسىمشارت بويىنشا قىزمەت ەتەتىن اسكەريلەر, مەرزىمدى اسكەري قىزمەت جاۋىنگەرلەرى جانە اسكەري وقۋ ورىندارىنىڭ كۋرسانتتارى بار. ساربازداردىڭ ءبارى شامامەن 30 جاياۋ اسكەر پارادتىق ەسەپتوپ قۇرامىندا سالتاناتتى مارشپەن ءجۇرىپ وتەدى. وعان قوسا, 300-گە تارتا اسكەري تەحنيكا مەن 80-گە جۋىق ۇشۋ اپپاراتىن تاماشالايمىز.
ءوزىن وسكەمەن گارنيزونى 27943 اسكەري ءبولىمىنىڭ قاتارداعى جاۋىنگەرى مۇحامەدين سەيىتكەنوۆ دەپ تانىستىرعان سارباز اسكەرگە كەلگەنىنە جارتى جىلداي ۋاقىت بولعانىن, قارۋلى كۇشتەردىڭ قۇرىلعانىنا 25 جىل تولۋىمەن تۇسپا-تۇس كەلەتىن پارادقا قاتىساتىنىن ماقتانىش تۇتاتىنىن, دايىندىق جۇمىستارى وتە جاقسى ۇيىمداستىرىلعانىن, تاماقتارىنىڭ كوڭىلدەرىنەن شىعاتىنىن ايتىپ بەردى.ءبىز بارعان كۇنى اۋا رايىنىڭ قولايسىزدىعىنان جاتتىعۋ جۇمىستارى تۇسكە دەيىن جالعاستى. نەگىزى ەسەپتوپتار كۇنىنە 8-9 اينالىم جاساپ, قادامدارىن نىقتايدى. ولاردىڭ قاتارىندا نازىك جاندى اسكەريلەر دە بار.
– مەن ايەلدەردەن قۇرالعان توپتى باستاپ جۇرەمىن. بۇل جولى پارادقا جالپى 154 ايەل قاتىسادى. رەزەرۆتە تاعى 10 ادام بار. ولاردىڭ ءبارى ءارتۇرلى اسكەري قۇرىلىمداردان ىرىكتەلىنىپ الىندى. ءوزىم دە شەرۋگە ءبىرىنشى رەت قاتىسقالى تۇرمىن. سوندىقتان دايىندىق جۇمىستارىنا ەرەكشە ەكپىنمەن كىرىسىپ ءجۇرمىن, – دەدى پودپولكوۆنيك امانگۇل الدابەرگەنوۆا.
دالالىق لاگەردە 250-دەن استام شاتىر تىگىلگەن. ولاردىڭ ارقايسىسىنا 40 ساربازدان سىيادى. بۇعان قوسا, 12 شاتىر تاماقتانۋ ورنى ءۇشىن جاساقتالعان. ازىق-تۇلىك بولىمىنە جاۋاپتى نۇرلان شاقاشوۆتىڭ ايتۋىنشا, اسحانالار 15 ناۋرىزدان باستاپ قۇرىلا باستاپتى. بۇل جولعى اسكەري شەرۋگە ەلوردا اكىمدىگىنىڭ قاۋلىسىمەن 8 ءساۋىر مەن 8 مامىر ارالىعىندا استانا قالاسىنىڭ 50 اۋماقتىق قورعانىس بريگاداسى شاقىرىلدى. ولاردىڭ ءبارى پارادقا العاش رەت قاتىسقالى وتىر.
دۋلات ادىربەكوۆ, قۇرلىق اسكەرلەرى باس قولباسشىسىنىڭ تاربيە جانە يدەولوگيالىق جۇمىستار جونىندەگى ورىنباسارى, پولكوۆنيك:
– اسكەري شەرۋدە باستى ماقساتىمىز – قارۋلى كۇشتەردىڭ 25 جىلدا قالاي دامىعانىن, ەلىمىزدىڭ تاۋەلسىزدىگى مەن جەرىمىزدىڭ تۇتاستىعىن قورعاۋدا بىزگە جۇكتەلگەن مىندەتتەردى ورىنداي الاتىنىمىزدى كورسەتۋ. پارادقا قاتىسۋ ءۇشىن تاڭداۋلى قىزمەتشىلەر, بولىمدەر مەن بولىمشەلەر ىرىكتەلىنىپ الىندى. سونىمەن قاتار, شەرۋدە قارۋلى كۇشتەردىڭ قۇرىلۋىنىڭ باسىندا جۇرگەن ارداگەرلەر دە قاتىسادى.
ءداستۇر بويىنشا الاڭنان 5000-نان اسا ادام جانە 300-دەن استام تەحنيكا ءجۇرىپ وتەدى. سونداي-اق, استانا اسپانىنان اۋە پارادىن دا تاماشالايمىز. بيىلعى اسكەري شەرۋدىڭ ەرەكشەلىگى – قاتىسۋشىلار سانىنىڭ ارتۋىندا. بۇل – بۇرىن بولماعان جەكە قۇرام مەن تەحنيكانىڭ رەكوردتىق كورسەتكىشى.
قايدار قاراقۇلوۆ, «استانا» وڭىرلىك قولباسشىلىعى اسكەرلەرىنىڭ قولباسشىسى, پولكوۆنيك:
– اسكەري پارادقا دايىندىق ءساۋىر ايى نان باستالدى. دالالىق لاگەرگە 250-دەن استام شاتىر ورنالاسقان. وندا 4 مىڭنان اسا ادام تۇرىپ جاتىر. جالپى دايىندىق 18 ناۋرىزدان باستالدى. 27 ناۋرىزدان باستاپ نەگىزگى قۇرامدار كەلە باستادى. تەحنيكالاردى دا وسى ۋاقىتتان باستاپ الدىرتىپ, سوڭى 3 ساۋىردە كەلدى. قازىر ساربازدار دايىندىق الاڭىندا تۇسكە دەيىن 3 ساعات, تۇستەن كەيىن 3 ساعات ۋاقىت وتكىزىپ, ساپتىق جۇرىستەرىن ناقتىلاپ جاتىر.
ورىنبەك وتەمۇرات
