ەلوردانىڭ ءاربىر تۇرعىنى ءوزىنىڭ سايلاۋشىلار تىزىمىندە بار-جوعىن قالاي تەكسەرەدى جانە داۋىس بەرەتىن ۋچاسكەسىن قالاي تابادى؟ ۋاقىتشا تىركەلگەن نەمەسە تىركەلمەگەن ازاماتتار سايلاۋعا قاتىسا الا ما؟ وسىنداي ساۋالدارعا جاۋاپ بەرەلىك.
پارلامەنت ءماجىلىسىنىڭ جانە ءماسليحات دەپۋتاتتارىنىڭ كەزەكتى سايلاۋى 2021 جىلى 10 قاڭتاردا وتەدى. داۋىس بەرۋ ءراسىمى سايلاۋ ۋچاسكەسىنىڭ اۋماعىندا جەرگىلىكتى اتقارۋشى ورگاندار تىركەلگەن مەكەنجايلار بويىنشا قالىپتاستىرعان سايلاۋشىلار ءتىزىمى ارقىلى وتكىزىلەدى. بۇل تىزىمگە بەلسەندى داۋىس بەرۋ قۇقىعى بار, 18 جاسقا تولعان, ءوزىنىڭ ءىس-ارەكەتىنە جاۋاپ بەرەتىن, سوتتىڭ ۇكىمىمەن باس بوستاندىعىنان ايىرۋ مەكەمەلەرىنە قامالماعان قازاقستان رەسپۋبليكاسىنىڭ ازاماتتارى ەنگىزىلەدى.
ءوزىڭىڭ سايلاۋ ۋچاسكەسى تۋرالى ونلاين-اقپارات العىسى كەلەتىن ءار ادام جەكە سايكەستەندىرۋ ءنومىرىن (جسن), اتى-ءجونىن, تۋعان جىلىن, سايلاۋشى تىركەلگەن نىساندى (كوشە, ءۇي) كورسەتىپ, مىناداي قىزمەت تۇرلەرىنە جۇگىنە الادى:
ءوزىن سايلاۋشىلار تىزىمىنەن تابا الماعان ادام جەرگىلىكتى اتقارۋشى ورگانعا جازباشا ءوتىنىش جازادى. نۇر-سۇلتان قالاسىندا اۋدان اكىمدىكتەرى وتىنىشتەردى قابىلدايدى. ال ۋاقىتشا تىركەۋگە تۇرعان قازاقستاندىقتار دا جەرگىلىكتى اتقارۋشى ورگانعا بەرگەن ءوتىنىشى نەگىزىندە تىزىمگە ەنگىزىلەدى. ەگەر سايلاۋشى سايلاۋ وتەتىن كۇننەن 30 كۇن بۇرىن, ياعني 10 جەلتوقساننان كەشىكپەي ءوزى تىركەلگەن جەرى بويىنشا داۋىس بەرۋگە بارا المايتىنى بەلگىلى بولسا, ول ءوزى بارعان جەرىندە جەرگىلىكتى اتقارۋشى ورگانعا ءوتىنىش بەرىپ, ءتيىستى سايلاۋشىلار تىزىمىنە كىرە الادى. جەرگىلىكتى اتقارۋشى ورگان ءوز كەزەگىندە ونى تىركەلگەن جەرى بويىنشا تىزىمنەن شىعارىپ, داۋىس بەرەتىن جەرى بويىنشا تىزىمگە ەنگىزەدى. ءبىر ازامات تەك ءبىر تىزىمگە عانا قوسىلا الادى. ءار ادام ءوزىنىڭ تىزىمدە بار-جوعىن تەكسەرۋگە جانە دۇرىس ەنگىزىلمەگەن نەمەسە شىعارىلعان, سونداي-اق سايلاۋشى تۋرالى مالىمەتتەردە قاتەلىك كەتكەن جاعدايدا شاعىمدانۋعا قۇقىلى. جەكە باسىن كۋالاندىراتىن قۇجاتتى العان كەزدە ەلىمىزدىڭ ءاربىر 18 جاستاعى ازاماتى بەلسەندى سايلاۋ قۇقىعىنا يە بولادى. تۇرعىلىقتى جەرى بويىنشا تۇراقتى نەمەسە ۋاقىتشا تىركەۋ بولماعان جاعدايدا ازامات ونى سايلاۋشىلار تىزىمىنە ەنگىزۋ ءۇشىن جەرگىلىكتى اتقارۋشى ورگانعا داۋىس بەرۋگە ارنالعان ۋچاسكەنى تاڭداۋ تۋرالى وتىنىشپەن جۇگىنۋگە قۇقىلى.