ەلوردا اكىمىنىڭ ورىنباسارى باقتيار ماكەن مەديتسينالىق ۇيىمداردىڭ باسشىلارىمەن كەزدەسۋ وتكىزدى. جيىن بارىسىندا قالاداعى ەپيدەميولوگيالىق احۋال مەن دەنساۋلىق ساقتاۋ مەكەمەلەرىنىڭ ماسەلەلەرى تالقىلاندى.
دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆانىڭ ايتۋىنشا, بۇگىندە قالاداعى ەپيدەميولوگيالىق جاعداي تۇراقتى. دەسە دە قازىر نۇر-سۇلتان – «سارى» ايماقتا. 7 قاراشادان باستاپ اۋرۋ كورسەتكىشىنىڭ كۇن سايىن 0,3 پايىزعا ءوسۋى بايقالادى. وعان 8 اۋرۋحانا قامتىلعان, قازىر 318 ادام ورنالاسقان. ونىڭ 193-ءى (35%) – جۇقپالى اۋرۋلاردا, 125-ءى – كارانتيندە.
قالادا كۆي-گە بيوماتەريالداردىڭ سىنامالارىن الۋعا ارنالعان 16 زەرتحانا بار. ولاردىڭ جالپى قۋاتتىلىعى – كۇنىنە 11 مىڭنان استام زەرتتەۋ. سونىمەن قاتار بۇگىندە اۋرۋحانالار 100 پايىز يۆل اپپاراتتارىمەن قامتاماسىز ەتىلگەن. ءدارىحانالاردا ءدارى-دارمەكتەردىڭ ەكى ايلىق قورى بار.
6 قازان مەن 2 جەلتوقسان ارالىعىندا 257 رەيس, 31 436 جولاۋشى قابىلداندى. سونىڭ ىشىندە 4387 ادام كارانتيندىك اۋرۋحاناعا جاتقىزىلدى, 18-ءىنىڭ ناتيجەسى وڭ.
نۇر-سۇلتان اكىمىنىڭ ورىنباسارى ىندەتتىڭ تارالۋىن بولدىرماۋعا باعىتتالعان شارالاردى جالعاستىرۋ قاجەتتىلىگىنە نازار اۋداردى. ەمحانالار باسشىلىعىنا قىزمەتكەرلەر مەن پاتسيەنتتەردىڭ سانيتارلىق-دەزينفەكتسيالىق تالاپتاردى ساقتاۋى, جەكە قورعانىس قۇرالدارىنىڭ قولدانىلۋىنا قاتاڭ باقىلاۋدى قامتاماسىز ەتۋ, ناۋقاستاردىڭ كۇندەلىكتى اعىنىن دۇرىس ءبولۋ, پنەۆمونياعا كۇدىكتى ناۋقاستاردى جەدەل تۇردە كومپيۋتەرلىك توموگراف پەن كەۋدە قۋىسىنىڭ رەنتگەنوگرامماسىنا جىبەرۋ تاپسىرىلدى.
سونداي-اق قاشىقتان كەڭەس بەرۋ قىزمەتىنىڭ ساپاسىن ارتتىرۋ مەن ەمدەلۋشىلەردىڭ ەمحانالارعا كەلۋىن ازايتۋ ماسەلەلەرى كۇن تارتىبىنە قويىلدى. ءموبيلدى توپتار مەن پوليتسيا ءبولىمى ويىن-ساۋىق مەكەمەلەرىندە, ساۋدا ورتالىقتارىندا, دۇكەندەر مەن بازارلاردا سانيتارلىق قاۋىپسىزدىك پەن سانيتارلىق تالاپتاردىڭ ساقتالۋىن باقىلاۋدى كۇشەيتەدى.
