قر سىبايلاس جەمقورلىققا قارسى ءىس-قيمىل اگەنتتىگىنىڭ نۇر-سۇلتان قالاسى بويىنشا دەپارتامەنتىنىڭ باسشىسى شىڭعىس قابدۋلا 1,5 ميلليارد تەڭگە كولەمىندەگى سىبايلاس جەمقورلىق قىلمىستارى تۋرالى ايتتى.
1,5 ميلليارد تەڭگە كولەمىندەگى اقشا الاياقتىعىنا قر ەنەرگەتيكا مينيسترلىگىنىڭ جانە بىرقاتار وبلىس اكىمدىكتەرىنىڭ جوعارى لاۋازىمدى تۇلعالارىنىڭ قاتىسى بار. شەنەۋنىكتەردىڭ زاڭسىز ارەكەتتەرىنىڭ كەسىرىنەن قازاقستاننىڭ بىرنەشە وبلىستارىنا, سونىمەن بىرگە الماتى, نۇر-سۇلتان قالالارىنا الەۋمەتتىك وتىن دۇرىس جەتكىزىلمەگەن.
الەۋمەتتىك وتىن كولەمىن ءبولىپ-تاراتۋ كەزىندە شەنەۋنىكتەر رەسپۋبليكانىڭ ىشكى نارىعىنا گاز جەتكىزۋ جوسپارىنا قاساقانا جالعان اقپارات ەنگىزگەن. سحەما 2019 جىلدان 2020 جىلعا دەيىن ءۇزىلىسسىز جۇمىس ىستەپ كەلگەن. ناتيجەسىندە پاۆلودار, شىعىس قازاقستان, الماتى, جامبىل وبلىستارىنا وتىن جەتكىلىكتى دەڭگەيدە بولىنبەگەن, سونداي-اق نۇر-سۇلتان جانە الماتى قالالارىنا كەلتىرىلگەن شىعىن كولەمى 1,5 ميلليارد تەڭگەنى قۇراپ وتىر.
سونىمەن قاتار بۇل ىسكە قاتىستى كەيبىر ادامدار اقتاۋ مەن تاراز قالالارىنان بىرقاتار كاسىپكەرلىك سۋبەكتىلەرىنەن جەتكىزىلگەن گاز كولەمىن زاڭسىز اسىرىپ جىبەرگەنى ءۇشىن جانە جەتكىزۋشى-ءوندىرۋشىنى اۋىستىرعانى ءۇشىن جۇيەلى تۇردە پارا الىپ وتىرعان دەگەن كۇدىككە ءىلىنىپ وتىر.
ماسەلەن, ماڭعىستاۋ وبلىسىنىڭ قاجەتتى 3,4 مىڭ توننا كولەمىندەگى كوگىلدىر وتىندى قاراعاندى وبلىسىنىڭ اۋماعىنا 252 ميلليوننان استام تەڭگەگە ساتقان. ال سوڭعى تۇتىنۋشى ياعني قاراپايىم حالىق گازدى باستاپقى باعاسىنان ءۇش ەسە جوعارى باعامەن ساتىپ العان. سونداي-اق كۇدىكتىلەردىڭ ءبىرى – قازاقستان رەسپۋبليكاسى پرەمەر-مينيسترى كەڭسەسىنىڭ قىزمەتكەرى ەكەنى ايتىلدى. قازىرگى ۋاقىتتا ىسكە قاتىسى بار ەكى ادام ۋاقىتشا قاماۋعا الىندى.
