نۇر-سۇلتان قالاسىندا «ماڭگىلىك ءداستۇر مەن سالت-سانانىڭ سايكەستىگى» تاقىرىبىندا كورمە ءوتتى. «رۋحاني جاڭعىرۋ» باعدارلاماسى اياسىندا وتكەن شارانى «تاريح جانە مادەني مۇرا ورتالىعى «I – QAZAQ» قوعامدىق قورى مەن نۇر-سۇلتان قالاسىنىڭ «رۋحاني جاڭعىرۋ» جوبالىق كەڭسەسى ۇيىمداستىردى.
جاستارعا قازاق مادەنيەتىن ناسيحاتتاۋ, ۇلتتىق ونىمدەردى تانىستىرۋ ماقساتىندا وتكەن شاراعا جوعارى وقۋ ورىندارىنىڭ تۇلەكتەرى قاتىسىپ, شەبەرلەر قولىنان شىققان قازاقى بۇيىمدارمەن تانىستى. بۇرىنعىعا مۇراگەر, كەيىنگىگە بۇيداگەر بولعان شەبەرلەر ولارعا كەستەلى اشەكەي بۇيىمداردىڭ تىگىلۋ ءادىسىن تانىستىردى.
– بۇگىنگى كورمەنىڭ كولەمى شاعىن بولعانىمەن, ۇرپاقتارعا بەرەتىن تاربيەسى مول. ويتكەنى ۇلتىمىزدىڭ قولونەرىن, اسىرەسە, قازاق ايەلدەرىنىڭ قولىنان شىققان ۇلتتىق بۇيىمداردى زامانعا ساي دارىپتەپ, ناسيحاتتاپ وتىرماسا, ءداستۇر جالعاسى ۇزىلەدى. مەن ءوزىم سۋرەتشى بولسام دا, قولونەر بۇيىمدارىن تىگۋمەن اينالىسقانىما وتىز جىلدان استى. بۇگىن ءوز قولىمنان شىققان ونىمدەردى جاستارعا تانىستىرۋ قۇرمەتىنە يە بولدىم. ۇلتتىق قۇندىلىقتى ۇلىقتاعان وسىنداي ءىس-شارالار كوبەيە بەرسىن, – دەدى ون ساۋساعىنان ونەر تامعان قولونەر شەبەرلەرىنىڭ ءبىرى ۇكىجان قالياقپارقىزى.
