كەشە استانا قالاسىنىڭ اكىمى يمانعالي تاسماعامبەتوۆ سانكت-پەتەربۋرگ گۋبەرناتورى گەورگي پولتاۆچەنكو باستاعان دەلەگاتسيانى قابىلدادى.
كەزدەسۋدە ەلوردا اكىمى رەسەي مەن قازاقستان اراسىنداعى ىنتىماقتاستىق ەجەلدەن قالىپتاسقانىن, سانكت-پەتەربۋرگ سەكىلدى ونەركاسىبى قارقىندى دامىعان شاھاردان استانانىڭ ۇيرەنەرى مول ەكەندىگىن جەتكىزدى.
-استانا – جاس قالا. سوعان قاراماستان قارقىندى دامىپ كەلەدى. ءبىزدىڭ ەكونوميكانىڭ نەگىزگى ۇلەسى – كاسىپكەرلىكتە. بۇگىندە ءار بەسىنشى ەلوردالىق كاسىپكەرلىكتى ءناسىپ ەتكەن. از ۋاقىتتىڭ ىشىندە ىشكى جالپى ءونىم دە, قۇرىلىس سالاسى دا وركەن جايدى. ەلوردا حالقىنىڭ سانى ءۇش ەسەگە ءوسىپ, 800 مىڭنان الدەقاشان استى. پەتەربۋرگ سياقتى ءبىزدىڭ استاناعا دا وزگە وڭىرلەردەن اعىلاتىن ادامدار كوپ. ورتاشا ەسەپپەن العاندا, ولاردىڭ سانى جىلىنا 50 مىڭعا جۋىقتايدى. ەگەر وسى قارقىنمەن جالعاسا بەرسە,كوپ ۇزاماي باس شاھاردىڭ تۇرعىندارى 1 ميلليونعا جەتەدى, – دەدى يمانعالي نۇرعاليۇلى.
ال وزدەرىنە دەگەن جىلى ىقىلاسىنا ريزاشىلىعىن بىلدىرگەن سانكت-پەتەربۋرگ گۋبەرناتورى گەورگي پولتاۆچەنكو قازاقستاننىڭ جاس ەلورداسى قارقىندى دامىپ كەلە جاتقانىنان حاباردار ەكەندىگىن, وسى ۇردىستەن تانباي, كەڭ قانات جايۋىنا تىلەكتەستىك ءبىلدىردى. بۇدان كەيىن ءوزى باسقارىپ وتىرعان ەجەلگى شاھاردىڭ الەۋمەتتىك-ەكونوميكالىق جاعدايىنا توقتالدى. بۇگىندە پەتەربۋرگ ەكونوميكاسىنىڭ نەگىزگى بولىگىن – ونەركاسىپ سالاسى قۇرايدى. اسىرەسە, ماشينا جاساۋ جاعىنان بۇل شاھار رەسەيدىڭ الدىڭعى قاتارىنان كورىنىپ كەلەدى. وتكەن جىلدىڭ وزىندە پيتەرلىكتەر 390 مىڭعا جۋىق «نيسسان», «تويوتو», «حۋنداي» ماركالى جەڭىل كولىكتەرىن قۇراستىرىپ شىعارىپتى.
– پەتەربۋرگ ءىرى مەگاپوليس بولعاندىقتان قوردالانىپ جاتقان ماسەلەلەرى دە جەتكىلىكتى. اسىرەسە, بايىرعى قالانىڭ جەر استى ينجەنەرلىك جەلىلەرى, جىلۋ, جارىق قۇرىلعىلارى كەيدە قارقىنعا ىلەسە الماي جاتادى. بىراق ماسەلەنى نەعۇرلىم ءتيىمدى شەشۋ جاعىن قاراستىرامىز. مىسالى, ەنەرگيانى ۇنەمدەيتىن تەحنولوگيالاردى ءبىز دە تاجىريبەمىزگە ەنگىزۋدەمىز, – دەدى گۋبەرناتور.
ول سونداي-اق, سانكت-پەتەربۋرگتىڭ كورىكتى اۋداندارىنىڭ بىرىندە «استانا» اتتى ساۋدا-ىسكەرلىك ءۇيى بوي كوتەرەتىنىن, جەرى مەن رۇقسات قاعازدارى باستان-اياق دايىن تۇرعانىن قۋانا جەتكىزدى.
بۇدان كەيىن قوس تاراپ 2013-2015 جىلدارعا ارنالعان ساۋدا-ەكونوميكالىق, عىلىمي-تەحنيكالىق, مادەني جانە گۋمانيتارلىق كەلىسىم تۋرالى قۇجاتقا قول قويدى. وندا قالا قۇرىلىسى, كوممۋنالدىق شارۋاشىلىق, ينجەنەرلىك ينفراقۇرىلىمدى وركەندەتۋ, دەنساۋلىق , مادەنيەت سەكىلدى سان سالاداعى ءوزارا ىنتىماقتاستىقتى دامىتۋ ماسەلەلەرى قامتىلعان. سونداي-اق, استانا مەن سانكت-پەتەربۋرگتە ءوزارا جاراسىمدى بايلانىسقا دانەكەر بولاتىن اقپاراتتىق ىسكەرلىك ورتالىقتارىن اشىپ, ارنايى كورمەلەر ۇيىمداستىرۋدى قولعا الماق.
قوس تاراپتىڭ ءوزارا جاراسىمدى بايلانىسىنىڭ تاعى ءبىر كورىنىسى رەتىندە قالا جانە ساۋلەت قۇرىلىسى سالاسىنداعى ارىپتەستىكتى اتاپ وتۋگە بولادى. وتاندىق ماماندارىمىز پەتەربۋرگكە بارىپ, وندا قولدانىلىپ جاتقان يننوۆاتسيالىق تەحنولوگيالاردى يگەرىپ قايتادى.
ەلوردا اكىمى يمانعالي تاسماعامبەتوۆ سانكت-پەتەربۋرگتەن كەلگەن مەيماندارعا استانانىڭ كورنەكتى ورىندارى: «استانا وپەرا» مەملەكەتتىك وپەرا جانە بالەت تەاترىن, نازارباەۆ ۋنيۆەرسيتەتىن, تاۋەلسىزدىك سارايىن, استانا ۋسپەنسك كافەدرالدى سوبورىن, بايتەرەك مونۋمەنتى مەن «ەۆروكوپتەر كازاحستان ينجينيرينگ» تىكۇشاقتارىن جيناۋ مەن قىزمەت ەتۋ زاۋىتىن ارالاتىپ, تانىستىردى.
قىمبات نۇرعالي
