وسى ايدا كينوتەاترلارعا جول تارتقان وتاندىق «قارجىگەر. شىعۋ ويىنى» ءفيلمى 2018 جىلدىڭ تاڭداۋلى كوممەرتسيالىق كينوكارتينالارىنىڭ بىرىنە اينالاتىنى ءسوزسىز. نەلىكتەن؟
ديناميكالىق سيۋجەت. قور بيرجالارىندا قوماقتى قارجىمەن اينالىساتىن ەكى دوستىڭ شيەلەنىسكە تولى وقيعاسى كورەرمەننىڭ نازارىن ۇستاپ وتىرادى. دراماتۋرگيالىق توسىن بۇرىلىستاردان «ارى قاراي نە بولار ەكەن؟» دەگەن سۇراق كورەرمەندەردى مازالايتىنى انىق. قولدانىلعان دەتالدار كورەرمەنگە كەيىپكەردىڭ بولمىسىن اشۋعا كومەكتەسەدى. فيلمدەگى سوڭعى ەپيزودتاردىڭ بىرىندەگى تايرعا ۇسىنىلاتىن ەسىرتكى مەن قاعاز اقشانى قىراعى كورەرمەن بولماسا, كوپشىلىك ونىڭ نە ءۇشىن قويىلعانىن اڭعارماي قالۋى ابدەن مۇمكىن.
ۇقساستىق. كوپتەگەن كورەرمەن ءفيلمدى امەريكالىق «ۋولل-ستريتتەگى كوكجال» («The Wolf of Wall Street») كارتيناسىمەن ۇقساستىرادى. ءيا, فورماتى, سيۋجەتى ۇقساۋى مۇمكىن. بىراق «قارجىگەر»-ءدىڭ وزىندىك ستيليستيكاسى مەن ايتارى بار. ەكى فيلمدەگى ايىرماشىلىق – وتاندىق فيلمىمىزدە قازاقي مەنتاليتەت بوي كوتەرەدى. «باكەنىڭ» ىقپالى, جاقىن ادامدارىڭا كومەك قىلۋ سىندى وزىمىزگە ءتان ەرەكشەلىكتەردى كورەمىز. «ۋولل-ستريت» فيلمىندەگىدەي شەكتەن تىس انايى ساحنالار كەزدەسپەيدى. «قارجىگەر» ءفيلمى كورەرمەنگە وي تاستاسا, «ۋولل-ستريت» ءفيلمى ءبارى دە سونشالىقتى وڭاي نەمەسە سونشالىقتى قيىن بولۋى مۇمكىن دەگەن تۇجىرىم بەرەدى.
ءبىر اتتەگەن-ايى. تاير مەن الميرانىڭ جەلىسى تولىق اشىلماعان. سونداي-اق بىرنەشە فينالدىڭ بولۋى كورەرمەندەردى تۇسىنىكسىز سەزىمگە بولەيدى. ونىڭ ءبىر دالەلى – ءفيلمنىڭ سوڭىنداعى مۋزىكانىڭ ورىنسىز قولدانىلۋى.
تىڭ باعىت. 2018 جىلى 20-عا جۋىق كوممەرتسيالىق كارتينالار تاسپالاندى. سولاردىڭ ىشىنەن تاقىرىبى مەن تەحنيكالىق جاعىنان ىلگەرى تۇرعان دراما جانرىنداعى «التىنشى پوست», «امىرە» سىندى تۋىندىلاردى عانا ەسكە تۇسىرە الامىز. كومەديالاردىڭ سانى كوپ بولعانىمەن, ساپاسى اقساڭداپ تۇرعانى كوپكە ءمالىم. وسى جىلعى كريمينالدى دراما جانرىندا جارىققا شىققان العاشقى كينوكارتينانىڭ ۇزدىكتەر قاتارىنان تابىلۋ سەبەبى – مامانداندىرىلعان كينوگەرلەردىڭ بىرىگۋىندە. دەبيۋتانت-رەجيسسەر ەلەنا ليساسينا جانە ستسەناري اۆتورى دميتري بوگومولوۆ بمكي (ۆگيك) – تۇلەكتەرى. ساتىبالدى نارىمبەتوۆتىڭ كوركەمدىك جەتەكشىلىگى مەن اننا چاكيرتوۆانىڭ پروديۋسەر-كەڭەسشىلىك قىزمەتى ءفيلمنىڭ بارىنشا ساپالى شىعۋىنا اسەر ەتكەندەي. باس پروديۋسەر ەربولات بايگانيننىڭ قارجىگەر مامان بولعانى – اكتەر, رەجيسسەردىڭ جۇمىسىن جەڭىلدەتكەنى ءسوزسىز. سوڭعى جىلدارى كورەرمەنگە جول تارتقان قازاق كينوكارتينالارىندا سيرەك كەزدەسەتىن تازا دىبىس, شەبەر جاسالعان دۋبلياج ءفيلمنىڭ ساپاسىن جوعارىلاتىپ تۇر.
اكتەرلەردىڭ جاڭا قىرى. جاڭا ەر ادامدىق تاماشا دۋەت پايدا بولدى. اسىلحان تولەپوۆ جاڭا قىرىنان اشىلدى. اتقا شاۋىپ, ساداق اتقان جەتكىنشەكتەن تاماشا ۇيىمداستىرۋشى, ساۋدا ادامىن كورگەنىمىزدە اسىلحاننىڭ جاڭا دەڭگەيگە كوتەرىلگەنىن بايقادىق. سونداي-اق تەاتر جانە كينو اكتەرى شىڭعىس كاپيننىڭ كينوداعى العاشقى باستى ءرولى اۋىز تولتىرىپ ايتارلىقتاي ءساتتى بولىپ شىقتى. بىلتىرعى جىلدىڭ «نەدەليموە» كريمينالدىق دراماسىندا دا جاقسى ناتيجە كورسەتكەن اكتەردىڭ كەزەكتى ءرولى ونىڭ «وڭ جامباسىنا» كەلىپ, جوعارعى دەڭگەيدە الىپ شىقتى. ودان بولەك, ءفيلمنىڭ بارىنشا شىنايى شىعۋىنا ۇلكەن اسەر ەتكەن باقىتجان الپەيىسوۆ, الدابەك شالباەۆ سىندى قازاق كينوسىنىڭ اعا بۋىن وكىلدەرىمەن قوسا, جاڭادان پايدا بولعان كونسيلەري بەينەسى ەرەكشە سەزىمگە بولەيدى. فيليپپ ءۆولوشيننىڭ سومداۋىنداعى كونسيلەري بەينەسى ەستە قالارلىق. اكتەردىڭ وبرازدى ءدال, ناقىشىندا سومداۋى سونشالىقتى – ءۆولوشيننىڭ كەيىپكەرى ەكراندا پايدا بولعاندا دەنەڭىزدەن سۋىق ءدىرىل ءجۇرىپ ءوتۋى بەك مۇمكىن.
ءتۇيىن. ۇلكەن ەكراندى جاۋلاپ العان ارزان كومەديالاردان ەرەكشەلەنەتىن «قارجىگەر. شىعۋ ويىنى» كارتيناسىنىڭ جارىققا شىعۋى – قازاق كوممەرتسيالىق ونىمدەرىنىڭ ءبىر ساتىعا جوعارىلاعانىنىڭ دالەلى. ارينە, بۇل كوڭىل قۋانتارلىق جايت.
ەڭلىك ەگەۋباەۆا
قازاق ۇلتتىق ونەر
ۋنيۆەرسيتەتىنىڭ ستۋدەنتى
