ەل ىشىندە «مەديتسينالىق ساقتاندىرۋسىز» كومەك الۋ مۇمكىن ەمەس دەگەن قاتە پىكىر بار. الەۋمەتتىك مەديتسينالىق ساقتاندىرۋ قورى ءمامس جۇيەسىندە ساقتاندىرىلماعان پاتسيەنتتەر دە مەديتسينالىق كومەك الاتىندىعىن ايتادى.
ءمامس جۇيەسىندە «ساقتاندىرىلماعان» پاتسيەنتتەرگە تەگىن مەديتسينالىق كەپىلدەندىرىلگەن كومەك كولەمىندە (تمككك) قاراستىرىلعان مەديتسينالىق قىزمەت تۇرلەرى ۇسىنىلادى. ال تمككك كىمگە تيەسىلى؟ بۇل كومەك اقىسى بيۋدجەت قاراجاتىنان تولەنەدى جانە ولاردى قر ازاماتتارى, قانداستار, بوسقىندار, قر اۋماعىندا تۇراقتى تۇراتىن (جانە تۇرۋعا ىقتيارحاتى بار) شەتەلدىكتەر, قر اۋماعىندا تۇراقتى تۇراتىن (جانە تۇرۋعا ىقتيارحاتى بار) ازاماتتىعى جوق ادامدار الا الادى. قازاقستاندا ۋاقىتشا بولاتىن شەتەلدىكتەر مەن ازاماتتىعى جوق ادامدار, پانا ىزدەگەن ادامداردىڭ اينالاسىنداعىلارعا قاۋىپ توندىرەتىن اۋرۋلارى بولعان كەزدە تمككك اياسىندا مەديتسينالىق كومەك الۋعا قۇقىلى.
«ەگەر سىزگە شۇعىل كومەك قاجەت بولىپ, ءمامس جۇيەسىندە ساقتاندىرۋ مارتەبەڭىز جوقتىعىن العا تارتىپ, مەديتسينالىق كومەك كورسەتۋدەن باس تارتسا, دارىگەرگە پاتسيەنتتىڭ ءوز قۇقىقتارى تۋرالى مالىمدەپ, ولاردىڭ ساقتالۋىن تالاپ ەتۋ قاجەت. قوردىڭ ەلوردا فيليالىنا وسى مازمۇنداس ءوتىنىش-شاعىمدار دا ءجيى تۇسەدى. سوندىقتان ازاماتتار ءوز قۇقىقتارىن بىلسە ەكەن دەيمىز» دەپ اتاپ ءوتتى امسق ەلوردا فيليالىنىڭ ديرەكتورى نۇرلىبەك قابدىقاپاروۆ.
تەگىن مەديتسينالىق كومەكتىڭ كەپىلدىك بەرىلگەن كولەمىنە جەدەل جاردەم قىزمەتتەرى جاتادى, ونىڭ ىشىندە بەلگىلى ءبىر جاعدايلاردا مەديتسينالىق اۆياتسيا شاقىرتىلادى. سونىمەن قاتار مەديتسينالىق-سانيتارلىق العاشقى كومەك قىزمەتتەرى جاتادى. ونىڭ ىشىندە ەڭ كوپ تارالعان اۋرۋلاردى دياگنوستيكالاۋ, ەمدەۋ جانە قاداعالاۋ, حالىقتىڭ نىسانالى توپتارىن (بالالاردى, ەرەسەكتەردى) پروفيلاكتيكالىق تەكسەرۋ, يممۋنداۋ (ۆاكتسيناتسيا), سالاۋاتتى ءومىر سالتىن قالىپتاستىرۋ جانە ناسيحاتتاۋ, ۇرپاق جاڭعىرتۋ دەنساۋلىعىن قورعاۋ جونىندەگى ءىس-شارالار, جۇكتى جانە بوسانعاننان كەيىنگى كەزەڭدە ايەلدەردى باقىلاۋ, ينفەكتسيالىق اۋرۋ وشاقتارىنداعى سانيتارلىق ەپيدەمياعا قارسى جانە سانيتارلىق-پروفيلاكتيكالىق ءىس-شارالار بار.
تمككك كولەمىندە سونداي-اق امبۋلاتورلىق جاعدايدا مامانداندىرىلعان مەديتسينالىق كومەك, ستاتسيوناردى الماستىراتىن جاعدايدا مامانداندىرىلعان مەديتسينالىق كومەك, ستاتسيونارلىق جاعدايداعى مامانداندىرىلعان مەديتسينالىق كومەك, مەديتسينالىق وڭالتۋ, ءپاللياتيۆتى مەديتسينالىق كومەك, مامانداندىرىلعان مەديتسينالىق كومەك كورسەتۋ كەزىندە مەديتسينالىق كورسەتىلىمدەر بولعان كەزدە قان پرەپاراتتارىمەن جانە ونىڭ كومپونەنتتەرىمەن قامتاماسىز ەتۋ, امبۋلاتورلىق, ستاتسيوناردى الماستىراتىن جانە ستاتسيونارلىق جاعدايلاردا مامانداندىرىلعان مەديتسينالىق كومەك كورسەتۋ كەزىندەگى پاتولوگيالىق-اناتوميالىق دياگنوستيكا, قازاقستاندىقتاردى شەتەلگە ەمدەلۋگە جىبەرۋ جانە (نەمەسە) وتاندىق مەديتسينالىق ۇيىمداردا ەمدەلۋ ءۇشىن شەتەلدىك مامانداردى تارتۋ, دارىلىك زاتتارمەن, مەديتسينالىق بۇيىمدارمەن, مامانداندىرىلعان ەمدىك ونىمدەرمەن, يممۋندىق-بيولوگيالىق دارىلىك پرەپاراتتارمەن قامتاماسىز ەتۋ قىزمەتتەرى كورسەتىلەدى. جوعارىدا اتالعان جاعدايلار بويىنشا مەديتسينالىق مەكەمە سىزگە تەگىن كومەك كورسەتۋدەن باس تارتپاۋى ءتيىس.
قوسىمشا سۇراقتار تۋىنداعان جاعدايدا ەمحانانىڭ انىقتاما قىزمەتىنە نەمەسە پاتسيەنتتەردى قولداۋ قىزمەتىنە حابارلاسۋعا بولادى. ەگەر ول جەردە شەشىمىن تاپپاسا, الەۋمەتتىك مەديتسينالىق ساقتاندىرۋ قورىنا fms.kz رەسمي سايتى, 1406 بايلانىس ورتالىعى, Qoldau 24/7 ءموبيلدى قوسىمشاسى جانە Telegram-داعى SaqtandyryBot سەكىلدى وزىڭىزگە ىڭعايلى بايلانىس ارناسى ارقىلى حابارلاسىڭىز.
«امسق» كەاق نۇر-سۇلتان قالاسى بويىنشا فيليالىنىڭ
ءباسپاسوز قىزمەتى
