استانادا ايازدىڭ بەتى قايتپاي تۇر. قازگيدرومەت ورتالىعىنىڭ ماماندارىنىڭ مالىمەتىنشە, الداعى بىرنەشە كۇن بويى ەلىمىزدىڭ باسىم اۋماعى ءالى دە باتىس سىبىرلىك انتيتسيكلون ىقپالىندا بولماق. ياعني, 20 قاراشاعا دەيىن اياز بولادى دەگەن ءسوز.
وسىعان بايلانىستى كەشە ەلوردا مەكتەپتەرىندە 1-9-سىنىپ وقۋشىلارىنىڭ ساباعى توقتاتىلدى. استانا قالالىق ءبىلىم باسقارماسىنىڭ حابارلاۋىنشا, قىسقى كەزەڭدەگى اۋا رايىنىڭ قولايسىز جاعدايلارىنا بايلانىستى قالا بويىنشا ءبىلىم مەكەمەلەرىندە (جالپى ءبىلىم بەرەتىن مەكتەپتەر, كوللەدجدەردىڭ 1-2-كۋرس ستۋدەنتتەرى ءۇشىن) ساباق مىناداي جاعدايلاردا بولمايدى:
– 25 گرادۋس جانە ودان تومەندەپ, جەل سەكۋندىنا 2 مەتر جانە ودان جوعارى بولسا, 1-4-سىنىپ وقۋشىلارىنا;
– مينۋس 30 گرادۋس جانە ودان تومەن, جەل سەكۋندىنا 2 مەتر جانە ودان جوعارى بولسا, 1-9-سىنىپ وقۋشىلارىنا;
– مينۋس 35 گرادۋس جانە ودان تومەن, جەل سەكۋندىنا 2 مەتر جانە ودان جوعارى بولسا, مەكتەپتىڭ 1-11-سىنىپ وقۋشىلارى مەن كوللەدجدەردىڭ 1-2-كۋرس ستۋدەنتتەرىنە ساباق بولمايدى.
ساباقتىڭ بولمايتىنى تۋرالى اقپاراتتى تاڭعى ساعات 6.45-7.00, ەكىنشى اۋىسىم بويىنشا اقپاراتتى تۇسكى ساعات 12.15-12.30 ارالىعىندا «الما تۆ», «31 ارنا», «ستۆ» تەلەارنالارىندا جۇگىرتپە جولدار جانە «الما تۆ» اقپاراتتىق كابەلدى ارناسىنداعى حابارلاندىرۋدان, سونداي-اق «حابار», «قازاقستان» ۇلتتىق ارناسى, «ەۋرازيا» ءبىرىنشى ارناسى», «استانا تۆ», «كتك», «نتك» تەلەارنالارى مەن «استانا راديوسى», «رەترو FM», «قازاقستان-رۆ», «اۆتوراديو», «شالقار» راديولارى ارقىلى بىلۋگە بولادى.
«169» (اقىلى), «109» (تەگىن) نومىرلەرىنە ۇيالى تەلەفوننان حابارلاسۋ ارقىلى دا اقپارات الا الاسىز.
«سونىمەن قاتار, «Smart Astana» موبيلدى قوسىمشاسى, www.e.astana.kz استانا قالاسى اكىمدىگىنىڭ ەلەكتروندى قىزمەتتەر پورتالى مەن www.bilim.astana.kz استانا قالاسى ءبىلىم باسقارماسىنىڭ سايتىنا نازار اۋدارىپ, مەكتەپ كەزەكشىسى, سىنىپ جەتەكشىسىنە, مەكتەپ اكىمشىلىگىنە حابارلاسۋعا بولادى. اتا-انالاردى مۇقيات بولۋعا شاقىرامىز. قىس مەزگىلىندە اۋا رايىنىڭ سۋىقتىعىن ەسكەرىپ, بالالارىڭىزعا جىلى كيىنۋدى, اقپاراتتى ۋاقىتىلى تىڭداۋىن قاتاڭ تاپسىرۋلارىڭىزدى سۇرايمىز» دەلىنگەن اكىمدىك حابارلاماسىندا.
بۇركىت نۇراسىل
