بيىلعى جازدىڭ جايماشۋاق كۇندەرىندە استانالىقتار سەمەي وبلىستىق ولكەتانۋ مۇراجايىنىڭ فوتوكورمەسىن, قاراشا ايىنىڭ باسىندا اياگوزدىك اعاشقا ويىپ سۋرەت سالۋ ونەرىنىڭ شەبەرى قاليبەك ايناجاروۆتىڭ تۋىندىلارىن تاماشالاي السا, قىركۇيەكتىڭ ورتاسىندا كوكپەكتى, گلۋبوكوە, بورودۋليحا اۋداندارىنان ەلورداعا جەتكىزىلگەن اۋىل شارۋاشىلىعى ونىمدەرىن ساتىپ الۋعا مۇمكىندىك الدى. ال, 20-22 جەلتوقسان ارالىعىندا, «كارى قۇدا» – قىس «باسقان جەرىن سىقىرلاتىپ كەلىپ قالعاندا», وسى ايتىلعانداردىڭ قورىتىندىسى ىسپەتتەس شىعىس قازاقستان وبلىسىنىڭ استاناداعى كۇندەرى ءوتتى.
«شۇعىلالى شىعىستان – ارايلى استاناعا»
شىعىسقازاقستاندىق ونەر شەبەرلەرى «كونگرەسس حولل» سارايىن اسەم سازعا تولتىرىپ, وسىنداي اتاۋمەن استانالىق كورەرمەنگە كونتسەرت ۇسىندى. حالىقارالىق, رەسپۋبليكالىق بايقاۋلاردىڭ لاۋرەاتتارى ءان سالىپ, بيبىگۇل تولەگەنوۆا, روزا رىمباەۆا سەكىلدى داڭقتى جەرلەستەرىنىڭ زاڭدى ءىزباسارلارى ەكەندىكتەرىن دالەلدەدى.
باقسى سارىندارى مەن اڭداردىڭ دىبىسى ارالاسقان التاي اۋەنىمەن اشىلعان كونتسەرت كۇمبىرلەگەن كۇيگە ۇلاستى. قۇرمانعازىنىڭ تىڭداعان جانعا جىگەر بەرەتىن «ادايىن», نۇرعيسا تىلەنديەۆتىڭ ويناقى «بالا ميشكاسىن», ت.ب. حالىق اراسىنا تانىمال كۇيلەردى كورەرمەن جازباي تانىپ, اتتارىن اتاپ وتىردى. مادەنيەت سالاسىنىڭ ۇزدىگى بەرىك وماروۆ اسەت نايمانباەۆتىڭ «ءىنجۋ-مارجانىمەن» جەردى اسپانداعى اققۋمەن تىلدەستىرىپ, اسەم انگە بولەدى.
كاميللا تۋكانوۆا جاقىندا باس شاھارىمىزعا قوناق بولىپ كەلگەن بەلگىلى كومپوزيتور الەكساندر زاتسەپيننىڭ «ۆەسەنني ۆالس» ءانىن شىرقادى. بۇل ءاندى كەزىندە ا.زاتسەپيننىڭ كۋرستاسى بيبىگۇل تولەگەنوۆا سالعان.
ءشامشى قالداياقوۆ اتىنداعى حالىقارالىق بايقاۋدىڭ لاۋرەاتى نۇرگۇل قابدوللاەۆا جانە گۇلدانا نوعايباەۆا جۇرتتى ءوز ونەرىمەن ءتانتى ەتتى.
مادەنيەت قايراتكەرى عيبرات ازۋباەۆ ب.تاجىباەۆتىڭ «اقبۇلاعىمەن» زال ءىشىن دۇبىرگە بولەدى. ەلباسى نۇرسۇلتان نازارباەۆتىڭ سوزىنە جازىلعان ت.مۇحامەدجانوۆتىڭ «گورود موي» ءانىن قازاقستان رەسپۋبليكاسىنىڭ ەڭبەك سىڭىرگەن ءارتىسى ۆياچەسلاۆ تكاچ ورىندادى.
شىعىس قازاقستان ونەرپازدارىنىڭ اراسىندا قازاقشا ءان سالاتىن وزگە ۇلت وكىلدەرى كوپ ەكەن. ەۆگەنيا لوجكينا ە.حاسانعاليەۆتىڭ «اڭساعانىم», ەۆگەني ۆىبلوۆ ە.سەرىكباەۆتىڭ «العا, قازاق جىگىتتەرى», راديون نەمتسەۆ پەن يانا مۋراتوۆانىڭ دۋەتى «اينالايىن» ءانىن اۋەلەتتى. «لادۋشكي» فولكلورلىق توبىنىڭ قازاق جانە ورىس حالىق اندەرىنەن قۇرالعان پوپۋرري ەل كوڭىلىن كوتەردى.
ت.راحيموۆتىڭ ەلدى ساعىندىرعان «التايدىڭ ارجاعىنان كەلگەن ارۋىن» تامىلجىتقان مەدەت قاليحايدارعا زال دۋ قول شاپالاق سوقتى.
تەك تانىمال اندەر شىرقالماي, شىعىس جەرىن سيپاتتايتىن ورالحان كوشەروۆتىڭ «وسكەمەنىم» ءانىن «گاۋھارتاس» تريوسى, «شىعىسىم – جۇماق مەكەنىم» ءانىن ەرشات قايىرحان سالدى. تانىمال كۇيشى-كومپوزيتور سەكەن تۇرىسبەكوۆ ايتپاقشى, ەرشاتتىڭ تابىلدى دوسىموۆقا ەلىكتەگەنى بايقالسا دا, ءسوزى مەن سازى ۇيلەسكەن تاماشا تۋىندى ادام جانىن تەبىرەنتەدى.
ەڭ سوڭىندا ونەر كورسەتكەن بارلىق انشىلەر ساحناعا شىعىپ, نۇرعيسا تىلەنديەۆتىڭ «ءوز ەلىم» انىمەن شىمىلدىقتى جاپتى.
