وتكەن سەنبى-جەكسەنبى كۇندەرى استانا اكىمدىگىنىڭ جانىنداعى ورتالىق الاڭعا تىگىلگەن 126 شاتىردا شىعىس قازاقستان وبلىسىنىڭ ەكى قالاسى مەن ون التى اۋدانىنان جەتكىزىلگەن, جيىنتىعى 115 تونناعا جۋىق اۋىل شارۋاشىلىعى ونىمدەرى ساتىلدى.
استانالىقتار جاڭا جىل الدىندا نارىقتاعى باعادان 20 پايىزعا ارزان ەت پەن ءسۇت, ماكارون ونىمدەرىن, جارما تۇرلەرىن, سونداي-اق, شىعىس ءوڭىرىنىڭ برەندى – بال مەن پانتا ساتىپ الۋعا مۇمكىندىك الدى.
جالپى, وبلىس ديقاندارىنا بيىل تابىستى جىل بولدى. ولار سوڭعى 10 جىل ىشىندە بولماعان رەكوردتىق ءونىمدى ىسىراپسىز جيناپ الدى. ورتاشا ەسەپپەن ءار گەكتاردان 18,3 تسەنتنەردەن ءونىم العان شىعىسقازاقستاندىقتار ميلليون توننادان ارتىق استىق داقىلدارىن قامباعا قۇيدى. سونىمەن بىرگە كۇنباعىس, باۋ-باقشا ونىمدەرىن دە مول بولدى.
– جىلدىڭ سوڭىندا ەلدىڭ ءبىر ايماعى استاناعا كەرەمەت تارتۋ جاساپ جاتىر. وزدەرىڭىز بىلەسىزدەر, ەل ايماقتارى كەرۋەن تارتىپ, كۇزدە استاناعا كەلەتىنى بار. بۇل – جاقسى ءداستۇرگە اينالعان ەدى. ەندى جاڭا جىلدىڭ قارساڭىندا ەڭ ءىرى ايماقتارىمىزدىڭ ءبىرى – شىعىس قازاقستان ءوزىنىڭ بىرىنشىدەن – ءمادەني كۇندەرىن, ەكىنشىدەن – وسىنداي جارمەڭكەسىن وتكىزۋدە. شىعىس قازاقستان بيىل استانادا ەكىنشى رەت ادەمى جارمەڭكە ۇيىمداستىردى, سوندىقتان ولاردىڭ استاناعا دەگەن جىلى ءىلتيپاتى ءۇشىن راحمەتىمدى ايتقىم كەلەدى, – دەدى استانا قالاسىنىڭ اكىمى يمانعالي تاسماعامبەتوۆ.
شىعىس قازاقستان وبلىسىنىڭ اكىمى بەردىبەك ساپارباەۆ ءوز كەزەگىندە: «ۇلتىمىزدىڭ, مەملەكەتىمىزدىڭ دامۋى استاناعا بايلانىستى. سوندىقتان ءاربىر ءوڭىر استانا ءۇشىن جۇمىس جاساۋى كەرەك. جاڭا جىل الدىندا بورانعا, ايازعا قاراماي كەلگەندەگى ماقساتىمىز – استانا حالقىنا ارزان ازىق-تۇلىك ونىمدەرىن ساتىپ, كوڭىلدەرىن كوتەرۋ» دەدى.
شىعىسقازاقستاندىقتار وسى جولى قاتونقاراعاي اۋدانىنداعى مارال شارۋاشىلىعىمەن اينالىساتىن «اقسۋ-دەن» زاۋىتىنىڭ ونىمدەرىن اكەلىپتى. زاۋىت ديرەكتورىنىڭ ورىنباسارى التىن راحىمباەۆانى سوزگە تارتقانىمىزدا ول: «شىعىس قازاقستاندا بۇرىننان كەلە جاتقان «اقسۋ» جانە «مارالدى» اتالاتىن ەكى مارال شارۋاشىلىعى بار. ءبىزدىڭ زاۋىت وڭتۇستىك كورەيالىق جابدىقتارمەن جۇمىس ىستەيدى. سوندا مارالدىڭ ءمۇيىزى مەن قانىنان بيولوگيالىق زاتتەكتەردى جاساپ شىعارامىز. شۆەيتساريادان – سەرتيفيكات, فرانتسيا مەن رەسەيدەن التىن مەدال الىپ, «قازاقستاننىڭ ۇزدىك تاۋارى» اتاعىن يەلەنگەنبىز. پانتا – حالقىمىزعا وتە كەرەك. سەبەبى, كوبىنىڭ دەنساۋلىعى ناشارلاپ كەتتى. ال, ءبىزدىڭ ءونىم ميدىڭ, اسقازاننىڭ جۇمىسىن جاقسارتادى, شارشاپ, قاجىعان ادامعا كۇش-قۋات بەرەدى» دەگەن ەدى.
