بيىلعى قىس ەلوردا حالقىنا جايلى بولدى. ادەتتەگى ارقانىڭ اقىرعان ايازى دا, بەت قاراتپايتىن بورانى دا مىنەز كورسەتە قويمادى. قازىر قالادان دا, دالادان دا كوكتەمنىڭ ءيىسى سەزىلەدى. بۇگىنگى كۇنتىزبەنىڭ پاراعى دا 1 ناۋرىزدى كورسەتىپ تۇر. بۇل – دۇن-دۇنيە جاڭاراتىن شۋاقتى مەزگىلگە جەتتىك دەگەن ءسوز. الايدا, جايباراقات وتىراتىنداي ەمەس, كوممۋنالدىق قىزمەتتەردىڭ قاربالاس شاعى ءالى جالعاسىپ جاتىر. قازىرگى باستى ءمىندەت – قالانى سۋ باسۋدان ساقتاپ قالۋ. ءبىز سارىارقالىقتار قارعىنعا قارسى قانداي شارالار اتقارىلىپ جاتقانىن ءبىلۋ ماقساتىندا اۋدان اكىمىنىڭ ورىنباسارى ريزا اكچۋرينگە جولىعىپ, ءمان-جايعا قانىقتىق.
«تاسقىنعا قارسى شارالاردى ءتيىمدى جۇرگىزۋ ماقساتىندا اۋدانعا كىرەتىن اۋماق جيىرما ۋچاسكەگە ءبولىندى. سۋ تاسقىنىنىڭ الدىن الۋ جۇمىسى جوسپارلى تۇردە جۇرگىزىلۋدە. نەگىزىنەن, اۋداندى قاردان تازارتۋدى وتكەن جىلدىڭ 22 قازانىندا باستاعانبىز. اسىرەسە, قاڭتار ايى باستالعاندا قارقىندى كۇشەيتتىك. قازىر بۇل جۇمىس جالعاسىپ جاتىر. بۇگىنگى كۇنگە دەيىن 700 مىڭ تەكشە مەتردەن استام قار ارناۋلى پوليگونعا شىعارىلدى» دەيدى ول.
ونىڭ ايتۋىنشا, اۋداندا قارعىن قاۋپىن تۋدىرىپ وتىرعان ءتورت اۋماق انىقتالعان. اتالعان اۋماقتار «كوكتال» مەن «ءوندىرىس» تۇرعىن الاپتارىندا, اگروقالاشىقتا جانە ي. پانفيلوۆ پەن ي. پاۆلوۆ كوشەلەرى جاعىندا ورنالاسقان. «بۇل اۋماقتاردى قاردان تازارتۋدىڭ قارقىنىن باسەڭدەتكەن جوقپىز. نەگىزگى تەحنيكا قازىر سول جەرلەردە ءجۇر» دەيدى اۋدان اكىمىنىڭ ورىنباسارى.
ر. اكچۋريننىڭ سوزىنشە, 20 اقپاندا ارىقتاردى تازارتۋ باستالىپ, بۇل جۇمىستىڭ ناقتى جوسپارى بەكىتىلگەن. ارىقتاردى تازارتۋ اشحاباد, تاشكەنت, ت. شونانۇلى جانە مۇنايشىلار كوشەلەرىنەن باستاۋ الىپ, بۇگىنگى كۇنگە ارىقتاردىڭ 1 مىڭنان استام مەترى تازارتىلدى.
سونداي-اق, اگروقالاشىقتا ورنالاسقان تابيعي سۋ كوزدەرىنىڭ دەڭگەيىن تومەندەتۋ ماقساتىندا 4 مىڭ تەكشە مەتر ينەرتتى ماتەريال دايىندالدى. سۋ سوراتىن جانە تازارتقىش تەحنيكا ساقاداي ساي تۇر. «اقمولاۆودسەرۆيس ي ك» جشس بۇعان قوسىمشا تەحنيكانى بولەيىن دەپ وتىر.
«سۋ تاسقىنىن بولدىرماس ءۇشىن بۇل جۇمىسقا كۇن سايىن مونيتورينگ پەن باقىلاۋدى جۇرگىزىپ وتىرمىز. حالىققا تاسقىن قاۋپى تۋىنداپ قالعان جاعدايدا قالاي قيمىلداۋ كەرەكتىگى ءتۇسىندىرىلدى. دۇرلىگەتىندەي ەشتەڭە كورىپ تۇرعان جوقپىز» دەيدى ر. اكچۋرين.
ا. قالجانوۆ, astana-akshamy.kz
