وقىرماندار ساۋالدارىنا «Elorda Aqparat» جشس زاڭگەرى اسەت قايىرحان جاۋاپ بەرەدى.
– قىزىم 2012 جىلى يپوتەكاعا پاتەر الدى. ونىڭ العاشقى جارناسىن مەن بەرگەن ەدىم, ول ءۇشىن قولحات جازدى جانە ءۇش ادام كۋاگەرلىك ەتتى. قولحاتتا قارىزعا الىنعان قاراجاتتىڭ قايتارىلۋ مەرزىمى كورسەتىلمەگەن. قازىر قىزىم اجىراستى. سۇراعىم كەلگەنى – قىزىم مەن ونىڭ بۇرىنعى كۇيەۋى مۇلىكتى بولىسكە سالعان كەزدە مەن ءوز اقشامدى قايتارىپ الا الامىن با؟ الدە ونىڭ مەرزىمى ەسكىرىپ كەتتى مە؟
ە.تاڭسىقباەۆ, نۇر-سۇلتان قالاسى
– «قر نەكە جانە وتباسى تۋرالى» كودەكسىنىڭ 38-بابىنا سايكەس, «ەرلى-زايىپتىلاردىڭ ورتاق مۇلكىن ءبولۋ كەزىندەگى ەرلى-زايىپتىلاردىڭ جالپى قارىزدارى ولاردىڭ اراسىندا بەرىلگەن ۇلەستەرگە سايكەس بولىنەدى». سوندىقتان ءسىزدىڭ قارىز اقشاڭىز ورتاق مۇلىكتى ءبولۋ كەزىندە ەرلى-زايىپتىلاردىڭ اراسىندا ولارعا بەرىلگەن ۇلەستەرگە سايكەس بولىنەدى. قر ازاماتتىق كودەكسىنىڭ 277-بابى 2-بولىمىنە سايكەس, ەگەر مىندەتتەمەلەردە ونى ورىنداۋ مەرزىمى كورسەتىلمەگەن بولسا جانە وسى كەزەڭدى انىقتاۋعا مۇمكىندىك بەرەتىن جاعدايلار بولماسا, ول مىندەتتەمە تۋىنداعاننان كەيىن بەلگىلى ءبىر مەرزىم ىشىندە ورىندالۋى كەرەك. ءسىزدىڭ جاعدايدا ەسەپتەۋ مەرزىمى ءسىزدىڭ ازاماتتىق قۇقىقتارىڭىزدىڭ بۇزىلعاندىعى تۋرالى بىلەتىن كەزدەن باستالادى. بورىشكەر كرەديتور ونى ورىنداۋ تۋرالى تالاپتى ۇسىنعان كۇننەن باستاپ جەتى كۇن ىشىندە ورىنداۋعا مىندەتتى.
– مەنىڭ قۇربىمنىڭ جاسى 82-دە, 52 جىلدان بەرى دوستىق بايلانىستامىز. ونىڭ جيەنىنەن باسقا ەشكىمى جوق. قۇربىم ءوز تۋىستارىمەن ءتىل تابىسا الماي, وسيەتتى مەنىڭ قىزىمنىڭ اتىنا جازدى. بىراق نوتاريۋس وسيەتتى تولتىرۋ بارىسىندا تەراپەۆت پەن پسيحياتردان انىقتاما سۇراعان جوق, بار بولعانى «كوزبەن تەكسەرىلدى» دەپ جازدى. ەندى قۇربىمنىڭ تۋىستارى وسيەت دۇرىس جاسالماعان دەپ ءبىزدى بوپسالاپ, قوقان-لوققى كورسەتىپ وتىر. ولاردىڭ ءسوزىنىڭ جانى بار ما؟
ءاليما وماروۆا, زەينەتكەر, قالا تۇرعىنى
– وسيەت دەگەنىمىز – ازامات قايتىس بولعان جاعدايدا ونىڭ مۇلكىن يەلىكتەن شىعارۋ تۋرالى ەركى. وسيەت – بۇل ءبىر جاقتى مامىلە. ونى ورىنداۋ ءۇشىن تەك ءبىر ادامنىڭ – وسيەت قالدىرۋشىنىڭ قالاۋى جەتكىلىكتى. ازامات ەشكىمگە تۇسىندىرمەستەن ءوزىنىڭ بارلىق مۇلكىن نەمەسە ونىڭ ءبىر بولىگىن ءبىر نەمەسە بىرنەشە ازاماتقا, كەز كەلگەن ۇيىمعا نەمەسە مەملەكەتكە مۇرا ەتە الادى, سونداي-اق مۇراگەرىن مۇرادان ايىرا الادى. وسيەت قالدىرۋشى ونى قۇراستىرۋ كەزىندە تولىق قۇقىقتىق قابىلەتكە يە ادام بولادى. ازاماتتىق كودەكس وسيەتتى كەز كەلگەن ۋاقىتتا جويۋعا نەمەسە وزگەرتۋگە بولاتىندىعىن قاراستىرادى. زاڭدا قارت ادام وسيەت جازعاندا نوتاريۋس ودان دەنساۋلىق جاعدايى تۋرالى انىقتامانى تالاپ ەتۋى كەرەك دەپ قاراستىرىلماعان. بىراق كەيبىر نوتاريۋستار ساقتىق رەتىندە, وسيەت قالدىرۋشى 70 جاسقا تولعان بولسا, ودان دەنساۋلىعى تۋرالى انىقتاما سۇرايدى.
