وقىرماندار ساۋالدارىنا «Elorda Aqparat» جشس زاڭگەرى اسەت قايىرحان جاۋاپ بەرەدى.
بۇرىنعى كۇيەۋىمنىڭ اكەسى كامەلەتكە تولماعان ۇلىمىزعا وسيەت ارقىلى پاتەر قالدىرعان بولاتىن. بالا مەنىڭ قولىمدا. ال پاتەردىڭ بارلىق قۇجاتتارى بۇرىنعى كۇيەۋىمدە. بۇرىنعى كۇيەۋىم ءبىزدى پاتەردەن قۋىپ شىعا الا ما؟
دينارا كەڭەسوۆا, نۇر-سۇلتان قالاسىنىڭ تۇرعىنى
– «قازاقستان رەسپۋبليكاسىنداعى بالا قۇقىقتارى تۋرالى» قر زاڭىنا سايكەس, بالانىڭ زاڭدى وكىلدەرى اتا-انالارى بولىپ تابىلادى. ولار بالالاردىڭ مۇددەلەرىن بىلدىرەدى جانە بارلىق مەملەكەتتىك ورگاندار مەن ۇيىمداردا, سونىڭ ىشىندە سوتتا قۇجاتتار نەگىزىندە وزدەرىنىڭ قۇقىقتارى مەن زاڭدى قورعالاتىن مۇددەلەرىن قورعايدى. ءسىز جۇبايىڭىزدان بولەك تۇراسىز. ەگەر بالانىڭ تۇرعىلىقتى جەرى تۋرالى سوت شەشىمى بولماسا, ول اتا-انانىڭ قايسىسىمەن تۇرعىسى كەلسە – سونىمەن تۇرۋعا قۇقىلى. سونىمەن بىرگە ءسىزدىڭ بالاڭىز – اتاسى مۇراعا قالدىرعان پاتەردىڭ يەسى. ءسىز زاڭدى وكىل رەتىندە بالامەن تۇرۋىڭىز كەرەك. ەگەر نەكە بۇزىلماسا, وندا ءسىز زاڭدى تۇردە نەكەنى بۇزۋعا, نەكەنى توقتاتۋعا, بالانى ءوزىڭىز الىپ قالۋعا جانە بالانىڭ وسى پاتەردە تۇراتىن جەرىن انىقتاۋعا قۇقىعىڭىز بار. سوت وتىرىسىنىڭ شەشىمىمەن بالانىڭ اكەسىنەن پاتەر قۇجاتتارىن الا الاسىز.
مەن ساقتاندىرۋ ءپوليسىن وزگەرتىپ, ساقتاندىرۋدى ايەلىمە جازعىم كەلەدى. بۇل مۇمكىن بە؟
نۇرلان قايراتۇلى, نۇر-سۇلتان قالاسىنىڭ تۇرعىنى
– «كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ تۋرالى» قازاقستان رەسپۋبليكاسى زاڭىنىڭ 10-بابىنىڭ 6-1-تارماعىنا سايكەس: «6-1 ساقتاندىرۋ پوليسىنە وزگەرىستەر ەنگىزۋگە جول بەرىلمەيدى». سونداي-اق قر ازاماتتىق كودەكسىنىڭ 841-بابى 1-تارماعىنىڭ 8-تارماقشاسىنا سايكەس: «ساقتاندىرۋشى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن ساقتاندىرۋشى بەرگەن ساقتاندىرۋ پوليسىنە ەنگىزىلگەن تالاپتار مەن اقپارات وزگەرگەن جاعدايدا, ساقتاندىرۋ شارتى مەرزىمىنەن بۇرىن بۇزىلادى».
